ទីក្រុងបាងកក៖ លោកស្រីផែថងថានដែលជាកូនស្រីលោកថាក់ស៊ីន និងជាប្រធានគណបក្សភឿថៃ ថ្លែងថាលោកស្រីមិនមានបំណងធ្វើជានាយករដ្ឋមន្ត្រីជំនួសលោកសេដ្ឋាទេ។ លោកស្រីថ្លែងដូចនេះនៅពេលមានសញ្ញាថាលោកសេដ្ឋាអាចនឹងត្រូវដកតំណែងតាមផ្លូវតុលាការតបតាមពាក្យបណ្ដឹងរបស់សមាជិកព្រឹទ្ធសភា៤០រូបដែលចោទថាលោកសេដ្ឋាតែងតាំងរដ្ឋមន្ត្រីឈ្មោះពិចិត្រជាមនុស្សធ្លាប់មានទោសព្រហ្មទណ្ឌ។ ឥឡូវនេះ លោកសេដ្ឋាត្រៀមឡើងការពារខ្លួននៅក្នុងតុលាការ។
លោកស្រីផែថងថានថ្លែងថាលោកស្រីមិនបានត្រៀមខ្លួនធ្វើជានាយករដ្ឋមន្ត្រីទេថ្វីដ្បិតលោកស្រីក៏ជាបេក្ខជននាយករដ្ឋមន្ត្រីរបស់គណបក្សភឿថៃតាំងពីពេលបោះឆ្នោតឆ្នាំ២០២៣មកម៉្លេះ។ ម៉្យាងទៀត លោកស្រីជឿជាក់ថាលោកសេដ្ឋាក៏មិនប្រាកដជារបូតតំណែងនេះដែរ។ លោកស្រីមានជំនឿថាតុលាការធម្មនុញ្ញនឹងវិនិច្ឆ័យឱ្យលោកសេដ្ឋារួចខ្លួនពីការចោទប្រកាន់នេះ។
សូមរំលឹកថាកាលពីថ្ងៃព្រហស្បតិ៍ តុលាការធម្មនុញ្ញបានទទួលយកញត្តិដែលស្នើសុំដកតំណែងលោកសេដ្ឋាពីបទតែងតាំងលោកពិចិត្រជារដ្ឋមន្ត្រីទីស្ដីការគណៈរដ្ឋមន្ត្រី។ លោកពិចិត្រត្រូវតុលាការរកឃើញថាមានទោសកំហុសពីបទចង់ផ្ដល់ប្រាក់សំណូក២លានបាតទៅឱ្យមន្ត្រីតុលាការមួយចំនួន។ តុលាការបានហាមឃាត់លោកមិនឱ្យធ្វើជាមេធាវីរយៈពេលប្រាំឆ្នាំ។
អង្គជំនុំជម្រះនៃតុលាការធម្មនុញ្ញប្រាប់លោកសេដ្ឋាឱ្យរៀបចំសារណាដើម្បីការពារខ្លួននៅក្នុងរង្វង់១៥ថ្ងៃក្រោយការជូនដំណឹង។ នៅពេលនោះ លោកសេដ្ឋាស្ថិតនៅទីក្រុងតូក្យូប្រទេសជប៉ុននៅឡើយទេដើម្បីជួបអ្នកវិនិយោគទុន។ តុលាការសម្រេចចិត្តថាមិនចាំបាច់ព្យួរតំណែងរបស់លោកទេ។ ចាំទូទាត់គ្នានៅពេលតុលាការចេញសេចក្ដីសម្រេចជាស្ថាពរ។
កាលពីថ្ងៃព្រហស្បតិ៍ក៏មានញត្តិ១ទៀតស្នើសុំដកតំណែងលោកពិចិត្រផងដែរ។ ប៉ុន្តែលោកបានលាលែងពីតំណែងតាំងពីថ្ងៃអង្គារទៅទៀតដើម្បីកុំឱ្យលោកសេដ្ឋាបាត់បង់តំណែងដោយសារគាត់។ កាលពីឆ្នាំ២០០៨ តុលាការកាត់ទោសឱ្យលោកពិចិត្រ និងគូកនរបស់គាត់២នាក់ទៀតជាប់ពន្ធនាគារ៦ខែ។ កាលនោះ គាត់ក៏កំពុងការពារក្ដីឱ្យលោកថាក់ស៊ីនផងដែរ។
សមាជិកព្រឹទ្ធសភាម្នាក់ដែលចូលរួមដាក់ញត្តិតវ៉ានោះដែរប្រាប់ថាតុលាការមិនចាំបាច់សំកុកយូរទេនៅក្នុងការវិនិច្ឆ័យទៅលើរឿងនេះ។ សំណុំរឿងនេះគ្មានអ្វីស្មុគស្មាញពិបាកយល់ឡើយព្រោះយើងបានផ្ដល់គ្រប់គ្រាន់អស់ហើយនូវអង្គហេតុក៏ដូចជាព័ត៌មានពាក់ព័ន្ធទាំងអស់ដាក់ជូនទៅតុលាការ។ គេរំពឹងថាតុលាការនឹងចេញសេចក្ដីសម្រេចនៅក្នុងរង្វង់បីខែទៀត។
អ្នកនាំពាក្យគណបក្សប្រជាធិបតេយ្យថ្លែងថាបើទុកជាតុលាការដកតំណែងលោកសេដ្ឋាក៏សមាជិកគណៈរដ្ឋមន្ត្រីនៅរក្សាតំណែងរបស់ខ្លួនដដែលរហូតដល់សភាបោះឆ្នោតផ្ដល់សេចក្ដីទុកចិត្តចំពោះបេក្ខជននាយករដ្ឋមន្ត្រីថ្មី។ មូលហេតុដោយសារញត្តិតវ៉ានោះស្នើសុំឱ្យតុលាការដកតំណែងតែលោកសេដ្ឋាម្នាក់ប៉ុណ្ណោះ។ មិនមែនរំលាយគណៈរដ្ឋមន្ត្រីទាំងមូលទេ។
ឥឡូវនេះ អាថ៌កំបាំងចេញមកជាបណ្ដើរៗហើយជុំវិញការចាត់ការផ្នែកផ្លូវតុលាការប្រឆាំងនឹងលោកសេដ្ឋា។ ការពិតនៅពីក្រោយរឿងនេះមិនមែនពាក់ព័ន្ធនឹងការតែងតាំង ឬមិនតែងទណ្ឌិតឱ្យធ្វើជារដ្ឋមន្ត្រីទេ។ ប៉ុន្តែពាក់ព័ន្ធនឹងរឿងនយោបាយ។ បញ្ហាធំគឺគេចង់វាយប្រហារទៅលើលោកថាក់ស៊ីនឯណោះទៅវិញទេ។ ពួកគេសង្កេតឃើញថាលោកថាក់ស៊ីនកាន់តែមានឥទ្ធិពលខ្លាំងនៅក្នុងឆាកនយោបាយចាប់តាំងពីលោកវិលត្រឡប់ចូលប្រទេសថៃវិញ។ នេះបើយោងតាមអតីតអ្នកនាំពាក្យគណបក្សភឿថៃ លោកសក្កដា ណុបផាសិត (Sakda Noppasit)៕
ចែករំលែកព័តមាននេះ