ព្រែកជីកហ្វូណនតេជោ ៖ លោក ស៊ុន ចាន់ថុល ពន្យល់ឧបនាយករដ្ឋមន្ត្រីវៀតណាម
- ភ្នំពេញ
លោក ស៊ុន ចាន់ថុល ឧបនាយករដ្ឋមន្ត្រីកម្ពុជា បានពន្យល់អំពីគម្រោង ព្រែកជីកហ្វូណនតេជោ ប្រាប់លោក ឡេ មិញ ខៃ (Lee Minh Khai) នៅពេលជួបគ្នា
លោក ស៊ុន ចាន់ថុល ឧបនាយករដ្ឋមន្ត្រីកម្ពុជា បានពន្យល់អំពីគម្រោង ព្រែកជីកហ្វូណនតេជោ ប្រាប់លោក ឡេ មិញ ខៃ (Lee Minh Khai) នៅពេលជួបគ្នា នៅក្នុងប្រទេសជប៉ុន បន្ទាប់ពីបានចូលរួមសន្និសីទអន្តរជាតិលើកទី២៩ ស្តីពីអនាគតរបស់អាស៊ី ។
លោក ស៊ុន ចាន់ថុល ដែលជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានធ្វើការពន្យល់ លម្អិតបន្ថែមអំពីគម្រោងព្រែកជីកហ្វូណនតេជោ ថា គម្រោងនេះ ជីកលើតម្រាយខ្សែផ្លូវទឹកធម្មជាតិ និងផ្លូវទឹកបុរាណ ដែលបានបន្សល់ទុកស្រាប់ ហើយធ្លាប់បានប្រើប្រាស់តាំងពី អាណាចក្រហ្វូណនមកម្ល៉េះ។
ចំពោះគម្រោងនេះ លោកបានលើកឡើងថា កម្ពុជា បានធ្វើការសិក្សាយ៉ាងលម្អិតអស់រយៈ ពេល២៦ខែ ដោយមានការចូលរួមពីជំនាញការបច្ចេកទេសជាន់ខ្ពស់សរុបចំនួន៤៨នាក់ ដែលក្នុងនោះមានកម្រិតជំនាញជាសាស្ត្រាចារ្យមហាបរិញ្ញាវិទ្យាសាស្ត្រ ចំនួន១១នាក់ វិស្វករជាន់ខ្ពស់លំដាប់ពិភពលោក ចំនួន៣០នាក់ និងកម្រិតវិស្វករ ចំនួន៧នាក់ ដែលសុទ្ធសឹងដែលមានជំនាញ និងបទពិសោន៍ជាច្រើនឆ្នាំលើវិស្វកម្មសំណង់ផ្លូវទឹក វិស្វកម្ម បូមស្តារព្រែកជីក ការរចនាប្លង់សាងសង់ផ្លូវទឹក វិភាគជលសាស្ត្រ បរិស្ថាន សេដ្ឋកិច្ចសង្គម និងគ្រប់ទិដ្ឋភាពជំនាញបច្ចេកទេស លើគ្រប់វិស័យដែលពាក់ព័ន្ធ។
លោកបានបន្តថា ផ្លូវទឹកនេះ នឹងសាងសង់សន្ទះផ្លូវទឹក ចំនួន៣កន្លែង ស្ថិតនៅខេត្តកណ្តាល ខេត្តតាកែវ និងខេត្តកែប ដែលធានាបាននូវប្រសិទ្ធភាពក្នុងការទប់ស្កាត់ ការជ្រៀតចូលនៃទឹក ប្រៃទៅក្នុងបណ្តាញផ្លូវទឹកសាប និងអាចកំណត់បរិមាណ និងអត្រានៃរំហូរទឹកសាប ដែលត្រូវ ហូរចេញទៅសមុទ្របានផងដែរ ដែលមិនអាចបង្កឱ្យមានផលប៉ះពាល់លើផ្នែកបរិស្ថាន ក្នុងប្រទេស ឬបង្កផលប៉ះពាល់ជាអវិជ្ជមានឆ្លងដែន ទៅប្រទេសជិតខាងបានឡើយ ។ ផ្ទុយទៅវិញគម្រោងនេះ នឹងជួយរក្សាលំនឹងចីរភាពបរិស្ថាន ប្រព័ន្ធអេកូឡូស៊ី និងបង្កើតជម្រក ចម្រុះគ្រប់ប្រភេទដែលមានសារៈប្រយោជន៍សម្រាប់ការកកើតនៃពពួកវារីសត្វ-រុក្ខជាតិ និងមច្ឆា ជាតិគ្រប់ប្រភេទ កាត់បន្ថយទឹកជំនន់នៅខេត្តចំនួន៥ នៅក្នុងប្រទេសកម្ពុជា និងអាចការពារមិនឱ្យមានទឹកជំនន់ពីប្រទេសកម្ពុជា ហូរចូលប្រទេសវៀតណាម។
លោកបានបន្ថែមថា ជាក់ស្តែង តាមការសិក្សាយ៉ាងលម្អិតបានបង្ហាញថា បច្ចុប្បន្នទឹកហូរ ពីទន្លេមេគង្គទៅសមុទ្រមាន ប្រមាណ៨០០០ម៉ែត្រគូប ក្នុងមួយវិនាទី (8000m3/s) ចំពោះទន្លេបាសាក់ មានទំហំ១៤០០ម៉ែត្រគូប ក្នុងមួយវិនាទី (1400m3/s) ចំណែកគម្រោងព្រែកជីកហ្វូណន នឹងប្រើប្រាស់ទឹកត្រឹមតែ៥ម៉ែត្រគូប ក្នុងមួយវិនាទី (5m3/s) តែប៉ុណ្ណោះ ឬប្រមាណ ០,០៥៣%។
នាឱកាសជំនួបនេះ លោកឧបនាយករដ្ឋមន្ត្រីទាំងពីរ បានរំលេចឡើងរួមគ្នាអំពីកិច្ចសហប្រតិបត្តិការដ៏ជិតស្និទ្ធ និងប្រកបដោយផ្លែផ្ការបស់រដ្ឋាភិបាល បើទោះបីពិភពលោក កំពុងស្ថិតក្នុងស្ថានការណ៍ប្រកួតប្រជែងភូមិសាស្ត្រនយោបាយ ដែលមានលក្ខណ:កាន់តែស្រួចស្រាល និងមិនប្រាកដប្រជាក៏ដោយ។ បន្ថែមពីនេះ ភាគីទាំងពីរ បានគូសបញ្ជាក់អំពីសារៈសំខាន់នៃការបន្តកិច្ចសហប្រតិបត្តិការឱ្យកាន់តែស៊ីជម្រៅ ដើម្បីផលប្រយោជន៍ទៅវិញទៅមករបស់ប្រជាជនទាំងពីរ ដោយផ្អែកលើស្មារតីភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង។
លោកឧបនាយករដ្ឋមន្ត្រី ស៊ុន ចាន់ថុល ក៏បានបង្ហាញការតាំងចិត្ត និងស្នើឱ្យមានការចូលរួម ពីភាគីមិត្តវៀតណាម ធ្វើយ៉ាងណាសម្រេចទិសដៅក្នុងការបង្កើនទំហំពាណិជ្ជកម្ម រវាងប្រទេសទាំងពីរឱ្យដល់ ២០ពាន់លានដុល្លារអាមេរិក នៅថ្ងៃអនាគតដ៏ខ្លីខាងមុខ។
ដោយ ៖ ស ផាន់
ចែករំលែកព័តមាននេះ