ខេត្តស្វាយរៀង ៖ ប្រជាពលរដ្ឋចំនួន០៣ភូមិ គឺភូមិស្វាយរលំ ភូមិច្រេស និងភូមិត្រសក់ ក្នុងឃុំកំពង់អំពឹល ប្រមាណជិត៣០០គ្រួសារ គ្មានអគ្គិសនីប្រើប្រាស់ទេ បានសំណូមពរយ៉ាងទទូច…
ខេត្តស្វាយរៀង ៖ ប្រជាពលរដ្ឋចំនួន០៣ភូមិ គឺភូមិស្វាយរលំ ភូមិច្រេស និងភូមិត្រសក់ ក្នុងឃុំកំពង់អំពឹល ប្រមាណជិត៣០០គ្រួសារ គ្មានអគ្គិសនីប្រើប្រាស់ទេ បានសំណូមពរយ៉ាងទទូច សូមឲ្យអាជ្ញាធរមេត្តា ជួយដោះស្រាយស្នើសុំទៅលោកប្រធានអគ្គិសនីកម្ពុជា សាខាខេត្តស្វាយរៀង ឲ្យចុះមកពិនិត្យ និងតបណ្តាញអគ្គិសនី ឲ្យប្រជាពលរដ្ឋទាំង០៣ភូមិ បានប្រើប្រាស់ផង។
បើតាមប្រជាពលរដ្ឋរស់នៅភូមិស្វាយរលំ បានប្រាប់អ្នកសារព័ត៌មានយើងថា នៅភូមិស្វាយរលំ ឃុំកំពង់អំពឹល គ្មានភ្លើងអគ្គិសនីប្រើប្រាស់ទេ ពួកគាត់បានស្នើសុំទៅអាជ្ញាធរឃុំ ជាច្រើនលើកហើយ មិនទាន់បាន គឺគេប្រាប់ថា ជិតបានហើយៗ ពួកគាត់ខំយកបង្គោលមកដាំ និងទិញខ្សែភ្លើងទុក សម្រាប់តអគ្គិសនី រយៈពេល០៣បួនឆ្នាំមកហើយ រហូតបង្គោលពុកដួលរលំអស់ខ្លះហើយ ខ្សែភ្លើងទុកចោលយូរកណ្តុរកាត់អស់ នៅតែមិនទាន់ឃើញខាងអគ្គិសនី មកភ្ជាប់បណ្ដាញអគ្គិសនីឲ្យប្រើប្រាស់ទៀត ។
ចំណែកប្រជាពលរដ្ឋភូមិទួលច្រេស និងភូមិត្រសក់ ក៏បានលើកឡើងថា ប្រជាពលរដ្ឋដែលមានផ្ទះតាមដងផ្លូវថ្នល់ គេបានភ្លើងអគ្គិសនីប្រើប្រាស់ ហើយប្រជាពលរដ្ឋខ្លះទៀត ដែលគេមានជីវភាពធូរធារ គេដាំបង្គោល និងរាយខ្សែភ្លើង តបណ្តាញអគ្គិសនី បានប្រើប្រាស់ ចំពោះប្រជាពលរដ្ឋក្រីក្រ គ្មានលទ្ធភាព ដាំបង្គោលផង ទិញខ្សែភ្លើង តទៅឆ្ងាយ ចម្ងាយ៥០០ទៅ៦០០ម៉ែត្រនោះទេ ហើយនៅថ្លៃសុំតភ្ជាប់ និងឈ្នួល មន្ត្រីអគ្គីសនី ឲ្យមកតភ្ជាប់ឲ្យ ត្រូវចំណាយប្រាក់ច្រើន ដូច្នេះមានតែរង់ចាំអគ្គិសនី គេតបណ្តាញមកដល់ផ្ទះ ទើបអំពាវសូមឲ្យអាជ្ញាធរគ្រប់លំដាប់ថ្នាក់ មេត្តាជួយសម្រួល និងដោះស្រាយ ។
ប្រជាពលរដ្ឋខាងលើ បានអំពាវនាវ និងស្នើសុំនៅព្រឹកថ្ងៃទី២៤ ខែឧសភា ឆ្នាំ២០២៤ នៅភូមិស្វាយរលំ ឃុំកំពង់អំពឹលស្រុករំដួល ។
ទាក់ទិនករណីនេះ ដែរលោក ហែម ស៊ីណា អភិបាលស្រុករំដួល បានមានប្រសាសន៍ថា ក្នុងនាមរូបលោកជាអាជ្ញាធរ គឺចង់បានអគ្គិសនីឲ្យប្រជាពលរដ្ឋប្រើប្រាស់ខ្លាំងណាស់ គឺចង់បានអគ្គិសនីឲ្យប្រជាពលរដ្ឋបានប្រើប្រាស់គ្រប់មូលដ្ឋាន ហើយលោកបានស្នើសុំទៅលោកប្រធានអគ្គិសនីកម្ពុជា សាខាស្វាយរៀង ពីរបីលើករួចហើយ ប៉ុន្តែខាងមន្ត្រីអគ្គិសនី ឲ្យធ្វើផែនការឆ្នាំ តាមគោលការវិនិយោគ មុនក្រោយ គង់តែដល់ទេ គេឲ្យរង់ចាំ។ ចំណែកប្រជាពលរដ្ឋ ដែលគ្មានភ្លើងអគ្គិសនីប្រើប្រាស់ គាត់រង់ចាំយាងអន្ទះសា ។
លោកបន្តទៀតថា បញ្ហាខ្លះ គឺពាក់ពន្ធ័ភូមិសាស្ត្រ ភូមិខ្លះនៅឆ្ងាយពីគ្នា ភូមិខ្លះនៅកៀកគ្នា លំនៅឋានមួយចំនួន នៅឆ្លាយពីផ្លូវ ។
ដោយឡែកបើតាមលោក សេង ប៊ុនណាត ប្រធានអគ្គិសនីកម្ពុជា សាខាខេត្តស្វាយរៀង បានមានប្រសាសន៍ថា នៅតំបន់គោលដៅខ្លះ ត្រូវឲ្យអាជ្ញាធរលើកផែនការឆ្នាំ ដើម្បីវិនិយោគ ពេលណាគម្រោងទៅដល់ ខាងអគ្គិសនី នឹងឲ្យប្រជាពលរដ្ឋដាក់សំណើរ ។
លោក ឡឹក សេរីរតនា ប្រធានចែកចាយបណ្តាញអគ្គិសនី សាខាខេត្តស្វាយរៀង ក៏បានមានប្រសាសន៍ដែរថា អគ្គិសនីកម្ពុជាសាខាខេត្តស្វាយរៀង បានផ្តល់អគ្គិសនីឲ្យប្រជាពលរដ្ឋប្រើប្រាស់ទាំង៣ភូមិ ក៏ប៉ុន្តែមិនទាន់គ្រប់ខ្នងផ្ទះ មានដូចខាងក្រោម ៖
១. ភូមិត្រសក់ ៖ អគ្គិសនីស្វាយរៀងបានភ្ជាប់ចរន្ត ជូនអតិថិជនមានចរន្តអគ្គិសនីប្រើប្រាស់បានចំនួន ៧៤គ្រួសារ។ ចំពោះទីតាំងមិនទាន់មានអគ្គិសនីប្រើប្រាស់ គឺបានសាងសង់ បណ្តាញបណ្តាញរួចរាល់ហើយ។ នៅពេល ដែលដាក់ដំណើរការ ក្រុមការងារ នឹងជូនដំណឹងជូនប្រជាពលរដ្ឋ ។
២. ភូមិស្វាយរលំ ៖ អគ្គិសនីស្វាយរៀង បានភ្ជាប់ចរន្តជូនអតិថិជនមានចរន្តអគ្គិសនីប្រើប្រាស់បានចំនួន ៦៥គ្រួសារ។ ចំពោះទីតាំងមិនទាន់មានអគ្គិសនីប្រើប្រាស់ អគ្គិសនីស្វាយរៀងនឹងចុះពិនិត្យសិក្សាបន្ថែម ។
៣. ភូមិទួលច្រេស ៖ អគ្គិសនីស្វាយរៀង បានភ្ជាប់ចរន្ត ជូនអតិថិជនមានចរន្តអគ្គិសនីប្រើប្រាស់បានចំនួន ៧០គ្រួសារ។ ចំពោះទីតាំងមិនទាន់មានអគ្គិសនីប្រើប្រាស់ អគ្គិសនីស្វាយរៀងនឹងចុះពិនិត្យសិក្សាបន្ថែម ៕
ចែករំលែកព័តមាននេះ