ទីក្រុងប៉េកាំង៖ ថ្ងៃនេះ កងទ័ពចិនធ្វើសមយុទ្ធយោធាហ៊ុមព័ទ្ធកោះតៃវ៉ាន់ជាបន្តទៀតឈានចូលដល់ថ្ងៃទី២ដើម្បីជាការប្រៀនប្រដៅប្រធានាធិបតីថ្មីនៃកោះនេះគឺលោកឡៃឈីងតេ។ ស្បថចូលកាន់តំណែងបានបីថ្ងៃ ប្រទេសចិនក៏ធ្វើសមយុទ្ធយោធាតែម្ដង។ ប្រទេសចិនខឹងសម្បារនឹងសុន្ទរកថារបស់លោកឡៃឈីងតេដែលជំរុញឱ្យចិនឈប់ប្រើភាសាគំរាមកំហែងទោះបីតាមពាក្យពាក្យសម្ដី ឬតាមយោធា។ លោកថាចិន និងតៃវ៉ាន់ត្រូវតែស្មើមុខស្មើមាត់គ្នាគ្មាននរណារណបនរណាទេ។
កងទ័ពរំដោះប្រជាជនចិនចេញសេចក្ដីថ្លែងការណ៍សង្ខេបថាខ្លួនបន្តធ្វើសមយុទ្ធយោធាដែលមានឈ្មោះ «ចញសត២០២៤អេ» (Joint Sword -2024A) ដើម្បីធ្វើតេស្តសមត្ថភាពក្នុងការដណ្ដើមអំណាច, ការវាយប្រហារផ្គួបគ្នា និងការវាយកាប់ទីតាំងសំខាន់ៗ។ ប្រទេសចិនប្រើប្រាស់យន្តហោះ និងនាវាចម្បាំងហ៊ុមព័ទ្ធកោះតៃវ៉ាន់ពីគ្រប់ច្រកប្រៀបដូចជាការត្រៀមវាយលុក។
ជាកិច្ចឆ្លើយតប តៃវ៉ាន់ដាក់ពង្រាយកងទ័ពជើងគោក ជើងទឹក និងជើងអាកាសស្ថិតនៅក្នុងការប្រុងជើងព្រួល។ តៃវ៉ាន់ថ្លែងថាខ្លួននឹងធ្វើអ្វីៗគ្រប់យ៉ាងដើម្បីការពារសិទ្ធិសេរីភាពរបស់ជាតិខ្លួន។ កាលពីល្ងាចថ្ងៃព្រហស្បតិ៍ លោកឡៃឈីងតេថ្លែងថាលោកនឹងឈរនៅមុខគេដើម្បីការពារជាតិ។ ប៉ុន្តែលោកមិនបាននិយាយពាក់ព័ន្ធការធ្វើសមយុទ្ធយោធារបស់កងទ័ពចិនទេ។
នៅចំពោះមុខនៃបញ្ហាប្រឈម និងការគំរាមកំហែងពីខាងក្រៅ យើងនឹងបន្តលើកស្ទួយសេរីភាព និងលទ្ធិប្រជាធិបតេយ្យ និងខិតខំការពារសន្តិភាព និងស្ថិរភាពនៅក្នុងតំបន់។ ទោះជាយ៉ាងណាក្ដី នៅក្នុងក្រសែភ្នែករបស់រដ្ឋាភិបាលចិន ចិនចាត់ទុកលោកឡៃជាមេដឹកនាំផ្ដាច់ខ្លួន។ បើគាត់ដឹកនាំកោះតៃវ៉ាន់ សង្គ្រាមអាចនឹងផ្ទុះឡើង ហើយអាចធ្វើឱ្យតៃវ៉ាន់រលំរលាយ។
សមយុទ្ធយោធាដែលចាប់ផ្ដើមតាំងពីព្រឹកថ្ងៃព្រហស្បតិ៍នោះធ្វើឡើងនៅច្រកសមុទ្រតៃវ៉ាន់, ភាគខាងជើង, ខាងត្បូង និងខាងកើតកោះតៃវ៉ាន់។ សូម្បីតែប្រជុំកោះឃីនមេន, ម៉ាត់ស៊ូ, អ៊ូជៀវ និងតុងយីនក៏មានវត្តមានរបស់កងទ័ពចិនផងដែរ។ ក្រសួងការពារជាតិតៃវ៉ាន់ថ្លែងថាខ្លួនចាប់បានរូបភាពយន្តហោះប្រដេញ និងយន្តហោះខ្នាតធំរបស់ប្រទេសចិនសរុប៤៩គ្រឿង។
ប្រទេសចិនមានកំហឹងកាន់តែខ្លាំងបន្ទាប់ពីលោកឡៃឈីងតេចាត់ទុកថានេះជាសករាជដ៏រុងរឿងនៃលទ្ធិប្រជាធិបតេយ្យនៅកោះតៃវ៉ាន់។ ដូច្នេះ ទោះបីអង្គការសហប្រជាជាតិអំពាវនាវឱ្យភាគីទាំង២កុំបង្កហេតុដាក់គ្នាក្ដី។ ជាពិសេសប្រទេសអាមេរិកជំរុញឱ្យប្រទេសចិនខិតខំអត់ធ្មត់យ៉ាងណាក្ដី ក៏ចិនមិនស្ដាប់ដែរ។
លោកបៃដិនធ្លាប់និយាយជាច្រើនដងហើយថាលោកគាំទ្រនយោបាយចិនតែមួយដូចរដ្ឋាភិបាលអាមេរិកជំនាន់មុនៗដែរ។ មានន័យថាលោកមិនគាំទ្រ ឬលើកទឹកចិត្តឱ្យតៃវ៉ាន់ប្រកាសឯករាជ្យទេ។ គ្រាន់តែលោកគាំទ្រការបង្រួបបង្រួមទឹកដីដោយសន្តិវិធី។ លោកធ្លាប់ព្រលយពាក្យថានឹងបញ្ជូនកងទ័ពទៅជួយតៃវ៉ាន់បើចិនប្រើប្រាស់កម្លាំងយោធា។ សព្វថ្ងៃនេះ អាមេរិកនៅតែបន្តលក់អាវុធទៅឱ្យតៃវ៉ាន់នៅក្នុងអ្វីដែលវ៉ាស៊ីនតោនចាត់ទុកថាជាការពង្រឹងសមត្ថភាពការពារខ្លួនរបស់កោះនេះ៕
ចែករំលែកព័តមាននេះ