រាជធានីភ្នំពេញ ៖ ឃាត់ខ្លួនបានហើយ ស្ត្រីចំណាស់ម្នាក់ដែលធ្វើសកម្មភាពចូលទៅក្នុងផ្ទះប្រជាពលរដ្ឋលួចយកកាបូបលុយ ដែលមានមាស៥ជី និងលុយជាង២លានរៀល របស់លោកយាយម្នាក់ ដែលទៅលេងផ្ទះកូនរបស់គាត់ និងកំពុងសម្រាន្តលង់លក់មិនទាន់ក្រោកពីដំណេក លួចបានសម្រេច ហើយគេចខ្លួនបាត់ ដោយសុវត្ថិភាព ។
![](https://kohsantepheapdaily.com.kh/wp-content/uploads/2024/05/758d096269b0d3efc5b495139149906c-9.jpg)
រហូតមកដល់ពេលនេះត្រូវបានជនរងគ្រោះស្រាវជ្រាវតាមរកឃើញចាប់ប្រគល់អោយសមត្ថកិច្ច ទើបបែកធ្លាយជាមុខសញ្ញាចាស់ធ្លាប់ធ្វើសកម្មភាពលួចជាច្រើនករណីនៅខណ្ឌជ្រោយចង្វារនៅខណ្ឌផ្សេងៗទៀត ក្នុងរាជធានីភ្នំពេញ។ ហេតុការណ៍ ឃាត់ខ្លួននេះធ្វើឡើងកាលពីវេលាម៉ោង៣:៣០នាទីរសៀល ថ្ងៃទី២៣ ខែឧសភា ឆ្នាំ ២០២៤ នៅចំណុចបន្ទប់ជួលក្នុងភូមិទ្រា១ ក្រុម៤ សង្កាត់ស្ទឹងមានជ័យ១ខណ្ឌមានជ័យ រាជធានី ភ្នំពេញ ។
ស្ត្រីចំណាស់ជាជនសង្ស័យមានឈ្មោះ វណ្ណី អាយុ៥៩ឆ្នាំ មុខរបរមិនពិតប្រាកដ ។ នៅចំពោះមុខសាច់ញាតិជនរងគ្រោះស្ត្រីចំណាស់បានសារភាពថា រូបគេពិតជាបានលួចកាបូបលុយនោះពិតមែន ចំណែក ខ្សែដៃមាសទម្ងន់៥ជី រូបគេយកទៅលក់បានប្រាក់ចំនួន១២០០ដុល្លារ ។
![](https://kohsantepheapdaily.com.kh/wp-content/uploads/2024/05/a8432a5f31d8815dd6142b454035f722-13.jpg)
តាមការបញ្ជាក់ពីចៅរបស់ជនរងគ្រោះផ្ទាល់ និងតាមរយៈកាមេរ៉ាសុវត្ថិភាព ដែលបានបង្ហាញបានឲ្យឃើញថា មុនពេលកើតហេតុលោកយាយជាម្ចាស់កាបូប បានមកលេងផ្ទះកូនរបស់គាត់ ស្ថិតនៅក្នុងភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។ លុះនៅវេលាម៉ោង៦ព្រឹក ថ្ងៃទី២៣ ខែឧសភា ឆ្នាំ២០២៤ ក្នុងកាមេរ៉ាសុវត្ថិភាព ស្រាប់តែមានស្ត្រីជនសង្ស័យវ័យចំណាស់ម្នាក់ ស្លៀកឈុតពណ៌ត្រួយចេក មានមុខ និងភិនភាគ ដូចដែលកាមេរ៉ាចាប់ជាប់មកចូលក្នុងផ្ទះ ហើយលួចយកកាបូបលុយរបស់លោកយាយដែលក្នុងកាបូបនោះមានលុយជាង២លានរៀល និងមាស៥ជី គេចខ្លួនបាត់តែម្តង ។
![](https://kohsantepheapdaily.com.kh/wp-content/uploads/2024/05/e4da3b7fbbce2345d7772b0674a318d5-17.jpg)
ក្រោយកើតហេតុ កូនរបស់ជនរងគ្រោះបានបញ្ជាក់ថា គាត់បានទៅដាក់ពាក្យបណ្តឹងនៅប៉ុស្តិ៍ជ្រោយចង្វារ ហើយ និងមានគេប្រាប់កូនជនរងគ្រោះថា បានឃើញស្ត្រីដែលជាជនសង្ស័យរូបនេះស្នាក់នៅតាមបណ្តោយផ្លូវសឡា ក្នុងសង្កាត់ស្ទឹងមានជ័យទី១ ខណ្ឌមានជ័យ ទើបកូនជនរងគ្រោះបើករថយន្តចេញពីក្នុងសង្កាត់ជ្រោយចង្វារ មកដល់ក៏ឃើញជនសង្ស័យរូបនេះមែន និងឃាត់ខ្លួនបានតែម្តងយកទៅកាន់ប៉ុស្តិ៍ស្ទឹងមានជ័យទី១ ដើម្បីរង់ចាំសមត្ថកិច្ចប៉ុស្តិ៍ជ្រោយចង្វារមកទទួលយកទៅចាត់ការបន្តព្រោះជាម្ចាស់ករណី។
ប្រភពពីប្រជាពលរដ្ឋរស់នៅកន្លែងកើតហេតុបានប្រាប់អោយដឹងថា ពួកគាត់មានការភ្ញាក់ផ្អើលជាខ្លាំងខណៈ មានសមត្ថកិច្ចមកឃាត់ស្ត្រីចំណាស់នោះ ។ ពួកគាត់មិនច្បាស់ថា ស្ត្រីនោះរកស៊ីអ្វីនោះទេគ្រាន់តែ ដឹងថា ស្ត្រីនោះមានលុយចាយពេញៗដៃ ៕ ដោយ ៖ រដ្ឋា
![](https://kohsantepheapdaily.com.kh/wp-content/uploads/2024/05/af27d484d548920a1665e1457d34651a.jpg)
ចែករំលែកព័តមាននេះ