ទីក្រុងបាងកក៖ នាយករដ្ឋមន្ត្រីថៃ លោកសេដ្ឋា ថាក់វិស៊ីន ប្រកាសថាលោកនឹងពិភាក្សាជាមួយក្រុមអ្នកច្បាប់ដើម្បីត្រៀមផ្ដល់សក្ខីកម្មនៅក្នុងតុលាការធម្មនុញ្ញ។ លោកថ្លែងដូច្នេះបន្ទាប់ពីតុលាការទទួលយកញត្តិរបស់សមាជិកព្រឹទ្ធសភា៤០រូបដែលស្នើសុំដកតំណែងរបស់លោកពីបទតែងតាំងសមាជិកគណៈរដ្ឋមន្ត្រីមួយរូបគឺលោកពិចិត្រដែលពួកគេយល់ថាគ្មានគុណវុឌ្ឍិគ្រប់គ្រាន់។ លោកពិចិត្របានលាលែងពីតំណែងកាលពីថ្ងៃអង្គារដើម្បីកុំឱ្យលោកសេដ្ឋាមានបញ្ហាដោយសារខ្លួន។
![](https://kohsantepheapdaily.com.kh/wp-content/uploads/2024/05/b14f7ab982e5b8295febe1c27358dce1-1.jpg)
លោកសេដ្ឋាបង្ហើបឱ្យដឹងអំពីគម្រោងតតាំងក្ដីនៅក្នុងតុលាការបន្ទាប់ពីលោកជួបជាមួយថ្នាក់ដឹកនាំធុរកិច្ចជនជាតិជប៉ុននៅទីក្រុងតូក្យូកាលពីល្ងាចថ្ងៃព្រហស្បតិ៍។ លោកថ្លែងថាបន្ទាប់ពីបញ្ចប់កិច្ចការនៅថ្ងៃព្រហស្បតិ៍រួច លោកនឹងទាក់ទងទៅក្រុមអ្នកច្បាប់នៅប្រទេសថៃដើម្បីពិគ្រោះគ្នាថាតើត្រូវរៀបចំសារណាបែបណាដើម្បីឡើងការពារខ្លួននៅក្នុងតុលាការធម្មនុញ្ញ។
![](https://kohsantepheapdaily.com.kh/wp-content/uploads/2024/05/9907744152360145aa4a7c0f17b9a4c9-1.jpg)
លោកយល់ថាវាជារឿងធម្មតាដែលអ្នកនយោបាយប្រឈមនឹងការពិនិត្យពិច័យផ្នែកផ្លូវច្បាប់។ កាលណាសភា ឬតុលាការមានចម្ងល់អ្វី១ត្រូវចោទសួរ រដ្ឋាភិបាលត្រូវតែឆ្លើយបំភ្លឺ។ ប៉ុន្តែមែនទែនទៅលើកនេះមិនមែនពាក់ព័ន្ធនឹងការហៅទៅសួរធម្មតាដូចនៅក្នុងសភាទេ។ ប៉ុន្តែពាក់ព័ន្ធនឹងតំណែងរបស់លោកដែលអាចនឹងរបូតពីដៃ ឬអាចនឹងរក្សាគង់វង្សជាបន្តទៀត។
![](https://kohsantepheapdaily.com.kh/wp-content/uploads/2024/05/cbe0c635e3630c82177cbe30b4130c11-1.jpg)
ក៏ប៉ុន្តែ លោកសេដ្ឋាមានទំនុកចិត្តថាលោកអាចផ្ដល់សេចក្ដីពន្យល់អំពីគោលជំហររបស់លោកតបទៅនឹងការដាក់ញត្តិតវ៉ានេះ។ ចំពោះសំណួរថាតើលោកមានមន្ទិលសង្ស័យដែរឬទេថាសមាជិកព្រឹទ្ធសភាទាំងនោះមានបំណងនយោបាយអ្វីនៅពីក្រោយរឿងនេះ? លោកយល់ថាពួកគេគ្រាន់តែចង់ធ្វើការងារជាសមាជិកសភាចាំផ្ទះផុតអាណត្តិតាំងពីថ្ងៃទី១១ ខែឧសភា។
![](https://kohsantepheapdaily.com.kh/wp-content/uploads/2024/05/74d29bc7eb7643f57871aa075f0b4550-1.jpg)
លោកមិនចង់កាច់ចូលទៅជ្រុងនយោបាយទេ ហើយក៏មិនចាត់ទុកថានេះជាការកាច់កុងគ្នាផ្នែកនយោបាយដែរ។ លោកជឿជាក់ថាមនុស្សគ្រប់រូបទាំងគេទាំងយើងចង់ឱ្យប្រទេសជាតិរីកចម្រើន ហើយចង់ឃើញរដ្ឋាភិបាលដឹកនាំជាតិបានល្អ។ គួរកត់សម្គាល់ថានៅក្នុងញត្តិនេះ សមាជិកព្រឹទ្ធសភាទាំង៤០រូបស្នើសុំឱ្យតុលាការធម្មនុញ្ញពិនិត្យមើលទៅលើទិដ្ឋាភាពច្បាប់ដើម្បីកំណត់ថាតើការដែលលោកសេដ្ឋាតែងតាំងលោកពិចិត្រជារដ្ឋមន្ត្រីទីស្ដីការគណៈរដ្ឋមន្ត្រីនោះជាការខុសច្បាប់ដែរឬទេ។
![](https://kohsantepheapdaily.com.kh/wp-content/uploads/2024/05/6b514518bfcf5dcdab542a9a505a03de.jpg)
តបតាមសំណើនេះ កាលពីថ្ងៃព្រហស្បតិ៍ ចៅក្រមបានបោះឆ្នោតដោយសំឡេងគាំទ្រ៥ទល់នឹង៤ដើម្បីព្យួរតំណែងលោកសេដ្ឋា និងរង់ចាំសេចក្ដីសម្រេចជាស្ថាពរ។ តុលាការទុកពេលឱ្យលោកសេដ្ឋា១៥ថ្ងៃដើម្បីរៀបចំសារណា និងឡើងការពារខ្លួន។ បើតុលាការរកឃើញថាលោកសេដ្ឋាពិតជាមានកំហុសដូចការដាក់ញត្តិស្ដីបន្ទោសនេះមែន មានន័យថាតំណែងនាយករដ្ឋមន្ត្រីរបស់លោកនឹងត្រូវអស់ត្រឹមហ្នឹងហើយ។ នៅក្នុងលក្ខខណ្ឌនៃការតែងតាំងគណៈរដ្ឋមន្ត្រីមានមាត្រាមួយចែងថាបេក្ខជននីមួយៗត្រូវតែមានបូរណភាពបុគ្គលគ្រប់គ្រាន់។ អ្នកដែលគ្មានគុណវុឌ្ឍិគ្រប់គ្រាន់មិនអាចឈរឈ្មោះបានឡើយ។
![](https://kohsantepheapdaily.com.kh/wp-content/uploads/2024/05/d8b62a50dcb051577d1bddd936ba3bda-1.jpg)
លោកពិចិត្រមានអាជីពជាមេធាវីឡើងការពារក្ដីឱ្យលោកស្រីយីងឡាក់ និងលោកថាក់ស៊ីន។ លោកធ្លាប់ជាប់ពន្ធនាគារ៦ខែកាលពីឆ្នាំ២០០៨ពីបទប៉ុនប៉ងផ្ដល់ប្រាក់សំណូក២លានបាត ឬស្មើនឹងជាង៥ម៉ឺនដុល្លារទៅឱ្យមន្ត្រីតុលាការ។ កាលនោះ លោកកំពុងការពារក្ដីឱ្យលោកថាក់ស៊ីននៅក្នុងសំណុំរឿងទំនាស់ផលប្រយោជន៍។ លោកពិចិត្រទើបតែកាន់តំណែងនេះបាន២៣ថ្ងៃប៉ុណ្ណោះក៏បង្ខំចិត្តលាលែងពីតំណែងដើម្បីកុំឱ្យលោកសេដ្ឋាជំពាក់ជំពិន និងអស់តំណែងដោយសារតែលោក៕
![](https://kohsantepheapdaily.com.kh/wp-content/uploads/2024/05/40e5f767707f14daa64c0b34e7925e50-1.jpg)
![](https://kohsantepheapdaily.com.kh/wp-content/uploads/2024/05/163bc9e5bceda3354e5427217c14a7dd-1.jpg)
![](https://kohsantepheapdaily.com.kh/wp-content/uploads/2024/05/d63e8652114742f9135fa7b074c0975c-1.jpg)
ចែករំលែកព័តមាននេះ