សម្តេចតេជោ ហ៊ុន សែន ប្រធានព្រឹទ្ធសភាកម្ពុជា នៅព្រឹកថ្ងៃទី២២ ខែឧសភា ឆ្នាំ២០២៤ បានដាក់សំណួរមួយជាសាធារណៈ ពាក់ព័ន្ធនឹងបញ្ហាយុត្តិធម៌នៅលើពិភពលោក ។
ថ្លែងនៅក្នុងពិធីបិទសន្និសីទលើកទី១ស្តីពី «អនាគតកម្ពុជាគ្មានអំពើប្រល័យពូជសាសន៍» សម្តេចតេជោ បានដាក់សំណួរមួយជាចំហថា តុលាការយុត្តិធម៌អន្តរជាតិបានចេញដីកាចាប់ខ្លួន លោក វ្លាឌីមៀ ពូទីន មេដឹកនាំរុស្ស៊ីហើយ ប៉ុន្តែតើអាចចេញដីការចាប់ខ្លួន មេដឹកនាំ អ៊ីស្រាអែល និងហាម៉ាស ពាក់ព័ន្ធនឹងឧក្រិដ្ឋកម្មនៅហ្គាហ្សាបានឫអត់?
សម្តេចតេជោ ហ៊ុន សែន បានបញ្ចេញទស្សនៈថា សម្តេចកំពុងតែរង់ចាំមើល ពាក់ព័ន្ធនឹង ស្ថានការណ៍នៅទីនោះ ។ ពាក់ព័ន្ធនឹងបញ្ហានៅមជ្ឈឹមបូពា កម្ពុជាបានគាំទ្រដំណោះស្រាយរបស់អង្គការសហប្រជាជាតិក្នុងការគាំទ្រសមាជិកភាពដល់ប៉ាឡេស្ទីន ជារដ្ឋសង្កេតការណ៍មិនមែនសមាជិក។
ប្រទេសជាសមាជិករបស់អង្គការសហប្រជាជាតិចំនួន១៤៣ ដោយរួមទាំងកម្ពុជាបានបង្ហាញ ជំហរក្នុងការគាំទ្រឱ្យប៉ាឡេស្ទីនក្លាយជាសមាជិកពេញសិទ្ធិរបស់អង្គការសហប្រជាជាតិ ។ ដោយឡែក ក្នុងនោះ មានប្រទេសចំនួន២៥បានបោះឆ្នោតអនុប្បវាទ ខណៈប្រទេសចំនួន ៩ផ្សេងទៀតរួមមានឆេក ហុងគ្រី អាហ្សង់ទីន មីក្រូនេស៊ី ណាអ៊ូរូ ប៉ាលូ ប៉ាពួញូហ្គីណេ អ៊ីស្រាអែល និងសហរដ្ឋអាមេរិក បានបោះឆ្នោតប្រឆាំងនឹងការចូលជាសមាជិកពេញសិទ្ធិ ។
ចែករំលែកព័តមាននេះ