តើអតីតនាយរដ្ឋមន្ត្រីសម្តេច តេជោ ហ៊ុន សែន មានយុទ្ធសាស្ត្រដឹកនាំរបៀបណា ទើបអាចក្លាយជានាយករដ្ឋមន្ត្រីដែលកាន់តំណែងនាយករដ្ឋមន្ត្រីយូរជាងគេ មុនពេលចុះចេញពីមុខតំណែង?
វីដេអូឯកសាររយ:ពេល៤៨ម៉ោង ត្រូវបានថតដើម្បីទម្លាយចេញពីរបៀបដឹកនាំនយោបាយ និង ប្រទេសរបស់បុរសខ្លាំងកម្ពុជា។
សម្តេចតេជោ ហ៊ុន សែន ប្រធានព្រឹទ្ធសភាកម្ពុជាបានប្រកាសជាសាធារណៈនៅព្រឹកថ្ងៃទី២២ ខែឧសភា ឆ្នាំ២០២៤ ថា វីដេអូឯកសារដែលមានរយៈពេល៤៨ម៉ោងត្រូវបានបញ្ចប់ ហើយក៏បានកំពុងតែចម្លងចូលទៅក្នុងសៀវភៅ ដើម្បីទុកជាបទពិសោធន៍សម្រាប់សាធារណៈ នៅពេលអនាគត ។
ថ្លែងនៅពេលបិទសន្និសីទលើកទី១ ស្តីពី «អនាគតកម្ពុជាគ្មានអំពើប្រល័យពូជសាសន៍» សម្តេចតេជោ ហ៊ុន សែន បានប្រកាសថា ក្រៅពីវីដេអូឯកសារនេះសម្តេចក៏នឹង ត្រៀមថត វីដេអូ និងឯកសារជាច្រើនទៀតដើម្បីទុកជាឯកសារសម្រាប់ បម្រើការស្រាវជ្រាវរបស់អ្នកជំនាន់ក្រោយ ។
សម្តេចតេជោបានបញ្ជាក់ថា «វីដេអូដែលខ្ញុំនិយាយអំពីភាពជាអ្នកដឹកនាំរបស់ខ្ញុំដែលមាន រយៈពេល៤៨ម៉ោងបានថតរួចរាល់ ប៉ុន្តែឯកសារនោះខ្ញុំនឹងបញ្ចេញ១០ឆ្នាំទៀត» ។
នៅក្នុងពេលជាមួយគ្នានោះ សម្តេចតេជោក៏បានជូនយោបល់ដល់ក្រសួងយុត្តិធម៌ឲ្យរៀបចំច្បាប់សម្រាប់ដាក់ទោសដល់ជនណាដែលនិយាយខុសពីថតភាពជាក់ស្តែងនៃរបបប្រល័យពូជសាសន៍ប៉ុលពតផងដែរ ។
សម្តេចតេជោ ហ៊ុន សែន ជាប្រមុខរដ្ឋាភិបាលដែលកាន់អំណាចយូរជាងគេក្នុងប្រវត្តិសាស្ត្រ កម្ពុជាពីឆ្នាំ១៩៨៥ ដល់ឆ្នាំ២០២៣ ហើយបានក្លាយជាប្រធានព្រឹទ្ធសភាចាប់ពីខែមេសា ឆ្នាំ ២០២៤ មកដល់ពេលបច្ចុប្បន្ន ។
ចែករំលែកព័តមាននេះ