ខ្យល់ពុលធ្ងន់ធ្ងរនាភាគខាងជើង ប្រទេសថៃ នាំឱ្យប្រជាជនក្នុងតំបន់កើតមានជំងឺផ្លូវដង្ហើមកាន់តែច្រើន តែក្នុងចំណោមនោះ ស្ត្រីម្នាក់ត្រូវបានគេរកឃើញដង្កូវរាប់រយក្បាលក្នុងរន្ធច្រមុះទៅវិញ ។
ស្ត្រីជនជាតិថៃម្នាក់ជាប្រជាពលរដ្ឋរស់នៅខេត្តឈៀងម៉ៃ ភាគខាងជើងប្រទេសថៃ ត្រូវបានគេបញ្ជូនទៅកាន់មន្ទីរពេទ្យជាបន្ទាន់ បន្ទាប់ពីប្រទះឃើញសត្វដង្កូវជាច្រើនក្បាលវារចេញពីច្រមុះរបស់ខ្លួន ហើយក្រោយមក ត្រូវបានវេជ្ជបណ្ឌិតជំនាញឆ្លុះឃើញថា មានហ្វូងដង្កូវតូចៗរាប់រយក្បាលកំពុងរស់នៅក្នុងរន្ធច្រមុះរបស់គាត់ ។
មុនពេលរកឃើញហ្វូងដង្កូវដ៏គួរឱ្យខ្ទើមរអើមទាំងនេះ ស្ត្រីវ័យ៥៩ឆ្នាំខាងលើ តែងតែត្អូញត្អែរពីការតឹងច្រមុះ និងការឈឺចាប់លើផ្ទៃមុខអស់រយៈពេលជាងមួយសប្តាហ៍មកហើយ តែដំបូងឡើយ គាត់គិតថា ដោយសារតែបញ្ហាផ្លូវដង្ហើម ព្រោះតែបរិយាកាសអាប់អួរនៃកម្រិត PM 2.5 ហក់ឡើងខ្ពស់ហួសប្រមាណនៅក្នុងខេត្តដែលគាត់រស់នៅ ។ ប៉ុន្តែអ្វីដែលធ្វើឱ្យគាត់ និងក្រុមគ្រួសារភ័យស្លន់ស្លោនោះ គឺបន្ទាប់ពីគាត់ហូរឈាមច្រមុះ ហើយពិនិត្យឃើញក្នុងឈាមនោះមានសត្វដង្កូវល្អិតៗជាច្រើនក្បាល ។
វេជ្ជបណ្ឌិត Pateemon Thanachaikhan ជំនាញផ្នែករោគច្រមុះនៃមន្ទីរពេទ្យ មន្ទីរពេទ្យណាខនភីង ក្នុងខេត្តឈៀងម៉ៃបានអះអាងថា ការឆ្លុះអេកូបានរកឃើញដង្កូវច្រើនជាង ១០០ នៅក្នុងរន្ធច្រមុះទាំងពីរ ហើយពួកវាត្រូវបានសម្លាប់ មុនពេលដែល ត្រូវបានយកចេញអស់ពីរន្ធច្រមុះរបស់អ្នកជំងឺ។ ឥឡូវនេះ ស្ថានភាពរបស់ស្ត្រីរូបនោះ មានសុវត្ថិភាព និងធូរស្បើយហើយ។ វេជ្ជបណ្ឌិត Pateemon បានឱ្យដឹងថា ប្រសិនបើពន្យារពេលយូរជាងនេះតែបន្តិច ដង្កូវទាំងនោះអាចឆ្លងទៅដល់សេរីរាង្គជិតៗ ដូចជាភ្នែក ឬខួរក្បាល បណ្តាលឱ្យពិការ និងអាចស្លាប់បាន។
វេជ្ជបណ្ឌិតជំនាញផ្នែកផ្លូវដង្ហើមបានផ្ញើសារក្រើនរំលែកទៅដល់ប្រជាពលរដ្ឋរស់នៅនៅក្នុងតំបន់ក្នុងលក្ខខណ្ឌនៃការបំពុលខ្យល់ថា ប្រជាជននៅតំបន់ភាគខាងជើងបានកើតមានរោគសញ្ញាផ្លូវដង្ហើមកាន់តែច្រើន ជាពិសេស បញ្ហារលាកច្រមុះ និងអាឡែហ្ស៊ី ហើយប្រសិនបើមិនត្រូវបានព្យាបាលទាន់ពេលទេនោះ វាអាចនឹងវិវត្តន៍ទៅជាធ្ងន់ធ្ងរ ។ ជាមួយគ្នានោះ ចំពោះអ្នកជំងឺដែលមានជំងឺប្រចាំកាយស្រាប់ មនុស្សចាស់ កុមារ អ្នកដែលខ្វះអនាម័យ ឬ ក្រុមដែលមិនមានលទ្ធភាពទទួលបានសេវាសុខភាពសាធារណៈនោះ ជំងឺនេះកាន់តែមានសភាពធ្ងន់ធ្ងរ។
ជាក់ស្តែង ក្នុងករណីនេះដែលឆ្លងមេរោគហើយកើតមានហ្វូងដង្កូវរស់នៅក្នុងច្រមុះនោះ វាអាចរាលដាលដល់ភ្នែក ឬ ខួរក្បាល បណ្តាលឱ្យពិការ ឬស្លាប់។ ដូច្នេះហើយ ប្រសិនបើអ្នកមានរោគសញ្ញាមិនប្រក្រតីនៅក្នុងប្រព័ន្ធផ្លូវដង្ហើម អ្នកគួរតែទៅជួបគ្រូពេទ្យដើម្បីព្យាបាលទាន់ពេល ៕
ចែករំលែកព័តមាននេះ