ការទាក់ទាញវិនិយោគិនបរទេស ជាពិសេសជប៉ុនឲ្យមកដាក់ទុនវិនិយោគនៅកម្ពុជា នៅតែជារបៀបវារៈដ៏សំខាន់នៃបេសកម្មការទូតសេដ្ឋកិច្ច របស់រាជរដ្ឋាភិបាលកម្ពុជា ដោយនៅពេលនេះ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជាកំពុង តែដើរទាក់ម៉ូយ។
នៅក្នុងសិក្ខាសាលាស្តីពីការវិនិយោគនៅកម្ពុជា ដើម្បីផ្សព្វផ្សាយអំពីសក្តានុពល និងកាលានុវត្តភាពវិនិយោគនៅកម្ពុជា ទៅកាន់សហគ្រាសរបស់ជប៉ុន នៅថ្ងៃទី៨ ខែឧសភា ឆ្នាំ២០២៤ លោក ស៊ុន ចាន់ថុល បានលើកឡើងអំពីស្ថិរភាពនយោបាយ, ស្ថានភាពម៉ាក្រូ សេដ្ឋកិច្ចដែលមានលំនឹងវិជ្ជមាន, កម្លាំងពលកម្មវ័យក្មេងប្រកបដោយថាមវន្ត, ការគាំទ្រដល់ការរីកលូតលាស់នៃធុរកិច្ច, របបវិនិយោគដែលមានភាពទាក់ទាញ និងអនុគ្រោះ និងហេដ្ឋារចនាសម្ព័ន្ធអន្តរមធ្យោបាយដែលបាន និងកំពុងអភិវឌ្ឍឱ្យកាន់តែមានភាពតភ្ជាប់ និងប្រទាក់ក្រឡា ។
លោកឧបនាយករដ្ឋមន្ត្រីបានបង្ហាញនូវសុទិដ្ឋិនិយមយ៉ាងមុតមាំថា វិនិយោគិន និងធុរជន ដែលបានអញ្ជើញចូលរួមនាពេលនេះនឹងអញ្ជើញមកសិក្សាស្វែងយល់ដោយផ្ទាល់នៅកម្ពុជា ក៏ដូចជា ពាំនាំនូវបច្ចុប្បន្នភាពនៃបរិយាកាសវិនិយោគនៅកម្ពុជាទៅកាន់សហគមន៍ធុរកិច្ចជប៉ុនឱ្យកាន់តែទូលំទូលាយបន្ថែមមួយកម្រិតទៀត ។
ក្រៅពីកម្មវិធីដែលមានអ្នកចូលរួមមកពីតំណាងស្ថានតំណាងបរទេសប្រចាំប្រទេសជប៉ុន ក្រសួងសេដ្ឋកិច្ច ពាណិជ្ជកម្ម និងឧស្សាហកម្មនៃប្រទេសជប៉ុន សម្ព័ន្ធសភាមិត្តភាពកម្ពុជា-ជប៉ុន សមាគមជប៉ុន-កម្ពុជា និងវិស័យឯកជនសរុបប្រមាណ១៥០រូបនៅក្នុងដំណើរបេសកម្ម ពីថ្ងៃទី ៧ដល់ទី៩ ខែឧសភា លោក ស៊ុន ចាន់ថុល ក៏បានជួបជាមួយនឹងអ្នកជំនាញ និងវិនិយោគិនជប៉ុនមួយចំនួនទៀតផងដែរ។
មកដល់ពេលនេះ ទោះបីជាមិនមែនជាអ្នកវិនិយោគទុនបរទេសលេខ១ សម្រាប់កម្ពុជាក៏ពិតមែន ប៉ុន្តែវិនិយោគិនជប៉ុនក៏ជាប់លំដាប់កំពូលនៃវិនិយោគិនបរទេសធំៗទាំង១០នៅកម្ពុជា ផងដែរ ។ ក្រុមហ៊ុនវិនិយោគិនជប៉ុនធំៗ ដែលបានមកបណ្តាក់ទុននៅកម្ពុជាមានដូចជា ក្រុមហ៊ុនគ្រប់គ្រងផ្សារទំនើបអេអន ក្រុមហ៊ុនមីនីបៀ ក្រុមហ៊ុនដំឡើងរថយន្ត តូយូតា ដែលទើបសម្ភោធកាលពីពេលថ្មីៗកន្លងទៅនេះ នៅមានក្រុមហ៊ុនដែលបណ្តាក់ទុនលើវិស័យ ហិរញ្ញវត្ថុនិងធានារ៉ាប់រង និងមន្ទីរពេទ្យផងដែរ ៕
ចែករំលែកព័តមាននេះ