ទីក្រុងប៉េកាំង៖ នេះជាលើកដំបូងដែលប្រទេសចិនអនុម័តជាផ្លូវការឱ្យប្រើប្រាស់គ្រាប់ពូជស្រូវសាលីដែលកែច្នៃតាមបច្ចេកវិទ្យាកែសម្រួលកោសិការបន្តពូជ ឬហ្សែន (gene editing)។ ចំណាត់ការនេះធ្វើឡើងទន្ទឹមនឹងការរំកិលខ្លួនដោយសន្សឹមៗ និងដោយប្រុងប្រយ័ត្នទៅរកការដាំដំណាំអាជីវកម្មដោយប្រើគ្រាប់ពូជកែច្នៃតាមបច្ចេកវិទ្យាបង្កើតហ្សែនថ្មី ឬជីអឹម (GM: genetic…
ទីក្រុងប៉េកាំង៖ នេះជាលើកដំបូងដែលប្រទេសចិនអនុម័តជាផ្លូវការឱ្យប្រើប្រាស់គ្រាប់ពូជស្រូវសាលីដែលកែច្នៃតាមបច្ចេកវិទ្យាកែសម្រួលកោសិការបន្តពូជ ឬហ្សែន (gene editing)។ ចំណាត់ការនេះធ្វើឡើងទន្ទឹមនឹងការរំកិលខ្លួនដោយសន្សឹមៗ និងដោយប្រុងប្រយ័ត្នទៅរកការដាំដំណាំអាជីវកម្មដោយប្រើគ្រាប់ពូជកែច្នៃតាមបច្ចេកវិទ្យាបង្កើតហ្សែនថ្មី ឬជីអឹម (GM: genetic Modified)។ ប៉ុន្តែប្រទេសចិនក៏ប្រយ័ត្នប្រយែងសម្បើមណាស់ដែរនៅក្នុងការអនុញ្ញាតឱ្យដាំដំណាំតាមបច្ចេកវិទ្យាជីអឹម។
កាលពីពេលកន្លងមក ប្រទេសចិនអនុញ្ញាតឱ្យប្រើគ្រាប់ពូជពោត និងសណ្ដែកសៀងតាមបច្ចេកវិទ្យាជីអឹមព្រោះវាផ្ដល់ទិន្នផលខ្ពស់, អាចទប់ទល់នឹងសត្វល្អិតចង្រៃ និងថ្នាំកម្ចាត់ស្មៅ ហើយអាចជួយធានាសន្តិសុខស្បៀងអាហាររបស់ប្រទេសជាតិកាន់តែល្អប្រសើរ។ ប៉ុន្តែការអនុវត្តជាក់ស្ដែងនៅក្នុងវិស័យនេះត្រូវតែធ្វើឡើងដោយសន្សឹមៗ និងដោយប្រុងប្រយ័ត្នព្រោះគេនៅតែបារម្ភអំពីផលប៉ះពាល់ចំពោះសុខភាព និងផលប៉ះពាល់ចំពោះបរិស្ថានដែលយើងមើលមិនឃើញនាពេលអនាគត។
បច្ចេកវិទ្យាជីអឹមជាការប្រើប្រាស់កោសិកាតំណពូជ (ហ្សែន) ផ្សេងយកមកផ្សំបង្កើតជាគ្រាប់ពូជថ្មី។ ផ្ទុយទៅវិញ បច្ចេកវិទ្យាកែសម្រួលហ្សែន (gene editing) គឺជាការកែសម្រួលកោសិកាតំណពូជរបស់រុក្ខជាតិដដែលដើម្បីធ្វើឱ្យរុក្ខជាតិរីកលូតលាស់បានឆាប់រហ័ស និងចេញផ្លែផ្កាកាន់តែច្រើន។ អ្នកវិទ្យាសាស្ត្ររកឃើញថាការកែសម្រួលហ្សែនមានសុវត្ថិភាពជាងជីអឹម។
ប្រទេសចិនច្រើននាំចូលទំនិញកសិផលជីអឹមដូចជាពោត និងសណ្ដែកសៀងមិនមែនសម្រាប់ឱ្យមនុស្សបរិភោគទេ ប៉ុន្តែសម្រាប់សត្វស៊ីជាចំណីអាហារ។ ចំពោះដំណាំ និងសាច់សត្វសម្រាប់មនុស្សបរិភោគ ប្រទេសចិនមិនដែលប្រើប្រាស់បច្ចេកវិទ្យាជីអឹមទាល់តែសោះ។ សូម្បីតែឥឡូវនេះក៏ដោយ ក៏ជនជាតិចិនភាគច្រើននៅតែមិនទាន់អស់កង្វល់នៅឡើយទេ ហើយក៏មិនទាន់ទុកចិត្តនៅឡើយដែរចំពោះដំណាំជីអឹមព្រោះមិនដឹងថាវាមានសុវត្ថិភាពកម្រិតណាចំពោះសុខភាពអ្នកបរិភោគ។
ដូច្នេះ ការដែលរដ្ឋាភិបាលអនុម័តឱ្យប្រើប្រាស់បច្ចេកវិទ្យាកែសម្រួលហ្សែនដើម្បីដាំស្រូវសាលីដែលទប់ទល់នឹងជំងឺរុក្ខជាតិជាច្រើនប្រភេទត្រូវគេសម្លឹងមើលឃើញថាជាគោលចារឹកដ៏សំខាន់មួយ។ ដំណាំស្រូវសាលីជាគ្រឿងផ្សំដ៏សំខាន់សម្រាប់ធ្វើប៉ាស់ស្តា(pasta), មី, គុយទាវ និងនំប៉័ង ហើយត្រូវគេគិតថាស្រូវសាលីជាដំណាំដ៏សំខាន់បំផុតនៅប្រទេសចិនក្នុងនាមចិនជាប្រទេសប្រមូលផលស្រូវសាលីច្រើនជាងគេ និងក៏ជាប្រទេសប្រើប្រាស់ស្រូវសាលីច្រើនជាងគេនៅលើពិភពលោកផងដែរ។
អ្នកជំនាញខាងផលិតគ្រាប់ពូជរុក្ខជាតិយល់ថាការអនុម័តនេះជាការបោះជំហានដ៏សំខាន់មួយ។ សង្ឃឹមថាទៅថ្ងៃមុខ ប្រទេសចិនអាចនឹងអនុម័តឱ្យប្រើប្រាស់បច្ចេកវិទ្យាសិប្បនិម្មិតនេះដើម្បីបង្កើតគ្រាប់ពូជដំណាំដទៃទៀតបម្រើឱ្យសន្តិសុខស្បៀង។ ក្រៅពីគ្រាប់ពូជតាមបច្ចេកវិទ្យាកែសម្រួលហ្សែន គេរំពឹងថានៅឆ្នាំនេះ ប្រទេសចិនក៏នឹងអនុម័តឱ្យប្រើប្រាស់គ្រាប់ពូជតាមបច្ចេកវិទ្យាជីអឹមដើម្បីដាំដំណាំណាខ្លះមានសុវត្ថិភាពសម្រាប់មនុស្សបរិភោគ។ នេះបើតាមការផ្សាយរបស់សារព័ត៌មានរដ្ឋ។
កាលពីថ្ងៃពុធ ក្រសួងកសិកម្មចិនក៏អនុម័តឱ្យប្រើប្រាស់គ្រាប់ពូជពោត២ប្រភេទ។ ពោត១ប្រភេទប្រើបច្ចេកវិទ្យាជីអឹមអាចទប់ទល់នឹងថ្នាំកម្ចាត់ស្មៅ និងសត្វល្អិតចង្រៃ និងពោត១ប្រភេទទៀតប្រើបច្ចេកវិទ្យាកែសម្រួលហ្សែន (gene editing) អាចផ្ដល់ទិន្នផលខ្ពស់ជាងពោតដាំតាមធម្មជាតិ។ ក្រសួងបន្តទៀតថាខ្លួនបានចេញវិញ្ញាបនប័ត្រទទួលស្គាល់សុវត្ថិភាពនៃបច្ចេកវិទ្យាជីអឹមរយៈពេល៥ឆ្នាំគិតចាប់ពីថ្ងៃទី៥ ខែឧសភាតទៅ។ នេះបើតាមឯកសារដែលផ្សព្វផ្សាយដោយក្រសួងកសិកម្ម។
នៅក្នុង១ឆ្នាំៗ ប្រទេសចិននាំចូលគ្រាប់ធញ្ញជាតិពីក្រៅប្រទេសរហូតដល់ជាង១រយលានតោន។ ជាពិសេសនាំចូលសណ្ដែកសៀង និងពោតច្រើនជាងគេនៅលើពិភពលោក។ ហេតុនេះចិនចង់រកវិធីដាំដំណាំទាំងនេះដោយខ្លួនឯងដោយប្រើប្រាស់គ្រាប់ពូជជីអឹម និងកែសម្រួលហ្សែន (GM & Gene Editing) ដែលផ្ដល់ទិន្នផលខ្ពស់ដើម្បីកាត់បន្ថយការនាំចូលជាបណ្ដើរៗ៕
ចែករំលែកព័តមាននេះ