ក្រសួងវប្បធម៌ និងវិចិត្រសិល្បៈបានអះអាងថា ខ្លួននឹងដឹកជញ្ជូនប្រតិមាវិចិត្រព្រះនារាយណ៍ផ្ទុំពីសំរឹទ្ធទៅបារាំង ដើម្បីធ្វើការវិភាគស្រាវជ្រាវជួសជុល និងអភិរក្ស។
ស្ថាប័នជំនាញនេះបានអះអាងថា តាមជំនឿ និងទំនៀមទម្លាប់ នាព្រឹកថ្ងៃទី៧ ខែឧសភា ឆ្នាំ២០២៤ នៅសារមន្ទីរជាតិកម្ពុជា ក្រសួងបានរៀបចំពិធីនិមន្តព្រះសង្ឃ ប្រោះព្រំ សុំសេចក្តីសុខនាអំឡុងពេលនៃការវេចខ្ចប់ និងដឹកជញ្ជូនប្រតិមាវិចិត្រព្រះនារាយណ៍ផ្ទុំពីសំរឹទ្ធនេះ ។
ពីធិនេះប្រព្រឹត្តទៅក្រោមអធិបតីភាព លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ តំណាង ស្ថានទូតបារាំងប្រចាំនៅកម្ពុជា ក៏ដូចជាតំណាងសារមន្ទីជាតិ សិល្បអាស៊ីហ្គីមេ និងអ្នកជំនាញជាច្រើនរូប ។
ប្រភពដដែលបានបញ្ជាក់ថា ប្រតិមាវិចិត្រព្រះនារាយណ៍ផ្ទុំពីសំរឹទ្ធនេះ គឺមានប្រភពមកពីប្រាសាទមេបុណ្យ ហើយរៀបចំនេះ គឺដើម្បីបញ្ជូនយកទៅជួសជុល អភិរក្ស និងវិភាគស្រាវជ្រាវនៅបារាំង ។
មកដល់ពេលនេះបារាំងដែលធ្លាប់ជាអាណាព្យាបាលកម្ពុជា ពីឆ្នាំ១៨៦៣ ដល់ឆ្នាំ១៩៥៣ គឺជាប្រទេសដែលមានមូលដ្ឋានវប្បធម៌ និងអរិយធម៌ កម្ពុជាច្រើនបំផុតមួយនៅលើពិភពលោក ។
នៅក្នុងអំឡុងពេលនោះ មានអ្នកប្រាជ្ញបារាំងជាច្រើនរូប ដែលបានមកធ្វើការសិក្សារអំពីប្រវត្តិសាស្ត្រ សាសនា ប្រពៃណី វប្បធម៌ ភាសា អរិយធម៌ ជាពិសេស គឺសំណង់ស្ថាបត្យកម្ម ខ្មែរជាច្រើន ៕
ចែករំលែកព័តមាននេះ