ប្រទេសចិន ៖ ក្រុមហ៊ុនចិន ByteDance ដែលជាក្រុមហ៊ុនមេកម្មវិធីទីកតុក TikTok បានអះអាងថា ខ្លួននឹងមិនលក់កម្មវិធី TikTok នោះទេ ដែលប្រកាសនេះកើតឡើង បន្ទាប់ពីសហរដ្ឋអាម៉េរិកបានអនុម័តច្បាប់ថ្មី ដើម្បីបង្ខំក្រុមហ៊ុនឱ្យលក់កម្មវិធីវីដេអូកម្សាន្តដ៏ពេញនិយមនៅលើពិភពលោកមួយនេះ ឬត្រូវបិទកម្មវិធីនេះចោលនៅសហរដ្ឋអាម៉េរិក។ គួររំលឹកថា TikTok នឹង​ត្រូវ​បិទ​នៅ​អា​មេ​រិ​ក បើ​នៅ​តែ​ស្ថិត​ក្រោម​ការ​គ្រប់គ្រង​ដោយ​ក្រុមហ៊ុន​ចិន

យោងតាមប្រភពពី BBC ចេញផ្សាយនៅរសៀលថ្ងៃទី២៦ ខែមេសា ឆ្នាំ២០២៤ បានឱ្យដឹងថា ក្រុមហ៊ុន ByteDance បានបង្ហោះសារលើកម្មវិធី Toutiao ដែលជាវេទិកាផ្សព្វផ្សាយសង្គមដែលខ្លួនគ្រប់គ្រងថា ក្រុមហ៊ុន ByteDance គ្មានគម្រោងលក់អាជីវកម្ម TikTok នោះទេ ខណៈភាគីកម្មវិធី TikTok ផ្ទាល់ មិនទាន់បានឆ្លើយតបភ្លាមៗ ចំពោះសំណើសុំការអត្ថាធិប្បាយពីសារព័ត៌មាន BBC នៅឡើយទេ។

​សូមបញ្ជាក់​ថា កាលពីថ្ងៃទី២៤ ខែមេសា កន្លងទៅ ប្រធានាធិបតីសហរដ្ឋអាអាម៉េរិក លោក ចូ បៃឌិន (Joe Biden) បានចុះហត្ថលេខាលើច្បាប់ថ្មីមួយ ដែលនឹងបិទកម្មវិធី TikTok នៅសហរដ្ឋអាម៉េរិក ប្រសិនបើកម្មវិធីនេះ នៅតែស្ថិតក្រោមការគ្រប់គ្រងដោយក្រុមហ៊ុន ByteDance ដែលជាក្រុមហ៊ុនបច្ចេកវិទ្យាអ៊ីនធឺណិតដ៏ធំរបស់ប្រទេសចិន។ ច្បាប់នេះ កំណត់ឱ្យ ByteDance ត្រូវតែលក់កម្មវិធី TikTok ទៅក្រុមហ៊ុនផ្សេងទៀត ដែលមិនមែនជាក្រុមហ៊ុនចិន នៅក្នុងរយៈពេលត្រឹម១២ខែប៉ុណ្ណោះ បើមិនដូច្នោះ TikTok នឹងគ្មានវត្តមាននៅអាម៉េរិកតទៅទៀត។

ការរឹតបណ្ដឹងការគ្រប់គ្រងរបស់ប្រទេសចិនលើក្រុមហ៊ុនឯកជន បានបង្កើនការព្រួយបារម្ភយ៉ាងខ្លាំងនៅក្នុងសហរដ្ឋអាម៉េរិក និងបណ្ដាប្រទេសលោកខាងលិចផ្សេងទៀត ជាពិសេសការគ្រប់គ្រងដែលបក្សកុម្មុយនីស្ដចិនមានលើក្រុមហ៊ុន ByteDance និងទិន្នន័យអ្នកប្រើប្រាស់កម្មវិធី TikTok នៅអាម៉េរិក ដែលក្រុមហ៊ុនកំពុងកាន់កាប់។

ភាគី TikTok បានបដិសេធម្តងហើយម្តងទៀត ចំពោះការអះអាងថា រដ្ឋាភិបាលចិនមានការគ្រប់គ្រងលើក្រុមហ៊ុន ByteDance ។ ជាមួយគ្នានោះ លោក Shou Zi Chew នាយកប្រតិបត្តិកម្មវិធី TikTok ក៏បានបញ្ជាក់ក្នុងវីដេអូមួយដែលបានបង្ហោះនៅក្នុងសប្តាហ៍នេះថា «យើងមានទំនុកចិត្ត ហើយយើងនឹងបន្តតស៊ូដើម្បីសិទ្ធិរបស់អ្នកប្រើប្រាស់របស់យើង នៅក្នុងតុលាការ។ ការពិត និងរដ្ឋធម្មនុញ្ញគឺនៅខាងយើង ហើយធានាថា យើងមិនទៅណានោះទេ»។

TikTok បានបញ្ជាក់ថា ស្ថាបនិកជនជាតិចិនរបស់ក្រុមហ៊ុន ByteDance កាន់កាប់ភាគហ៊ុនត្រឹម ២០% ប៉ុណ្ណោះ ហើយប្រហែល ៦០% ក្នុងក្រុមហ៊ុននេះ ត្រូវបានគ្រប់គ្រងដោយវិនិយោគិន ស្ថាប័ន រួមទាំងក្រុមហ៊ុនវិនិយោគធំៗរបស់អាមេរិក ដូចជា Carlyle Group, General Atlantic និង Susquehanna International Group ជាដើម។ ចំណែកនៅសល់ ២០% ទៀតជាកម្មសិទ្ធិរបស់និយោជិតខ្លួន នៅជុំវិញពិភពលោក ហើយសមាជិកក្រុមប្រឹក្សាភិបាលចំនួន៥នាក់របស់ក្រុមហ៊ុន ByteDance នៅក្នុងនោះ៣នាក់ គឺជាជនជាតិអាមេរិក។ ស្របពេលរដ្ឋាភិបាលប្រទេសចិន ក៏បានច្រានចោលផងដែរនូវការព្រួយបារម្ភនានារបស់សហរដ្ឋអាមេរិក៕ (ប្រភព ​៖ BBC)