ខេត្តត្បូងឃ្មុំ ៖ បុរសម្នាក់មានសតិមិនប្រក្រតី បាន​យកកាំបិតផ្គាក់មុខសស្ងាចកាប់ប្រហារទៅ​លើស្ត្រីម្នាក់​ដែល​មានសតិមិនគ្រប់ដូចគ្នាអាយុប្រហែល៥០ឆ្នាំត្រូវចំក្បាល បណ្ដាលឱ្យបែកជាពីរចំណែកស្លា.ប់ក្នុង​ថ្លុក​ឈាម​ ដោយមិនដឹងមូលហេតុ​។ បន្ទាប់ពីកើតហេតុ ជន​ដៃដល់​ត្រូវបានកម្លាំងសមត្ថកិច្ចមូលដ្ឋានចុះអន្តរាគមន៍ចាប់ខ្លួនបានភ្លាមៗតែម្ដង ។

​ហេតុការណ៍ខាងលើនេះ​បានកើតឡើងនៅចំណុចវាលស្រែខាងកើតភូមិព្រះអង្គ ចម្ងាយប្រមាណ២០០ ម៉ែត្រ ក្នុងឃុំរកាពប្រាំ ស្រុកត្បូងឃ្មុំ ខេត្តត្បូងឃ្មុំ កាលពីវេលាម៉ោង១២ថ្ងៃត្រង់ថ្ងៃទី១២ មេសា ឆ្នាំ២០២៤ ។

​ជាជនដៃដល់ឈ្មោះគួយ ឈាង ភេទបុ្រស អាយុ៤៦ឆ្នាំ មានសតិមិនគ្រប់ មានទីលំនៅភូមិរកាពប្រាំទី១ ឃុំរកាពប្រាំ ស្រុកត្បូងឃ្មុំ ខេត្តត្បូងឃ្មុំ ។

សមត្ថកិច្ចមូលដ្ឋានបានឱ្យដឹងនាព្រឹកថ្ងៃទី១៣ មេសា នេះថា ​មុនពេលកើតហេតុ គេឃើញស្ត្រីរងគ្រោះអង្គុយក្នុងរោងរខេករខាក បន្ទាប់មកគេបានឃើញបុរសជាជនដៃដល់​​មាន​កាំបិ​តនៅក្នុងដៃ អង្គុយថ្វាយបង្គំ​ស្ត្រី​រងគ្រោះ ។ រហូតដល់វេលាម៉ោង១២ថ្ងៃត្រង់ថ្ងៃ​ទី១២ មេសា ឆ្នាំ២០២៤ ជននេះក៏យកកាំបិតកាប់ប្រហារចំក្បាល​ស្ត្រីរងគ្រោះ បណ្តាល​ឱ្យ​ស្លាប់មួយរំពេចតែម្តង ។

សមត្ថកិច្ចមូលដ្ឋានបន្តឱ្យដឹងទៀតថា តាមការស្រាវជ្រាវ ស្ត្រី​រងគ្រោះ១រូបខាងលើនេះពីមុនគេឃើញដើរនៅក្នុងស្រុកដំបែរ តែក្រោយមកក៏បានឃើញ​ដើរ​នៅឃុំរកាពប្រាំ ស្រុកត្បូងឃ្មុំ ដែលគិតមកដល់ពេលនេះរយៈពេល២ ឆ្នាំហើយ។

ស្ត្រីរងគ្រោះ​រូបនេះស្លូត ហើយ​អ្នកភូមិតែងតែផ្ដល់បាយទឹកឱ្យពិសារាល់ថ្ងៃ ។មានពេលខ្លះគាត់ដើរចេញពីរោងកាត់តាមភូមិមួយទៅភូមិមួយ។ ជួនដេកនៅកន្លែងផ្សេងពីរទៅបីថ្ងៃក្រោយមកវិលមកដេកនៅរោងរបស់ខ្លួនវិញត្រង់ចំណុចវាលស្រែខាងកើតភូមិព្រះអង្គ ដោយដេកក្រោមរោងនោះទាំងថ្ងៃទាំងយប់ មិនដែលបានធ្វើសកម្មភាពអ្វីមួយផ្ដេសផ្ដាសធ្វើឱ្យអ្នកភូមិស្អប់គាត់នោះទេមានតែអាណិត។

លុះមកដល់ថ្ងៃកើតហេតុ មិនដឹងជាបុរសដែលមានសតិមិនប្រក្រតីរយៈពេល៥ឆ្នាំមកហើយបានកាំបិតយកមកពីណានោះទេកាប់ប្រហារលើ​ស្ត្រី​រងគ្រោះដែលមានសតិមិនប្រក្រតីដូចគ្នាបណ្ដាលឱ្យស្លាប់ក្នុងថ្លុកឈាមយ៉ាងអាណោចអាធ័មតែម្តង ។

សូមបញ្ជាក់ថា ចាប់តាំងពីពេលដែលបុរសជាជនដៃដល់​១រូបខាងលើ​នេះលែងលះប្រពន្ធរួចមក ​បុរសរូបនោះ​ក៏មានសតិមិនប្រក្រតីបែបនេះដោយមានរោងមួយស្នាក់នៅក្នុងភូមិរបស់​ខ្លួន ជួនពេលខ្លះដេកក្នុងព្រៃក៏មាន ។ តាមការស្រាវជ្រាវបុរសដែលក្លាយជាឃាតកនេះមិនមានសំបុត្រណាមួយបញ្ជាក់ពីមន្ទីរពេទ្យមកថាគាត់ជាមនុស្សវិកលចរិតឡើយ។

ផ្អែកតាមការចុះត្រួតពិនិត្យឃើញថា បុរសឈ្មោះឈាង ដែលបានធ្វើសកម្មភាពយកកាំបិតផ្គាក់កាប់លើជនរងគ្រោះ មិនស្គាល់អត្តសញ្ញាណ ភេទស្រី អាយុប្រហែល៥០ឆ្នាំ ជាជនជាតិខ្មែរ (ជាមនុស្សមានសតិមិនប្រក្រតី) ត្រូវចំក្បាលរយះជ្រៀកស្ទើរដាក់ចេញពីគ្នា បណ្តាលឱ្យស្លាប់នៅនឹងកន្លែងកើតហេតុ ដោយមិនដឹងមូលហេតុ ខណៈពេលជនរងគ្រោះកំពុងអង្គុយនៅកន្លែងកើតហេតុតែម្នាក់ឯង (កន្លែងជនរងគ្រោះរស់នៅប្រចាំទាំងថ្ងៃទាំងយប់) ។

បន្ទាប់ពីទទួលបាន​ព័ត៌មានខាងលើ​ភ្លាម នៅរសៀលថ្ងៃដដែល ដោយបានការឯកភាពពីលោកឧត្តមសេនីយ៍ស្នងការនគរបាលខេត្ត និងការសម្របសម្រួលពីលោក ថ្លាង ភ្នំពេជ្រ ព្រះរាជអាជ្ញារង នៃអយ្យការអមសាលាដំបូងខេត្តត្បូងឃ្មុំ កម្លាំងជំនាញ និងកម្លាំងប៉ុស្តិ៍នគរបាលរដ្ឋបាលរកាពប្រាំ នៃ អធិការដ្ឋាននគរបាលស្រុកត្បូងឃ្មុំ បានចុះអន្តរាគមន៍ភ្លាមៗ ដល់កន្លែងកើតហេតុ និងតាមចាប់ខ្លួនជនសង្ស័យឈ្មោះ គួយ ឈាង ខាងលើបញ្ជូនមកអធិការដ្ឋាននគរបាលស្រុកត្បូងឃ្មុំ ។

សមត្ថកិច្ចមូលដ្ឋានបញ្ជាក់ថាបុរសដែលមានសតិមិនប្រក្រតីនេះធ្លាប់បានធ្វើសកម្មភាពគប់​កញ្ចក់រថយន្ត និង​យកទ្រនុងវាយកញ្ចក់រថយន្តរបស់អ្នកដទៃដែលបើកបរតាមដងផ្លូវ បណ្ដាលឱ្យខូចខាតមានជាច្រើនករណីមកហើយ។

ម្យ៉ាងវិញទៀត ក្រោយពីមានករណីឃាតកម្មខាងលើ​នេះកើតឡើង ប្រជាពលរដ្ឋក៏ដូចជាសមត្ថកិច្ច​បារម្ភថា បុរសជាជនដៃដល់ខាងលើ​នេះបង្កសកម្មភាពទៅលើអ្នកផ្សេងបន្ថែមទៀត ក៏​ត្រូវបានលោកឧត្តមសេនីយ៍ស្នងការនគរបាលខេត្តបញ្ជាឱ្យចាប់ខ្លួន ដើម្បីកសាងសំណុំរឿងបញ្ជូនទៅឱ្យតំណាងអាយ្យការអមសាលាដំបូងខេត្តត្បូងឃ្មុំចាត់ការតាមនីតិវិធី ៕​