ខេត្តបាត់ដំបង ៖ ពួកអ្នកជីកកាយរករ៉ែមាសគ្មានច្បាប់ទម្លាប់ត្រូវគេឃើញបោះជំរំតង់កៅស៊ូរាប់សិបកន្លែងប្រហែលកន្លះឆ្នាំមកហើយ នៅតាមចង្កេះភ្នំនានាក្បែរតំបន់ព្រំដែនខ្មែរ-សៀម ក្នុងភូមិសាស្ត្រឃុំបារាំងធ្លាក់ និងឃុំភ្នំព្រឹក ស្រុកភ្នំព្រឹក ភាគខាងលិចខេត្តបាត់ដំបង ដោយប្រើប្រាស់ម៉ាស៊ីនពាក់កណ្តាលស្វ័យប្រវត្តិក្នុងការរែងយកមាស
ខេត្តបាត់ដំបង ៖ ពួកអ្នកជីកកាយរករ៉ែមាសគ្មានច្បាប់ទម្លាប់ត្រូវគេឃើញបោះជំរំតង់កៅស៊ូរាប់សិបកន្លែងប្រហែលកន្លះឆ្នាំមកហើយ នៅតាមចង្កេះភ្នំនានាក្បែរតំបន់ព្រំដែនខ្មែរ-សៀម ក្នុងភូមិសាស្ត្រឃុំបារាំងធ្លាក់ និងឃុំភ្នំព្រឹក ស្រុកភ្នំព្រឹក ភាគខាងលិចខេត្តបាត់ដំបង ដោយប្រើប្រាស់ម៉ាស៊ីនពាក់កណ្តាលស្វ័យប្រវត្តិក្នុងការរែងយកមាសដែលធ្វើឱ្យប៉ះពាល់បរិស្ថានធ្ងន់ធ្ងរបំផុតនៅតំបន់នោះ។
ក្រុមកម្មករភាគច្រើននិយាយថា ពួកគេជាកសិករធ្វើចំណាកស្រុកមកពីតាមបណ្តាខេត្តផ្សេងៗគ្នា។ ពួកគេប្រើប្រាស់ដែកស្បែងជាឧបករណ៍សំខាន់បំផុតក្នុងការជីកយករ៉ែមាសដែលមានជម្រៅប្រមាណពី៣តឹកទៅ៥តឹក។ នៅក្នុងជំរំគេឃើញមានម៉ាស៊ីនរែងមាសពាក់កណ្តាលស្វ័យប្រវត្តិជាច្រើនគ្រឿងកំពុងដំណើរការយ៉ាងគគ្រឹកគគ្រេងនៅក្បែរដងអូរនានាក្នុងតំបន់នោះ។
កម្មករដែលកំពុងបញ្ជាម៉ាស៊ីនម្នាក់សុំមិនប្រាប់ឈ្មោះប្រាប់ថា ក្រុមអ្នករុករករ៉ែមាសទាំងអស់គ្មានច្បាប់អនុញ្ញាតទេ។ អាជ្ញាធរ ឬសមត្ថកិច្ចគ្រប់ស្ថាប័នមករំខានពួកគេម្តងម្កាលដែរ ប៉ុន្តែសំខាន់គឺ «ប្រាក់» ដែលអាចឱ្យពួកគេដំណើរការបាន។ ម៉ាស៊ីនរែងមាសមួយត្រូវចំណាយប្រាក់១.០០០បាត សម្រាប់បង់ឱ្យស្ថាប័នមួយក្នុង១ខែ ក្នុងនោះមានអាជ្ញាធរ និងសមត្ថកិច្ចស្ទើរគ្រប់ស្ថាប័នពាក់ព័ន្ធមកទទួលយកសំណែននេះ។
អភិបាលស្រុកភ្នំព្រឹក លោកសួន គឿន បានថ្លែងថា «កន្លងមកយើងធ្លាប់ចុះទៅទប់ស្កាត់ដល់កន្លែងធ្វើអាជីវកម្មរ៉ែមាសនេះច្រើនលើកមកហើយ ប៉ុន្តែហាក់ដូចជាគ្មានប្រសិទ្ធភាពទេ ពីព្រោះពួកគេកម្រើកឡើងវិញនៅពេលដែលការបង្ក្រាបបានស្ងប់ស្ងាត់។ លោកនិយាយថា ខ្ញុំមិនដែលដឹងអំពីបញ្ហាបង់ប្រាក់សំណូកនេះទេ ប៉ុន្តែនឹងចុះទៅពិនិត្យសកម្មភាពនេះជាថ្មីទៀត ព្រោះក្រុមអ្នករុករករ៉ែមាសទាំងនោះសុទ្ធតែគ្មានច្បាប់អនុញ្ញាត»។
លោកសុង សុភ័ក្រ អធិការស្រុកភ្នំព្រឹកបានថ្លែងបញ្ជាក់ថា មានស្ថាប័នច្រើនដែលពាក់ព័ន្ធនឹងការធ្វើអាជីវកម្មរ៉ែមាសយ៉ាងអនាធិបតេយ្យនេះ ដូច្នេះរូបលោកមិនដឹងថា តើស្ថាប័នណាខ្លះដែលទទួលបានផលប្រយោជន៍ពីការជីកកាយរករ៉ែមាសគ្មានច្បាប់ទម្លាប់នោះទេ។ លោកបានបដិសេធថា រូបលោកមិនជំពាក់វាក់វិនក្នុងការទទួលប្រាក់សំណូក១.០០០បាត ក្នុង១ខែទេ។
ការជីករករ៉ែមាសនៅតំបន់នោះមិនត្រូវបានគេកំណត់ច្បាស់លាស់ទេ។ ពួកកម្មករជីកកាយពាសពេញតាមចង្កេះភ្នំនានានៅតំបន់នោះ។ តាមការបំភ្លឺពីក្រុមកម្មករថា កម្មករភាគច្រើនគឺស៊ីឈ្នួលជីករ៉ែលក់ឱ្យក្រុមឈ្មួញដែលមានម៉ាស៊ីនរែង ក្នុង១ការុង តម្លៃ២០បាត ហើយពួកឈ្មួញទាំងនោះជាអ្នកចំណាយប្រាក់បង់ឱ្យអាជ្ញាធរ ឬសមត្ថកិច្ចទើបអាចធ្វើអាជីវកម្មនេះបាន។
ប្រធានមន្ទីរឧស្សាហកម្ម រ៉ែ និងថាមពល ខេត្ត លោកជឺ ឈៀង មានប្រសាសន៍ថា ការរុករករ៉ែមាសនៅតំបន់ស្រុកភ្នំព្រឹក គឺមានតែក្រុមហ៊ុនចិនមួយប៉ុណ្ណោះដែលមានអាជ្ញាប័ណ្ណពីក្រសួង។ ដូច្នេះក្រុមឈ្មួញឯកជនដែលកំពុងធ្វើសកម្មភាពសព្វថ្ងៃ គឺគ្មានច្បាប់អនុញ្ញាតទេ។ កាលពីខែមុន អាជ្ញាធរខេត្តបានរៀបចំគណៈកម្មការមួយទៅពិនិត្យ និងណែនាំពួកគេ ព្រមទាំងឱ្យធ្វើកិច្ចសន្យាបញ្ឈប់សកម្មភាពទៀត តែពួកគេនៅតែបន្តដំណើរការដដែល។
ពាក់ព័ន្ធទៅនឹងការទទួលយកប្រាក់សំណូកពីក្រុមឈ្មួញជីករករ៉ែមាសដោយខុសច្បាប់ លោកជឺ ឈៀង បានដាក់ការសង្ស័យថា ទំនងបែបអាចអាចពាក់ព័ន្ធខ្លះហើយ ទើបពួកឈ្មួញនៅតែបន្តអាជីវកម្មរ៉ែមាសនេះបាន ហើយអាជ្ញាធរហាក់ដូចជាគ្មានរបាយការណ៍ទាល់តែសោះ។
លោកបញ្ជាក់ថា ការជីកកាយរករ៉ែមាសបែបអនាធិបតេយ្យនេះធ្វើឱ្យប៉ះពាល់ធ្ងន់ធ្ងរណាស់ដល់ធនធានធម្មជាតិនៅតំបន់នោះ ជាពិសេសធ្វើឱ្យប៉ះពាល់យ៉ាងខ្លាំងដល់បរិស្ថាន ដូច្នេះលោកនឹងសុំគោលការណ៍ទៅអាជ្ញាធរខេត្ត ដើម្បីរៀបចំគណៈកម្មការចម្រុះទៅចាប់យកសម្ភារធ្វើអាជីវកម្មនេះតែម្តង ព្រោះពួកគេបានធ្វើកិច្ចសន្យារួចរាល់ហើយ ដើម្បីបញ្ឈប់សកម្មភាព តែពួកគេមិនបានគោរពទេ។
ក្រុមអ្នកតាមដានសភាពការណ៍បានមើលឃើញថា ការជីកកាយយករ៉ែមាសអធិកអធមបែបនេះសង្ស័យមានភ្លើងខៀវពីអស់លោកខ្លះ ជាម្ចាស់ទឹកម្ចាស់ដីដែលគេតែងនិយាយថា «មានប្រាក់ទិញយក្សយាមផ្ទះ» បានយ៉ាងស្រួល ៕
ចែករំលែកព័តមាននេះ