ស្របពេលដែលធនាគារជាតិនៃកម្ពុជាជំរុញសហគ្រាស ក្រុមហ៊ុននានាឲ្យបើកប្រាក់បៀវត្ស ប្រចាំខែដល់បុគ្គលិកជាប្រាក់រៀលនោះ អ្នកជំនាញផ្នែកសង្គមបាននិយាយថា ការបើកប្រាក់បៀវត្សជាប្រាក់រៀលនេះ នៅតែជារឿងពិបាក និងស្មុគស្មាញ ។
លោក យ៉ង់ គឹមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព យល់ ឃើញថា ការបើកប្រាក់បៀវត្សប្រចាំខែសម្រាប់បុគ្គលិករបស់ក្រុមហ៊ុនសហគ្រាសនានា នៅតែមានភាពពិបាក ស្មុគស្មាញ ហើយក៏ជំរុញខាងផ្នែកធនាគារ គួរសិក្សាអោយបានច្បាស់លាស់ជាមុនសិន ។
លោក យ៉ង់ គឹមអេង បានអោយកម្មវិធីលុយនៃសារព័ត៌មានកោះសន្តិភាពដឹងថា «ប្រាក់ រៀលរបស់យើងជួនកាលមានការឡើងចុះ ដូចនេះហើយបានជាស្ថាប័ននានាបើកជាដុល្លារ ដែលជាការងាយស្រួលដល់ពួកគេ ហើយក៏ធ្វើអោយប្រព័ន្ធនោះបន្តរហូតដល់ពេលនេះ»។
អ្នកជំនាញរូបនេះបន្តថា ប្រសិនជាចង់អោយមានការបើកផ្តល់ជាប្រាក់រៀលបែបនេះ ធនាគារជាតិនៃកម្ពុជាគួររកវិធីសាស្ត្រអោយងាយស្រួល ដើម្បីប្រជាពលរដ្ឋមានទំនុកចិត្ត លើអត្រាការប្រាក់ និងមានភាពងាយស្រួលសម្រាប់ប្រជាពលរដ្ឋ ។ ជុំវិញបញ្ហានេះ លោកសង្ឃឹមថា ធនាគារជាតិ លោកនឹងពិចារណាជុំវិញបញ្ហានេះ ។
ទេសាភិបាលធនាគារជាតិនៃកម្ពុជាលើកទឹកចិត្តឱ្យក្រុមហ៊ុន-សហគ្រាស គួរបង្កើនការបើក ប្រាក់ខែជាប្រាក់រៀលដល់កម្មករនិយោជិត និងស្នើឲ្យគ្រឹះស្ថានធនាគារ និងហិរញ្ញវត្ថុ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ និងគ្រឹះស្ថានផ្តល់សេវាទូទាត់សងប្រាក់ទាំងអស់ ផ្តល់ជម្រើសឱ្យអតិថិជនទាំងអស់មានលទ្ធភាពក្នុងការប្រើប្រាស់ ឃ្យូអរកូដ (QR code) ជាប្រាក់រៀល ដើម្បីសម្រួលដល់ការទូទាត់ជាប្រាក់រៀលជាប្រចាំ ។
ការលើកឡើងយ៉ាងដូច្នេះ បន្ទាប់ពីការស្រាវជ្រាវរវាងធនាគារជាតិនៃកម្ពុជាជាមួយកម្មវិធីអភិវឌ្ឍន៍អង្គការសហប្រជាជាតិប្រចាំនៅកម្ពុជា (UNDP Cambodia) បានរកឃើញថា កម្មករមានចំណូលជាប្រាក់ដុល្លារអាមេរិក ប៉ុន្តែការចំណាយប្រចាំថ្ងៃ និងផ្ញើប្រាក់ទៅកាន់គ្រួសារភាគច្រើនប្រាក់រៀលប្រមាណជាង៨០% ដែលបញ្ហានេះនាំឱ្យកម្មករមានការខាតបង់ពេលវេលា និងប្រាក់កាសដោយសារការប្តូរប្រាក់ ។
លោកស្រី ជា សិរី ទេសាភិបាលធនាគារជាតិនៃកម្ពុជា នៅក្នុងសិក្ខាសាលាស្តីពី «ខួបលើកទី៤៤ នៃការដាក់ឲ្យចរាចរប្រាក់រៀលឡើងវិញ ៖ ដំណើរឆ្ពោះទៅមុខនៃប្រាក់រៀល និងប្រព័ន្ធបាគង» កាលពីពេលថ្មីៗនេះបានថ្លែងថា ការសម្រេចឱ្យអនុវត្តវិធានការនានាក្នុងការលើកកម្ពស់ប្រាក់រៀលត្រូវបានសិក្សាយ៉ាងល្អិតល្អន់ ផ្អែកលើការស្រាវជ្រាវ និងទិន្នន័យយ៉ាងច្បាស់លាស់តាមរយៈការសិក្សាស្រាវរួមគ្នារវាងធនាគារជាតិនៃកម្ពុជាជាមួយស្ថាប័នអន្តរជាតិ ដូចជា ទីភ្នាក់ងារសហប្រតិបត្តិការអន្តរជាតិជប៉ុន JICA និងមូលនិធិរូបិយវត្ថុអន្តរជាតិ IMF ទៅលើយុទ្ធសាស្ត្រលើកកម្ពស់ ការប្រើប្រាស់ប្រាក់រៀល ។
ហើយថ្មីៗនេះ ធនាគារជាតិនៃកម្ពុជាក៏បានសហការជាមួយ UNDP នៅកម្ពុជាក្នុងការសិក្សាស្រាវជ្រាវលើការលើកកម្ពស់ការប្រើប្រាស់ប្រាក់រៀលក្នុងការទូទាត់ប្រាក់ឈ្នួលនៅក្នុងវិស័យកាត់ដេរសម្លៀកបំពាក់ ស្បែកជើង និងទំនិញធ្វើដំណើរ ។
លោកស្រីទេសភិបាល បានបញ្ជាក់ថា ការប្រើប្រាស់ប្រាក់រៀលកាន់តែច្រើននឹងជួយពង្រឹង អធិបតេយ្យជាតិ និងការកសាងសង្គមជាតិឱ្យកាន់តែរីកចម្រើន និងប្រកបដោយនិរន្តរភាព ។ ទន្ទឹមនឹងនេះ លោកស្រី ក៏បានអំពាវនាវដល់ក្រសួង-ស្ថាប័ន គ្រឹះស្ថានធនាគារ និងហិរញ្ញវត្ថុ រោងចក្រ ក្រុមហ៊ុន-សហគ្រាស ម្ចាស់អាជីវកម្ម ប្រជាពលរដ្ឋទូទៅ និងគ្រប់ភាគីពាក់ព័ន្ធទាំងអស់បន្តរួមចំណែកប្រើប្រាស់ប្រាក់រៀលនៅក្នុងប្រតិបត្តិការរបស់ខ្លួនឱ្យកាន់ តែច្រើនឡើងដូចជា តាមរយៈការទូទាត់ការបិទស្លាកតម្លៃទំនិញ និងសេវានានាការផ្តល់ឥណទាន និងការសន្សំជាប្រាក់រៀល ព្រមទាំងផ្តល់លក្ខខណ្ឌអនុគ្រោះឱ្យបានច្រើនចំពោះការប្រើប្រាស់ប្រាក់រៀល ៕ ដោយៈ ស នីត
ចែករំលែកព័តមាននេះ