ខេត្តកំពង់ស្ពឺ ៖ ប្តីប្រពន្ធពីរនាក់បានស្វះស្វែងរកកិច្ចអន្តរាគមន៍ និងជំនួយផ្នែកច្បាប់ ក្រោយពីពួកគាត់ត្រូវបានអតីតមន្ត្រីសាលាខេត្តកំពង់ស្ពឺ (មានតួនាទីជាប្រធានការិល័យអន្តរវិស័យ) មួយរូបបន្លំឯកសារយកដីរបស់ពួកគាត់ជាច្រើនហិកតា ។ ទីបំផុត ពួកគាត់ទាំងពីរនាក់ត្រូវរងបណ្តឹងព្រហ្មទណ្ឌក្នុងបទចោទប្រើប្រាស់ឯកសារក្លែងថែមទៀតផង…
ខេត្តកំពង់ស្ពឺ ៖ ប្តីប្រពន្ធពីរនាក់បានស្វះស្វែងរកកិច្ចអន្តរាគមន៍ និងជំនួយផ្នែកច្បាប់ ក្រោយពីពួកគាត់ត្រូវបានអតីតមន្ត្រីសាលាខេត្តកំពង់ស្ពឺ (មានតួនាទីជាប្រធានការិល័យអន្តរវិស័យ) មួយរូបបន្លំឯកសារយកដីរបស់ពួកគាត់ជាច្រើនហិកតា ។ ទីបំផុត ពួកគាត់ទាំងពីរនាក់ត្រូវរងបណ្តឹងព្រហ្មទណ្ឌក្នុងបទចោទប្រើប្រាស់ឯកសារក្លែងថែមទៀតផង ដោយខ្វះការយល់ដឹងផ្នែកច្បាប់ពួកគាត់ទាំងពីរនាក់ស្នើសុំឱ្យប្រមុខថ្នាក់ដឹកនាំ ជាពិសេសនោះឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ជួយអន្តរាគមន៍ចំពោះរូបគាត់ទាំងពីរនាក់ផង ។
បុរសឈ្មោះ សុខ ភិន អាយុ៥៨ឆ្នាំ ប្រពន្ធឈ្មោះ ឈឹម ពៅ អាយុ៦១ឆ្នាំ មុខរបរកសិករ រស់នៅក្នុងភូមិអូរស្នួល ឃុំទ័ពមាន ស្រុកថ្ពង ខេត្តកំពង់ស្ពឺ បានរៀបរាប់ឱ្យដឹងថា កាលពីអំឡុងឆ្នាំ២០១២-២០១៣ គាត់មានបញ្ហាទំនាស់ដីធ្លីជាមួយក្រុមហ៊ុនមួយ ដោយមានការពឹងពាក់ឈ្មោះ វ៉ាន់ សុខា ជាមន្ត្រីសាលាខេត្តកំពង់ស្ពឺ ជាមនុស្សស្គាល់រាប់អានតាំងពីតូចមក ។ ទំនាស់ដីធ្លីរបស់គាត់ហាក់មានភាពស្ងប់ស្ងាត់ គាត់ក៏សម្រេចចិត្តប្រគល់ដីទំហំ១ហិកតាទៅឱ្យឈ្មោះ វ៉ាន់ សុខា ជាសាគុណ ដើម្បីឱ្យនៅក្បែរគ្នាគ្រាន់ថ្ងៃសៅរ៍ ថ្ងៃអាទិត្យ ជាថ្ងៃឈប់សម្រាកមន្ត្រីរាជការមកលំហែរកាយ ។
ដោយគិតថា ដីទំហំ១ហិកតានេះតូចពេក ឈ្មោះ វ៉ាន់ សុខា បានសុំកន្លះហិកតាទៀត ដើម្បីធ្វើកញ្ចុះ ដើម្បីអង្គុយលេងជួបជុំគ្នាម្តងម្កាល និងផឹកតែ ពេលមិត្តភក្តិមានវ័យចំណាស់ទៅដោយមិនស្តាយស្រណោះដីត្រឹមតែ១ហិកតាកន្លះ ពួកគាត់ក៏សម្រេចចិត្តឱ្យទៅឈ្មោះ វ៉ាន់ សុខា ទៅដោយបានដាំដំណាំហូបផ្លែ មានល្មើ មានស្វាយ។ល ។
បុរសពីរនាក់ប្តីប្រពន្ធបានបន្តទៀតថា ការរស់នៅលើដីដែលគាត់ប្រគល់ឱ្យនោះ មិនទាន់បានប៉ុន្មានឆ្នាំផងឈ្មោះ វ៉ាន់ សុខា ទាមទារឱ្យគាត់កាត់ប្លង់ដីចេញពីប្លង់រួមរបស់ពួកគាត់(បំបែកប្លង់) ដែលប្លង់រួមប្លង់ធំ របស់ពួកគាត់មានទំហំជាង៦ហិកតា ។ ពេលនោះពួកគាត់ក៏ព្រមប្រគល់ប្លងនោះទៅឱ្យឈ្មោះ វ៉ាន់ សុខា ដើម្បីបំបែកប្លង់ ក្រោយមកស្រាប់តែលេចឈ្មោះ ចិត្រ អះអាងថា ជាមន្ត្រីសុរិយោដីស្រុកថ្ពងយកក្រដាសមកឱ្យគាត់ផ្តិតមេដៃពួកគាត់ដោយមិនចេះអក្សរ និងមិនបានពិនិត្យឱ្យបានគ្រប់ជ្រុងជ្រោយនោះ ពួកគាត់ក៏ផ្តិតមេដៃឱ្យទៅ ។
ពេលផ្តិតមេដៃរួច ឈ្មោះ ចិត្រ បានបើករថយន្តត្រឡប់ទៅវិញ ហើយចុចកញ្ចក់រថយន្តសួរគាត់ថា ពូមីង លក់ដីឱ្យមេ វ៉ាន់ សុខា អស់ហើយមែនទើបផ្តិតមេដៃឲ្យ សួររួចហើយឈ្មោះ ចិត្រ ក៏សើច និងបានបើករថយន្តចេញទៅបាត់ទៅ ។ ចាប់តាំងពីពេលនោះមក ពួកគាត់ចេះតែមានការងឿងឆ្ងល់ថា ហេតុអ្វីបានជាមន្ត្រីរូបនោះសួរគាត់រឿងលក់ដីទៅឱ្យឈ្មោះ វ៉ាន់ សុខា ទៅវិញ ?
ទាំងដែលដីនោះពួកគាត់ជាម្ចាស់ហើយបានប្រគល់ឱ្យជាសាគុណដែលលោក វ៉ាន់ សុខា បានជួយដោះស្រាយកាលដែលមានជំលោះជាមួយក្រុមហ៊ុន ។ បុរសជាប្តីប្រពន្ធរៀបរាប់ទាំងទឹកភ្នែកទៀតថា ក្រោយមកទើបផ្ទុះរឿងឈ្មោះ វ៉ាន់ សុខា ដាក់ពាក្យប្តឹងទៅតុលាការថា ពួកគាត់ទាំងពីរនាក់ប្តី ប្រពន្ធរំលោ.ភបំពានយកដីឈ្មោះ វ៉ាន់ សុខា ទៅវិញ ។ ការប្តឹងផ្តល់គ្នានៅសាលាដំបូងខេត្តកំពង់ស្ពឺ រហូតដល់សាលាឧទ្ធរណ៍នៅមិនទាន់ចប់ឡើយ ។
ឥឡូវនេះ ពួកគាត់ទាំងពីរនាក់ប្តីប្រពន្ធ ត្រូវបានតុលាការខេត្តកំពង់ស្ពឺធ្វើការកោះហៅ ដើម្បីឱ្យចូលរួមសវនាការក្នុងបទចោទក្លែងឯកសារទៀត តើឯណាទៅគុណធម៌ជាមនុស្ស?មជ្ឈដ្ឋានប្រជាពលរដ្ឋរង់ចាំមើលថា តើតុលាការខេត្តកំពង់ស្ពឺ អាចរកយុត្តិធម៌ឱ្យពួកគាត់ទាំងពីរនាក់ប្តីប្រពន្ធ ជាម្ចាស់ដីបានដែរឬយ៉ាងណា? ។
ក្នុងនាមប្រជាពលរដ្ឋដែលល្ងិតល្ងង់មិនចេះច្បាប់មានចម្ងល់ថា តើនៅពេលដែលខ្លួនបែងចែកទ្រព្យសម្បត្តិ (ដីធ្លី) របស់ខ្លួនឱ្យទៅកូនមានកំហុសដែរឬទេ ? ។ ពិតណាស់ថា ដីដែលគាត់បែងចែកឱ្យទៅកូនៗមួយចំនួនគាត់បានធ្វើអំណោយទៅឱ្យអតីតប្រធានការិយាល័យអន្តរវិស័យមួយរូបពិតមែន តែដោយសារតែភាពល្ងិតល្ងង់ចាញ់បោកអតីតមន្ត្រីរូបនោះ អស់ដីធ្លីជាច្រើនហិកតា ។ អ្វីដែលពួកគាត់គិតថា អយុត្តិធម៌បំផុតនោះ គឺអតីតមន្ត្រីសាលាខេត្តកំពង់ស្ពឺរូបនោះបានបង្ខំឱ្យពួកគាត់ផ្តិតមេដៃលើក្រដាសសរ ហើយនិយាយថា ឯងឱ្យដីអញប៉ុណ្ណាអញយកប៉ុណ្ណឹង ។ ប៉ុន្តែនៅទីបំផុតផ្ទៃដីទំហំជាង៦ហិកតារបស់ពួកគាត់ជាម្ចាស់ដីអតីតមន្ត្រីរូបនោះ ឈ្មោះ វ៉ាន់ សុខា ធ្វើប្លង់រំលោ.ភយកអស់ជាង៣ហិកតាទៅហើយ ដោយយកបក្ខពួករបស់ខ្លួនធ្វើជាសាក្សីទៀតផង ។
តែពួកគាត់មានចម្ងល់ថា បើសិនគាត់លក់ដីមែន ប្រាកដជាមានលិខិតស្នាមទទួលប្រាក់ ប៉ុន្តែតាមការពិតគាត់មិនលក់ ហើយក៏មិនដែលបានទទួលប្រាក់ពីមន្ត្រីរូបនោះឡើយ មន្ត្រីរូបនោះបែរជានិយាយថា ទិញដីពីពួកគាត់ទាំងបំពានទៅវិញ ។
ដោយឡែកមន្ត្រីតុលាការមួយរូបបានប្រលយពាក្យថា «កាលណាគូភាគីមានទំនាស់ក្នុងសំណុំរឿង១អង្គហេតុតែ១ ។ ឧទាហរណ៍ថា«បើរឿងនោះជារឿងរដ្ឋប្បវេណីដែលតុលាការកំពុងដំណើរការដូចការលើកឡើងថា សាលាឧទ្ធរណ៍កំពុងដំណើរការនីតិវិធីនោះសាលាដំបូងពុំអាចលើកយករឿងដដែលមកសវនាការបានទេ តែបើជារឿងដោយឡែកពីគ្នាក្រោយតំណាងអយ្យការចោទប្រកាន់ហើយ ចៅក្រមបិទការស៊ើបសួរនោះ ទើបចៅក្រមជំរះអាចបើកសវនាការបាន» ។ រឿងនេះមានតែចាំតាមដានបន្តទៅមុខទៀតថា តើចុងក្រោយអ្នកណាជាអ្នកឈ្នះឬចាញ់ ? ប្តីប្រពន្ធពីរនាក់ខាងលើ រួមនឹងកូន ឬលោកវ៉ាន់ សុខា ? យុត្តិធម៌ច្បាស់ជាឈ្នះអយុត្តិធម៌ ។
ពាក់ព័ន្ធនិងការលើកឡើងខាងលើរបស់បុរសពីរនាក់ប្តីប្រពន្ធនេះដែរ អ្នកយកព័ត៌មានយើងមិនអាចសុំការបកស្រាយពីលោក វ៉ាន់ សុខា អតីតប្រធានការិយាល័យអន្តរវិស័យខេត្តកំពង់ស្ពឺបានទេ ដោយខលលេខទូរស័ព្ទមិនចូលសោះចំនួន២ដង ។ កោះសន្តិភាពរង់ចាំការបកស្រាយពីលោក វ៉ាន់ សុខា គ្រប់ម៉ោងធ្វើការ ៕
ចែករំលែកព័តមាននេះ