ទីក្រុងហ្សាកាតា៖ ថ្មីៗនេះ អាជ្ញាធរឥណ្ឌូណេស៊ីជួយសង្គ្រោះជនភៀសខ្លួនរ៉ូហ៊ីងហ្កា៦៩នាក់ដែលធ្វើដំណើរតាមទូកតូចមួយគ្រឿងរសាត់អណ្ដែតកណ្ដាលជលសាអស់ជាច្រើនសប្ដាហ៍។ ពួកគេត្រូវបាននាំយកឡើងទៅលើគោកនៅថ្ងៃព្រហស្បតិ៍នេះបន្ទាប់ពីទូកដែលពួកគេជិះបានលិចកាលពីមួយថ្ងៃមុននេះ។ ទូកឈើដឹកជនភៀសខ្លួនទាំងនេះ រួមទាំងទូកខ្នាតធំមួយគ្រឿងទៀតដែលព្យាយាមជួយសង្គ្រោះពួកគេឱ្យរួចផុតពីគ្រោះថ្នាក់បានលិចទាំងពីរគ្រឿងកាលពីថ្ងៃពុធម្សិលមិញ។
គេគិតថានៅពេលនោះ ជនភៀសខ្លួនរ៉ូហ៊ីងហ្កាដែលអាចនៅរស់រានមានជីវិតមានប្រហែល១៥០នាក់ ខណៈដែលមនុស្សរាប់សិបនាក់ទៀតត្រូវខ្សែទឹកកួចយកទៅបាត់ មិនដឹងថាស្លាប់ ឬរស់ទេ។ ក្រុមអ្នកជួយសង្គ្រោះមុនដំបូងឃើញជនភៀសខ្លួនទាំងនេះលឹមៗពីចម្ងាយ។ មិនបង្អង់យូរ ពួកគេក៏ចេញទូកទៅជួយសង្គ្រោះ។ ពេលនោះ ទូករបស់ពួកជនភៀសខ្លួនចាប់ផ្ដើមលិចទៅក្នុងទឹកសមុទ្រជាបណ្ដើរៗនៅជិតកោះអាចេ (Aceh)។ អ្នកខ្លះខំប្រវេប្រវាតោងសម្បកទូកដែលកំពុងលិច។
អាចចាត់ទុកថានេះជាសំណាងមួយនៅក្នុងចំណោមមួយពាន់គ្រោះថ្នាក់ក៏ថាបាន។ បើកាលៈទេសៈមិនហុចឱ្យទេ ពួកគេក៏គ្មានថ្ងៃនេះដែរ។ បើក្រុមអ្នកជួយសង្គ្រោះទៅទីនោះមិនទាន់ពេលវេលាទេ ប្រហែលជាមនុស្សលង់ទឹកស្លាប់មិនតិចនាក់ទេ ។ ជនជាតិភាគតិចរ៉ូហ៊ីងហ្កាប្រាប់ថាពួកគេព្រោះពួកយោធាចេះតែតាមធ្វើទុក្ខបុកម្នេញពួកគេ។ ម៉្លោះហើយ ពួកគេប្រថុយធ្វើដំណើរផ្សងព្រេងតាមទូកតូចៗកាត់សមុទ្រដ៏ធំល្វឹងល្វើយ ជួនស្លាប់ ជួនរស់។ គោលដៅរបស់ពួកគេគឺទៅប្រទេសម៉ាឡេស៊ី ឬឥណ្ឌូណេស៊ី។
អាជ្ញាធរបញ្ជាក់ថាអ្នកជិះទូកដែលគេជួយសង្គ្រោះបានសរុប៦៩នាក់។ ក្នុងនោះ បុរស៤២នាក់ ស្ត្រី១៨នាក់ និងកុមារ៩នាក់។ ពួកគេប្រាប់ថាជិះទូកអស់រយៈពេល១៥ថ្ងៃមកហើយ។ អ្នកខ្លះមកតាំងពីមួយខែមុននេះក៏មាន។ ចំពោះសំណួរថាហេតុអ្វីបានជាលិចទូក? ពួកគេប្រាប់ថាមកពីភ្លៀងធ្លាក់ខ្លាំងពេក។ ពួកគេចាកចេញពីជំរំជនភៀសខ្លួនខក់បាហ្សា (Cox’s Bazar) នៅប្រទេសបង់ក្លាដែស។
នៅទីនោះ (ខក់បាហ្សា) អ្នកខ្លះជួបនឹងអ្នកដែលអាចយកពួកគេទៅប្រទេសឥណ្ឌូណេស៊ី។ ពួកគេត្រូវទៅឥណ្ឌូណេស៊ីមួយដំណាក់កាលសិន។ បន្ទាប់មក បន្តដំណើរទៅម៉ាឡេស៊ី។ មេខ្យល់ទម្លាក់ចោលត្រឹមព្រំដែនម៉ាឡេ។ ពួកគេត្រូវបង់លុយមួយដំណាក់កាលទៀតដើម្បីចូលទឹកដីម៉ាឡេស៊ី។ អ្នកខ្លះទៀតប្រាប់ថាពួកគេធ្វើដំណើរចេញពីប្រទេសភូមា។ បំណងប្រុងទៅប្រទេសថៃ។ ប៉ុន្តែត្រូវអាជ្ញាធរបដិសេធ។
កាលពីថ្ងៃពុធ ជនភៀសខ្លួនរ៉ូហ៊ីងហ្កា៦នាក់ដែលធ្លាប់រួមដំណើរនៅលើទូកតែមួយជាមួយអ្នក៦៩នាក់នោះត្រូវអ្នកនេសាទឥណ្ឌូណេស៊ីជួយសង្គ្រោះឱ្យរួចផុតជីវិត។ អ្នកនៅរស់ម្នាក់ប្រាប់ថាមនុស្សរាប់សិបនាក់ត្រូវទឹកកួចយកទៅបាត់។ ទូកនេះដាក់មនុស្សសរុប១៥១នាក់។ គ្រាន់តែទូកលិចភ្លឹបចូលទៅក្នុងទឹកភ្លាម មនុស្ស៥០ជួបនឹងបញ្ហាភ្លាមមួយរំពេច។ អ្នកខ្លះបាត់ខ្លួន និងអ្នកខ្លះស្លាប់ភ្លាមៗ។ អាជ្ញាធរឥណ្ឌូណេស៊ីកំពុងខិតខំជួយសង្គ្រោះមនុស្សឱ្យបានច្រើនតាមដែលអាចធ្វើទៅបាន៕
ប្រភព៖ Channel News Asia
https://www.channelnewsasia.com/asia/indonesia-rohingya-myanmar-rescue-boat-capsized-missing-dead-4211171
ចែករំលែកព័តមាននេះ