(ថៃ)៖ តារាសម្តែងថៃជើងចាស់លោក Winai Kraibutr បានទទួលមរណភាព ក្នុងវ័យ៥៤ឆ្នាំ កាលពីយប់ថ្ងៃពុធ ដោយសារការឆ្លងមេរោគក្នុងឈាម ខណៈកំពុងទទួលការព្យាបាលនៅមន្ទីរពេទ្យ CGH Hospital Saimai ក្នុងទីក្រុងបាងកក។ ដំណឹងដ៏សោកសង្រែងនេះត្រូវបានប្រកាសដោយ អ្នកនាង Onchanya ជាភរិយាបាន​បង្ហោះ​លើ​ហ្វេសប៊ុក​របស់​ខ្លួន​ថា ‘Rest in peace’ នៅ​ពាក់​កណ្ដាល​អធ្រាត្រ​ថ្ងៃ​ពុធ។

តារាសម្តែងថៃជើងចាស់លោក Winai Kraibutr និងភរិយាមានកូនប្រុសស្រី៣នាក់ជាចំណងដៃ។ លោក Winai បានទទួលរងនូវជំងឺសើស្បែកដ៏កម្រមួយអស់រយៈពេល៥ឆ្នាំមកហើយ។ ជំងឺ​នេះ​ធ្វើ​ឱ្យ​គាត់​ស្រក​ទម្ងន់ ហើយ​គាត់​ត្រូវ​បង្ខំ​ចិត្ត​ឈប់​ទទួល​យក​ការងារ​សម្ដែង។

កើតនៅថ្ងៃទី១៦ ខែមិថុនា ឆ្នាំ១៩៦៩ Winai បានបង្ហាញខ្លួននៅក្នុងខ្សែភាពយន្តជាច្រើនដែលទទួលបានជោគជ័យគួរឱ្យកត់សម្គាល់នៅ Box Office របស់ប្រទេសថៃ។ ខ្សែភាពយន្តចំនួនពីររឿងរបស់គាត់គឺ “Nang Nak” និង “Bang Rajan” ដែលបានចេញផ្សាយជាប់ៗគ្នាក្នុងឆ្នាំ១៩៩៩ និង២០០រកចំណូលបានជាង ១៥០លានបាតក្នុងមួយរឿងនៅ Box Office ដែលធ្វើអោយគាត់ទទួលបានរហស្សនាមថា “វីរបុរសរាប់រយលានបាត” ។

លោកWinai ក៏បានបង្ហាញខ្លួននៅក្នុងការផ្សាយពាណិជ្ជកម្ម វីដេអូចម្រៀង រឿងភាគទូរទស្សន៍ និងរឿងកំប្លែងជាច្រើន ក៏ដូចជាភាពយន្តរួមគ្នាកម្ពុជា-ថៃ ដែលមានចំណងជើងថា «កូនពស់កេងកង»៕ ប្រភព៖ The Nation Thailand