ខេត្តព្រៃវែង ៖ មានករណីគ្រោះអគ្គិភ័យឆាបឆេះផ្ទះប្រជាពលរដ្ឋនៅក្នុងស្រុកស្វាយអន្ទរ ដែលធ្វើឱ្យលោកស្នងការនគរបាលខេត្តព្រៃវែង ត្រូវពលរដ្ឋប្រមាថដល់អ្នកមានគុណរបស់លោក ត្រូវបានរដ្ឋមន្ត្រីក្រសួងមហាផ្ទៃឆ្លើយតបបែបនេះ ។ ឧត្តមសេនីយ៍ទោ ឈឿន…
ខេត្តព្រៃវែង ៖ មានករណីគ្រោះអគ្គិភ័យឆាបឆេះផ្ទះប្រជាពលរដ្ឋនៅក្នុងស្រុកស្វាយអន្ទរ ដែលធ្វើឱ្យលោកស្នងការនគរបាលខេត្តព្រៃវែង ត្រូវពលរដ្ឋប្រមាថដល់អ្នកមានគុណរបស់លោក ត្រូវបានរដ្ឋមន្ត្រីក្រសួងមហាផ្ទៃឆ្លើយតបបែបនេះ ។
ឧត្តមសេនីយ៍ទោ ឈឿន ប៊ុនឆន បង្ហោះសារសម្តែងការហូសចិត្តដោយរៀបរាប់ថា «គេជេរម្តាយខ្ញុំទាំងយប់ ភារកិច្ចមិនមែនសម្តែងកុន ដោយយកជីវិតទៅជួយ ចុះហេតុអ្វីបានជេរម្តាយខ្ញុំ? ដូចនេះខ្ញុំមិនលើកលែងអ្នកឡើយ ។
ស្នងការនគរបាលខេត្តព្រៃវែងបានបង្ហោះសារខាងលើ កាលពីថ្ងៃទី១៨ ខែសីហា ឆ្នាំ២០២៤ ដោយភ្ជាប់ជាមួយរូបថត៣សន្លឹក ដែលទទឹកនិងប្រឡាក់ពេញមួយតួខ្លួន ក្រោយពីលោកបានដឹកនាំប្រតិបត្តិការសង្គ្រោះ និងពន្លត់អគ្គីភ័យដែលឆាបឆេះផ្ទះប្រជាពលរដ្ឋ នៅក្នុងស្រុកស្វាយអន្ទរកាលពីយប់ថ្ងៃទី១៧ ខែមីនា ឆ្នាំ២០២៤។
ក្រោយមក នៅថ្ងៃដដែលនោះ លោកឧត្តមសេនីយ៍ទោ ឈឿន ប៊ុនឆន បានផុសវីដេអូថ្មីមួយដោយបង្ហាញមុខប្រជាពលរដ្ឋ២នាក់ គឺជាបុគ្គលដែលបានអ្នកជេរម្តាយរបស់លោក ដោយដាក់ចំណងជើង«សូមជួយស្តាប់អ្នកជេរម្តាយខ្ញុំ! ខ្ញុំយល់ពីអារម្មណ៍ផ្ទះដែលមានភ្លើងឆេះ ប៉ុន្តែបើអ្នកមិនមានជំនាញពន្លត់អគ្គីភ័យនោះ អ្នកក៏មិនយល់ពីភារកិច្ច» ។
បន្ទាប់ពីមានការចែករំលែករឿងរ៉ាវមួយនេះលើបណ្តាញសង្គម ឈានមកដល់ថ្ងៃទី១៩ ខែមីនា ឆ្នាំ២០២៤ ឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ បានចេញមុខមកពន្យល់បន្ថែមទៅដល់សាធារណៈជន ដើម្បីបង្ការនៅឱ្យកើតរឿងយល់ច្រឡំបែបនេះទៅថ្ងៃមុខ ក្នុងករណីមានគ្រោះអគ្គិភ័យកើតឡើង ។
រដ្ឋមន្ត្រីក្រសួងមហាផ្ទៃមានប្រសាសន៍រៀបរាប់ទាំងស្រុងយ៉ាងដូច្នេះថា៖ «ក្នុងនាមក្រសួងមហាផ្ទៃ និងក្នុងនាមប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង ខ្ញុំសូមចូលរួមរំលែកទុក្ខលំបាក ប្រកបដោយក្ដីសោកស្ដាយជាពន់ពេកជាមួយបងប្អូនប្រជាពលរដ្ឋ ដែលរងគ្រោះដោយឧប្បទ្ទវហេតុគ្រោះអគ្គិភ័យ នៅក្នុងស្រុកស្វាយអន្ទរ ខេត្តព្រៃវែង កាលពីវេលាម៉ោង៧:២០យប់ ថ្ងៃទី១៧ ខែមីនា ឆ្នាំ២០២៤។
ខ្ញុំសូមជម្រាបជូនសាធារណជនឱ្យបានជ្រាបថា ទីតាំងកើតមានគ្រោះអគ្គិភ័យនោះ ជាផ្ទះប្រជាពលរដ្ឋ២ល្វែង ដែលមានស្តុកលក់គ្រឿងម៉ាស៊ីន និងប្រេងម៉ាស៊ីន ។ ក្នុងគ្រានោះ ផ្ទះត្រូវបានម្ចាស់ចាក់សោពីរជាន់ គឺសោខាងមុខជាប់សំយាបផ្ទះ និងសោចូលទៅក្នុងផ្ទះ ។ ដោយឃើញស្ថានភាពស្មុគស្មាញ និងភ្លើងឆេះមានហានិភ័យធ្ងន់ធ្ងរ លោកឧត្តមសេនីយ៍ទោ ឈឿន ប៊ុនឆន ស្នងការនៃស្នងដ្ឋាននគរបាល ខេត្តព្រៃវែង បានបញ្ជាឱ្យអធិការដ្ឋានក្រុង និងស្រុកផ្សេងទៀត បញ្ចេញរថយន្តពន្លត់អគ្គិភ័យ មកគាំទ្របន្ថែម។
ក្នុងអំឡុងពេលដែលសមត្ថកិច្ចកំពុងធ្វើប្រតិបត្តិការនោះ មានបងប្អូនប្រជាពលរដ្ឋ បានចោមរោមយ៉ាងច្រើន ហើយក្នុងនោះក៏មានប្រជាពលរដ្ឋដែលមានផ្ទះក្បែរទីតាំងកើតហេតុ (ទំនងមានការព្រួយបារម្ភ និងភិតភ័យខ្លាំង) បានព្យាយាមជ្រៀតខ្លួនចូលក្នុងចំណោម កម្លាំងសមត្ថកិច្ច ដើម្បីប៉ុនប៉ងអូសទាញកម្លាំងបង្វែរទុយោទឹក ឱ្យបាញ់ទៅលើផ្ទះរបស់ខ្លួន រហូតមានពលរដ្ឋខ្លះ បានដណ្ដើមទុយោទឹក និងប្រើពាក្យសម្ដីមិនសមរម្យទៅលើសមត្ថកិច្ចទៀតផង ។ សមត្ថកិច្ចសុខចិត្តទទួលស្ដាប់ពាក្យសម្ដីមិនសមរម្យ និងបានចាប់ពលរដ្ឋដែលចូលមករំខាននោះចេញពីទីតាំងប្រតិបត្តិការ។
ក្នុងស្ថានភាពនោះដែរ ឯកឧត្តម សួន សុម៉ាលីន អភិបាលខេត្តព្រៃវែង ក៏បានបញ្ជាឱ្យអគ្គិសនីខេត្ត បិទចរន្តអគ្គិសនី ដែលអូសកាត់ពីលើខាងមុខផ្ទះជនរងគ្រោះ ដើម្បីទុកលទ្ធភាពឱ្យកម្លាំងធ្វើប្រតិបត្តិការកាន់តែងាយស្រួល ។ ក៏ប៉ុន្តែដោយសាផ្ទះជនរងគ្រោះមានប្លង់សេនៅដំបូល និងថែមទាំងមានការផ្ទុះខ្លាំង (សមត្ថកិច្ចសន្និដ្ឋានថា ជាការផ្ទុះធុងប្រេង) ជាបន្តបន្ទាប់នៅខាងក្នុងផង សមត្ថកិច្ចបានសម្រេចប្រើរថយន្តអគ្គិភ័យបុកទម្លុះទ្វារខាងមុខ ដើម្បីឱ្យក្រុមពន្លត់បានចល័តទុយោទឹកកាន់តែកៀកទីតាំងមានការឆេះខ្លាំង ។ បន្ទាប់ពីគ្រឿងចក្រធុនធ្ងន់បានមកដល់ សមត្ថកិច្ចក៏បញ្ជាឱ្យបុកនិងកាយទម្លុះទ្វារចូលខាងក្នុងផ្ទះ ។
ទីបំផុត សមត្ថកិច្ចក៏មានលទ្ធភាពចល័តទុយោទឹកចូលទៅដល់គោលដៅដែលមានការឆេះខ្លាំង រហូតឈានទៅគ្រប់គ្រងអគ្គិភ័យបានទាំងស្រុង ហើយភ្លើងក៏មិនអាចឆេះរាលដាលបង្កជាមហន្តរាយធ្ងន់ធ្ងរជាងនេះ។ ក្នុងប្រតិបត្តិការនេះ សមត្ថកិច្ចបានប្រើរថយន្តពន្លត់អគ្គិភ័យចំនួន១៣គ្រឿង ក្នុងនោះ ខេត្តព្រៃវែង ចំនួន១០គ្រឿង និងមានការគាំទ្រពីខេត្តត្បូងឃ្មុំចំនួន៣គ្រឿងបន្ថែម ខណៈកម្លាំងពីរនាក់បានរងបួសដោយសារការបាក់ប្លង់សេ និងម្នាក់ទៀត បានរងគ្រោះដោយសារការពុលផ្សែងឆេះប្រេង និងគ្រឿងជ័រ។
ផ្អែកលើរបាយការណ៍របស់លោកឧត្តមសេនីយ៍ទោស្នងការខេត្តព្រៃវែង ការសម្រេចចិត្តផ្ដោតលើគោលដៅកំពុងឆេះខ្លាំង ដែលធ្វើឱ្យពលរដ្ឋខ្លះមិនសប្បាយចិត្តនាពេលនោះ គឺដោយសារជំនាញបានសន្និដ្ឋានច្បាស់ថា ប្រសិនបើមិនពន្លត់ភ្លើងនៅផ្ទះ២ល្វែងបានទាន់ពេលទេ ជញ្ជាំងសងខាងនឹងត្រូវប្រេះបាក់បណ្ដាលឱ្យភ្លើងបន្តចេះរាលដាលបន្ថែមទៅផ្ទះជាប់នោះមិនខានឡើយ។ ម្យ៉ាងផ្ទះក្បែរនោះ ក៏មានគ្រឿងឈើ បរិក្ខារពេទ្យ និងផ្ទះប្ដូរប្រាក់ទៀតផង ។
ក្នុងន័យនេះ ខ្ញុំសូមថ្លែងអំណរគុណ និងកោតសរសើរចំពោះរដ្ឋបាលខេត្តព្រៃវែង ស្នងការដ្ឋាននគរបាលខេត្តអាជ្ញាធរ និងកងកម្លាំងចម្រុះ ជាពិសេសកម្លាំងពន្លត់អគ្គិភ័យ ដែលបានប្រតិបត្តិការសង្គ្រោះ និងពន្លត់ប្រកបដោយវិជ្ជាជីវៈ និងការលះបង់ខ្ពស់។ «ស៊ូស្លាប់បាកុំឱ្យស្លាប់មេ ស៊ូលិចទូកកណ្ដាលទន្លេកុំឱ្យភ្លើងឆេះផ្ទះ» យើងក៏យល់ច្បាស់នូវអារម្មណ៍ភ័យព្រួយខ្លាំងរបស់ប្រជាពលរដ្ឋដូចគ្នាដែរ ។
យ៉ាងណាក៏ដោយ សូមបងប្អូនទុកលទ្ធភាពនេះ ជូនសមត្ថកិច្ចធ្វើការបានពេញដៃពេញជើង ពីព្រោះមានតែសមត្ថកិច្ចជំនាញទេដែលមានបទពិសោធ និងមានការសន្និដ្ឋានបែបបច្ចេទេសចំពោះសភាពការណ៍ជាក់ស្ដែង ជាពិសេស គោលដៅអាទិភាពត្រូវបាញ់ទឹកពន្លត់បន្ទាន់ និងគោលដៅបន្ទាប់ត្រូវការពារជាដើម។ ការធ្វើបុរេវិនិច្ឆ័យបែបអវិជ្ជមានផ្សេងៗ រហូតឈានដល់ការប្រើពាក្យសម្ដីមិនសមរម្យលើសមត្ថកិច្ច ឬអាជ្ញាធរ និងការចូលទៅរំខានផ្សេងៗ ក៏មិនគួរកើតមានឡើយ ក្នុងពេលដែលពួកគាត់កំពុងយកជីវិតទៅប្ដូរដើម្បីពួកយើង ។
ឆ្លៀតក្នុងឱកាសនេះដែរ ខ្ញុំសូមអំពាវនាវដល់បងប្អូនជនរួមជាតិទូទាំងប្រទេស សូមមានស្មារតីប្រុងប្រយ័ត្នខ្ពស់ចំពោះគ្រោះអគ្គិភ័យគ្រប់ទីកន្លែង ទាំងនៅក្នុងផ្ទះ ផ្សារ រោងចក្រ សហគ្រាសអាជីវកម្ម ទីតាំងសាធារណៈផ្សេងៗ ស្រែចំការ និងព្រៃជាដើម ជាពិសេសក្នុងស្ថានភាពដែលប្រទេសយើង កំពុងស្ថិតក្នុងរដូវក្ដៅ។ ជាមួយគ្នានេះ សូមកម្លាំងពន្លត់អគ្គិភ័យទាំងថ្នាក់ជាតិ និងថ្នាក់ក្រោមជាតិ បន្តត្រៀមលក្ខណៈប្រតិបត្តិការផ្ដល់សេវាជួយសង្គ្រោះជូនប្រជាពលរដ្ឋ ឱ្យបានទាន់ពេលវេលា ដើម្បីរួមគ្នាសម្រេចគោលដៅរួម គឺ«ធ្វើអ្វីៗដើម្បីផ្ដល់ភាពកក់ក្ដៅជូនប្រជាពលរដ្ឋ»។
ឆ្លើយតបទៅនឹងការបញ្ជាក់របស់ឧបនាយករដ្ឋមន្ត្រី ស សុខា ដែលជាថ្នាក់លើបែបនេះ ឧត្តមសេនីយ៍ទោ ឈឿន ប៊ុនឆន ស្នងការនគរបាលខេត្តព្រៃវែង បានចែករំលែកសារមួយនេះ ដោយបង្ហាញអារម្មណ៍កក់ក្តៅថា «The best of the best and full of meaning ថាមពលមហាសាលដែលមេបានផ្តល់ដល់មន្ត្រីក្រោមឱវាទគ្រប់ៗគ្នា មន្ត្រីទាំងអស់ក្នុងខេត្ត បានអានសារនេះហើយ ពោរពេញដោយភាពកក់ក្តៅ និងបន្តយកជីវិតទៅធ្វើការងារជាបន្តទៀត»៕ អត្ថបទ៖ អោម ចែតច័ន្ទណារ៉ា
ចែករំលែកព័តមាននេះ