ខេត្តកណ្ដាល ៖ គិតមកត្រឹមវេលាម៉ោង៩និង៣០នាទីយប់ថ្ងៃទី១៨ ខែមីនា ឆ្នាំ២០២៤ ភ្លើងដែលឆេះរោងចក្រផលិតស្បែកជើង(RG) នៅស្រុកអង្គស្នួល ខេត្តកណ្ដាល នៅមិនទាន់រលត់នៅឡើយទេ។ បើទោះបីជាមានរថយន្តពន្លត់អគ្គិភ័យជាច្រើនគ្រឿង…
ខេត្តកណ្ដាល ៖ គិតមកត្រឹមវេលាម៉ោង៩និង៣០នាទីយប់ថ្ងៃទី១៨ ខែមីនា ឆ្នាំ២០២៤ ភ្លើងដែលឆេះរោងចក្រផលិតស្បែកជើង(RG) នៅស្រុកអង្គស្នួល ខេត្តកណ្ដាល នៅមិនទាន់រលត់នៅឡើយទេ។ បើទោះបីជាមានរថយន្តពន្លត់អគ្គិភ័យជាច្រើនគ្រឿង ទៅបាញ់ពន្លត់ជាបន្តបន្ទាប់យ៉ាងណាក៏ដោយ ប៉ុន្តែភ្លើងនៅតែឆេះខ្លាំង ដែលទំនងឆេះទាល់តែអស់ទើបរលត់។ ព្រោះនៅក្នុងរោងចក្រមានសុទ្ធតែសម្ភារៈដែលងាយនឹងឆេះហើយឆេះងំថែមទៀត ដូចជា កាវបិទស្បែកជើង ជ័រ ស្បែក និងរបស់របរជាច្រើនមុខទៀត។
អគាររោងចក្រច្រើនខ្នង រួមទាំងម៉ាស៊ីនសង្វាក់ផលិតកម្ម វត្ថុធាតុដើមសម្រាប់ផលិតស្បែកជើងមានដូចជា ជ័រ ស្បែក កាវបិទស្បែកជើង និងរបស់របរជាច្រើនមុខទៀត ព្រមទាំងស្បែកជើង ដែលជាផលិតផលសម្រេចរាប់រយគូ ត្រូវបានភ្លើងឆេះទាំងស្រុង។ នេះបើយោងតាមការឲ្យដឹងពីអ្នក ដែលស្ថិតនៅក្នុងហេតុការណ៍នោះ ប៉ុន្តែនៅមិនទាន់ដឹងថា ទំហំ នៃការខូចខាតគិតជាទឹកប្រាក់ប៉ុន្មាននៅឡើយ ។
ប្រភពខាងលើបានប្រាប់ថា ដោយឡែកកម្មករ កម្មការិនី ព្រមទាំងប្រជាពលរដ្ឋ ដែលស្នាក់នៅផ្ទះជួលកៀក និងរោងចក្រនោះក៏ត្រូវបានសមត្ថកិច្ចជម្លៀសចេញជាបណ្ដោះអាសន្ន ឬអ្នកដែលមានរថយន្ត និងម៉ូតូ ត្រូវឲ្យយកទៅទុកឲ្យឆ្ងាយពីកន្លែងកើតហេតុ ។ ដើម្បីការពារសុវត្ថិភាពពួកគាត់ និងមិនឲ្យមានការខាតបង់ទ្រព្យសម្បត្តិ ដែលអាចនឹងបង្កឡើងដោយសារតែភ្លើងនោះ ក្រែងមិនអាចទប់ស្កាត់បានព្រោះការឆាបឆេះនោះ មានទំហំធំពេក ។
ប្រភពដដែល បានប្រាប់ឲ្យដឹងបន្តទៀត រថយន្តពន្លត់អគ្គិភ័យច្រើនគ្រឿង បានចេញទៅកាន់ទីនោះ មានដូចជារថយន្តពន្លត់អគ្គិភ័យក្រសួងមហាផ្ទៃ រថយន្តពន្លត់អគ្គិភ័យស្នងការដ្ឋាននគរបាលរាជធានីភ្នំពេញ។ រថយន្តពន្លត់អគ្គិភ័យស្នងការដ្ឋាននគរបាលខេត្តកណ្ដាល រថយន្តពន្លត់អគ្គិភ័យអង្គភាព៧១១ កងពលតូចលេខ៧០ និងរថយន្តពន្លត់អគ្គិភ័យមកពីបណ្ដាក្រុមហ៊ុនឯកជនជាច្រើនទៀត។ ចំណែកក្រុមអ្នកពន្លត់ភ្លើងមានទាំងកម្លាំង សមត្ថកិច្ច និងស៊ីវិល ម្នាក់ៗបានខំប្រឹងធ្វើការ អស់ពីកម្លាំងកាយចិត្ត និងប្រើគ្រប់វិធី និងជំនាញ ដើម្បីធ្វើយ៉ាណាឲ្យភ្លើងរលត់ បើទោះបីជាអគាររោងចក្រ ត្រូវភ្លើងឆេះទាំងស្រុងហើយក៏ដោយ ។
សូមរម្លឹកថា កាលពីវេលាម៉ោង៥ល្ងាច ថ្ងៃទី១៨ ខែមីនា ឆ្នាំ២០២៤ នៅក្នុងរោងចក្រផលិតស្បែកជើងយីហោ«អ.ជី ហ្វ៊ូតវែរ (ខេមបូឌា) ឯក(RG) ដែលមានទីតាំងស្ថិតនៅតាមផ្លូវជាតិលេខ៤ ក្នុងភូមិស្វាយជ្រុំ ឃុំបែកចាន ស្រុកអង្គស្នួល ខេត្តកណ្ដាល។ត្រូវបានភ្លើងឆេបឆេះសន្ធោរសន្ធៅ ដែលសង្ស័យបង្កឡើងដោយការឆ្លងចរន្តអគ្គិសនី ក្នុងខណៈដែលកម្មករ កម្មការិនីរាប់រយនាក់កំពុងធ្វើការ ជាហេតុធ្វើឲ្យពួកគេមានការភ័យខ្លាច ហើយបាននាំគ្នារត់ចេញក្រៅយ៉ាងប្រសេចប្រសាច ហើយពុំទាន់មានការអះអាងណាមួយថា តើមានអ្នករងគ្រោះក្នុងហេតុការណ៍នេះឬអត់នៅឡើយទេ ៕
ចែករំលែកព័តមាននេះ