រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអំពាវនាវឱ្យបងប្អូន ដែលចង់ដឹង ឈឺឆ្អាលពិតប្រាកដពីស្ថានភាពសេដ្ឋកិច្ចនៅកម្ពុជា សូមស្វែងរកឱ្យគ្រប់ជ្រុងជ្រោយ…
រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអំពាវនាវឱ្យបងប្អូន ដែលចង់ដឹង ឈឺឆ្អាលពិតប្រាកដពីស្ថានភាពសេដ្ឋកិច្ចនៅកម្ពុជា សូមស្វែងរកឱ្យគ្រប់ជ្រុងជ្រោយ មុននឹងផ្សព្វផ្សាយ បើយើងចង់មើលកន្លែងមនុស្សអ៊ូអរ ទៅមើលកន្លែងផ្សារ ឬមួយកន្លែងគេជប់លៀង កុំទៅមើលកន្លែងគេសមាធិ គឺស្ងាត់ហើយ បើយើងចង់មើលកន្លែងបង្កើតការងារ ទៅសួរ កន្លែងមុខរបរ ទីភ្នាក់ជាតិមុខរបរ តើបង្កើតការងារប៉ុន្មាន ? កុំទៅមើលកន្លែងរោងចក្របិទ ដែលអត់ការងារ ហើយទៅមើលឱ្យគ្រប់កន្លែង ឱ្យដឹងថា វាបិទ ឬបើក ?
ការថ្លែងរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងឱកាសអញ្ជើញដឹកនាំកិច្ចប្រជុំពេញអង្គគណៈរដ្ឋមន្ត្រី នាព្រឹកថ្ងៃទី១៥ ខែមីនា ឆ្នាំ២០២៤ ។
ជាងនេះការផ្ដាំផ្ញើរបស់សម្តេចធិបតី ធ្វើឡើងបន្ទាប់ពីមានការផ្សព្វផ្សាយមិនពិតពីកម្ពុជា ថាឃើញតែរោងចក្របិទ ដោយឈរលើជ្រុងតូចមួយ មិនបានរកប្រភពព័ត៌មានឱ្យបានច្បាស់លាស់ និងធ្វើដូចមិនឃើញពីការចុះបញ្ជីបើកក្រុមហ៊ុន រោងចក្រ សហគ្រាសថ្មីៗ បាននិងកំពុងបើកការវិនិយោគជាបន្តបន្ទាប់ ទាល់តែសោះ ។
សម្ដេចធិបតី បានជម្រាបជូនប្រជាពលរដ្ឋ នូវសមិទ្ធផលជាច្រើនរបស់រាជរដ្ឋាភិបាល ដែលមានអាយុកាលប្រមាណ៦ខែកន្លងទៅ ថា ជាជោគជ័យមួយរបស់រដ្ឋាភិបាលថ្មី ធ្វើដំណើរទៅមុខ ប្រកបដោយភាពស្វាហាប់ មានថាមភាព ប្រាកដនិយម ។
សម្ដេចធិបតី បានថ្លែងថា «អ៊ីចឹងអ្វីដែលខ្ញុំ ជូនទៅដល់បងប្អូនប្រជាពលរដ្ឋនេះ ជាគឺស្ថានភាព ការវិវឌ្ឍមួយចំនួន ពាក់ព័ន្ធទៅនឹងការទាក់ទងវិនិយោគ ទាក់ទងទៅនឹងការបង្កើតការងារ និងកិច្ចការផ្សេងៗ ជូនប្រជាពលរដ្ឋរបស់យើង» ។
សូមបញ្ជាក់ថា កិច្ចប្រជុំពេញអង្គគណៈរដ្ឋមន្ត្រី នៅព្រឹកនេះ ដើម្បីពិនិត្យ និងពិភាក្សាលើរបៀបវារៈ សំខាន់ៗមួយចំនួន ដូចខាងក្រោម៖
១៖ សេចក្តីព្រាងគោលនយោបាយជាតិលុបបំបាត់ជំងឺអេដស៍ និងចីរភាពកម្មវិធីអេដស៍ សម្រាប់ឆ្នាំ២០២៣-២០២៨
២៖ សេចក្តីព្រាងកម្មវិធីវិនិយោគសាធារណៈ៣ឆ្នាំរំកិល២០២៥-២០២៧។
៣៖ សេចក្តីព្រាងអនុក្រឹត្យស្តីពីការរៀបចំ និងការប្រព្រឹត្តទៅរបស់រដ្ឋលេខាធិការដ្ឋានអាកាសចរណ៍ស៊ីវិល។
កិច្ចប្រជុំក៏នឹងពិភាក្សាលើបញ្ហាផ្សេងៗទៀត ពាក់ព័ន្ធនឹងកិច្ចការដឹកនាំរដ្ឋទាំងថ្នាក់ជាតិ និងក្រោមជាតិ ៕
ចែករំលែកព័តមាននេះ