ទីក្រុងហាណូយ៖ នៅពេលស្ថានការណ៍នៅក្នុងតំបន់កំពុងតានតឹង វៀតណាមគួរណាស់ទិញអាវុធចូលឱ្យបានច្រើនដើម្បីទុកការពារខ្លួន។ ផ្ទុយទៅវិញ ប្រទេសនេះកាត់បន្ថយការទិញចូលទ្វេមួយជាបីកាលពីឆ្នាំ២០២៣។ ប៉ុន្តែបើទុកជាត្រូវទិញក៏មិនសូវទិញពីរុស្ស៊ីច្រើនដូចមុនដែរ។ វៀតណាមចង់ទិញពីប្រទេសផ្សេងវិញ។ នេះបើតាមទិន្នន័យដែលផ្សព្វផ្សាយកាលពីថ្ងៃចន្ទ។ ក្រុមអ្នកជំនាញយល់ថាការដែលវៀតណាមកាត់បន្ថយការទិញអាវុធមិនមែនជាសញ្ញាល្អទេ។
វៀតណាមដាក់ផែនការនាំអាវុធចូល១ពាន់លានដុល្លារក្នុងមួយឆ្នាំៗ។ ប៉ុន្តែកាលពីឆ្នាំ២០២៣ វៀតណាមមិនសូវទិញអាវុធច្រើនទេ។ គ្រឿងបរិក្ខារយោធាដែលវៀតណាមនាំចូលគឺនាវាចម្បាំងដែលជាអំណោយរបស់ប្រទេសឥណ្ឌាក្នុងនាមឥណ្ឌា និងវៀតណាមកំពុងតែកុងគ្នាជាមួយចិន។ គិតចាប់ពីឆ្នាំ២០០៧មក វៀតណាមនាំចូលអាវុធតិចបំផុតកាលពីឆ្នាំ២០២៣។
នៅក្នុងស្ថានភាពតានតឹងខ្លាំងរវាងចិន និងតៃវ៉ាន់ និងការប៉ះទង្គិចគ្នាជាហូរហែរវាងចិន និងប្រទេសដទៃទៀតនៅសមុទ្រចិនខាងត្បូង វៀតណាមបែរជាមិនទាន់អភិវឌ្ឍឃ្លាំងអាវុធរបស់ខ្លួនឱ្យបានទំនើបទាន់សភាពការណ៍វិវត្តទេ។ ដូច្នេះ អ្នកជំនាញព្រមានថាវៀតណាមអាចនឹងមានបញ្ហាធំបើសិនជម្លោះប្រដាប់អាវុធទ្រង់ទ្រាយធំផ្ទុះឡើងនាពេលអនាគត។
បើវៀតណាមបន្តប្រើប្រាស់ឃ្លាំងអាវុធដែលមិនសូវទំនើបដូចសព្វថ្ងៃនេះ ប្រទេសចិននឹងមានប្រៀប។ នេះជាការលើកឡើងរបស់លោកខាល ថេយើ (Carl Thayer) ជាអ្នកជំនាញខាងបញ្ហាសន្តិសុខជាតិវៀតណាម។ រដ្ឋាភិបាលវៀតណាមមិនធ្វើអត្ថាធិប្បាយលើមូលហេតុដែលខ្លួនមិនទិញអាវុធច្រើនៗសម្រាប់ការពារជាតិ។ មន្ត្រីជាន់ខ្ពស់វៀតណាមធ្លាប់បង្ហើបឱ្យដឹងថារដ្ឋាភិបាលបានចុះកិច្ចព្រមព្រៀងមួយចំនួននៅឯពិធីតាំងពិព័រណ៍យោធាកាលពីខែធ្នូ ឆ្នាំ២០២២។
អ្នកជំនាញយល់ថាមូលហេតុដែលវៀតណាមមិនផ្សព្វផ្សាយកិច្ចព្រមព្រៀងជាសាធារណៈអាចដោយសារការចរចាគ្នាមិនទាន់ឯកភាព១០០%។ អ្វីដែលវៀតណាមត្រូវការគឺនាវា, យន្តហោះ និងយន្តហោះដ្រូន។ សព្វថ្ងៃនេះ វៀតណាមមានប្រព័ន្ធការពារដែនអាកាសដែលទិញពីរុស្ស៊ី និងអ៊ីស្រាអែល។ ប៉ុន្តែប្រព័ន្ធខ្លះទិញចូលតាំងពីជាង៣០ឆ្នាំមុន។ ដូច្នេះ ចាស់ហួសសម័យហើយ។ យកមកប្រើការមិនកើតទេ។ នេះបើតាមរបាយការណ៍ឆ្នាំ២០១៩របស់ក្រសួងការពារជាតិវៀតណាម។
វៀតណាមក៏កំពុងគិតគូរអំពីការធ្វើទំនើបកម្មវិស័យយោធាដែរ។ ប៉ុន្តែប្រទេសនេះមិនអាចផលិតអាវុធធុនធំដោយខ្លួនឯងដូចជាយន្តហោះ និងនាវាជាដើម។ ទីផ្សារលក់អាវុធរបស់រុស្ស៊ីថយចុះខ្លាំងកាលពីឆ្នាំ២០២៣។ វៀតណាមក៏ចេះតែឆ្លៀតឈ្លកទិញអាវុធពីរុស្ស៊ីដែរដោយធ្វើយ៉ាងណាកុំឱ្យធ្វើខុសពីការដាក់ទណ្ឌកម្មរបស់អាមេរិកទៅលើរុស្ស៊ី (ពីបទវាយប្រហារអ៊ុយក្រែន)។ នេះបើយោងតាមមន្ត្រីរដ្ឋាភិបាលវៀតណាមពីររូបដែលបង្ហើបឱ្យដឹងនៅក្នុងលក្ខខណ្ឌមិនបញ្ចេញឈ្មោះ។
កាលពីឆ្នាំ២០២២ ហាណូយប្រកាសជាសាធារណៈថាខ្លួននឹងស្វែងរកដៃគូដទៃទៀតក្រៅពីរុស្ស៊ី។ ប៉ុន្តែការចរចាគ្នាជាមួយប្រទេសលក់អាវុធដទៃទៀតហាក់ដូចជាមិនសូវមានលទ្ធផលជាដុំកំភួនទេ។ វៀតណាមខិតខំចរចាគ្នាជាមួយឥណ្ឌា, អាមេរិក, កូរ៉េខាងត្បូង, ជប៉ុន និងសាធារណរដ្ឋឆេកផងដែរ។ ប៉ុន្តែនៅសាញរឿងតម្លៃដោយសារវៀតណាមចង់បានរបស់ធូរថ្លៃ។
វៀតណាមនឹងរៀបចំពិព័រណ៍យោធាលើកទី២របស់ខ្លួននៅខែធ្នូ ឆ្នាំ២០២៤។ សព្វថ្ងៃនេះ វៀតណាមប្រើប្រាស់នយោបាយកណ្ដាល មិនងាកទៅរកមហាអំណាចណាមួយឱ្យជ្រះស្រឡះទេ ហើយសុខចិត្តរក្សាទំនាក់ទំនងល្អជាមួយប្រទេសមហាអំណាចទាំងអស់។ លោកង្វៀនធីហ្វឿង (Nguyen The Phuong) ជាអ្នកជំនាញខាងវិស័យការពារជាតិវៀតណាមថ្លែងថាបើវៀតណាមមិនទិញអាវុធឱ្យបានច្រើនទេចាំមើលតែមានជម្លោះប្រដាប់អាវុធធំកើតឡើង វៀតណាមនឹងយំស្វាជាមិនខាន៕
ប្រភព៖ Reuters
https://www.reuters.com/world/asia-pacific/vietnam-arms-imports-drop-trickle-despite-regional-tensions-2024-03-14/
ចែករំលែកព័តមាននេះ