អ្នកនាំពាក្យក្រសួងកសិកម្ម ក្រើនរម្លឹកឱ្យផ្ទៀងផ្ទាត់ជាមុនសិន មុននឹងវិនិច្ឆ័យ និងចែករំលែកព័ត៌មានល្បីណាមួយ
រាជធានីភ្នំពេញ ៖ លោក ឃឹម ហ្វីណង់ អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ និងជាអ្នកនាំពាក្យក្រសួង…
រាជធានីភ្នំពេញ ៖ លោក ឃឹម ហ្វីណង់ អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ និងជាអ្នកនាំពាក្យក្រសួង…
រាជធានីភ្នំពេញ ៖ លោក ឃឹម ហ្វីណង់ អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ និងជាអ្នកនាំពាក្យក្រសួង បានក្រើនរំលឹកដល់បងប្អូនសាធារណជនទាំងអស់ ឱ្យបង្កើនការប្រុងប្រយ័ត្ន ថ្លឹងថ្លែង និងរង់ចាំផ្ទៀងផ្ទាត់ជាមុនសិន មុននឹងធ្វើការវិនិច្ឆ័យ ឬចែករំលែកព័ត៌មានល្បីណាមួយ នៅលើបណ្តាញសង្គម ។
ការក្រើនរំលឹករបស់លោក ឃឹម ហ្វីណង់ នាពេលនេះ បន្ទាប់ពីមានហ្វេសប៊ុកផេក ឈ្មោះ Temple News បានបង្ហោះរូបភាពប៉ុន្មានសន្លឹក និងខ្លឺមសារមិនពិត ថា «ធ្វើបាបកសិករខ្មែរម្ល៉េះ ? តម្លៃស្រូវ និងបន្លែ ពេលចាប់ផ្ដើមដាំ តម្លៃខ្ពស់ ដល់ពេលប្រមូលផល តម្លៃចុះថោក ហៅលែងឮ» ។
យោងតាមទំព័រហ្វេសប៊ុករបស់លោក ឃឹម ហ្វីណង់ នៅព្រឹកថ្ងៃទី០៥ ខែមីនា ឆ្នាំ២០២៤នេះ បានអោយដឹងថា «ធ្វើបាបកសិករម្ល៉េះ» ៖ សុំសួរបន្តិច តើបងប្អូនប៉ុន្មាននាក់ ដែលបានឃើញការផុសមួយនេះ ? មានមនុស្សប្រហែល៣ម៉ឺននាក់ បានចែករំលែករូបភាពមួយនេះ និងជិត១០ម៉ឺននាក់ ដែលបានចុច Likes ក្នុងនោះក៏មានមិត្តភ័ក្តិខ្ញុំជាច្រើននាក់ផងដែរ។ ហើយបើស្មានមិនខុសទេ អាចនៅមានមនុស្សរហូតដល់ខ្ទង់លាននាក់ទៀត ដែលបានឃើញរួចហើយ ក៏គិតថា វាគ្រាន់តែជាបញ្ហាមួយនៅក្នុងសង្គម បានត្រឹមតែមើលហើយក៏អូសរំលង ។
លោក ឃឹម ហ្វីណង់ លើកឡើងយ៉ាងដូច្នេះថា «ចុះបើខ្ញុំប្រាប់ថា រូបភាពនេះ គឺជារូបភាព ដែលត្រូវបានគេប្រឌិតឡើងទៅវិញ តើអ្នកមានអារម្មណ៍យ៉ាងណាដែរ ? តើមានមនុស្សប៉ុន្មាននាក់ ដែលបានក្លាយជាឧបករណ៍របស់ក្រុមពួកអ្នកបង្កើតមាតិកាព័ត៌មាន ដើម្បីឱ្យគេចុច Likes និងShares និងគ្រាន់តែដើម្បីយក Views និងប្រយោជន៍ផ្ទាល់ខ្លួន ដោយមិនខ្វល់ពីផលប៉ះពាល់ និងការជះឥទ្ធិពលជាអវិជ្ជមានដល់សង្គមជាតិ ? ប្រសិនបើពេលថ្មីៗនេះ អ្នកបានចុច Likes និងShares រូបភាព ដែលច្រើនមានគូសរង្វង់មូលព៌ណក្រហមពីលើ និងមានសញ្ញាទ្រុងជ្រូក(Hashtag #) ចម្លែកៗ អ្នកប្រហែលជាជនរងគ្រោះ ដោយមិនដឹងខ្លួន នៃការផ្សព្វផ្សាយក្នុងគោលបំណងបែបនេះហើយ។ ផេកនេះ គ្រាន់តែជាឧទាហរណ៍ ជាក់ស្តែងមួយតែប៉ុណ្ណោះ នៅមានករណីស្រដៀងគ្នានេះផ្សេងៗទៀត ដែលបានយកកសិកម្ម និងបញ្ហាសង្គមនានា មកធ្វើជាចំណុចទាក់ទាញចំណាប់អារម្មណ៍ ក្នុងគោលបំណងគ្រាន់តែ ដើម្បីប្រជាប្រិយភាពផ្ទាល់ខ្លួនតែប៉ុណ្ណោះ តួយ៉ាង ដូចជាករណីផ្សព្វផ្សាយរូបភាពធ្វើឱ្យមានការភ័ន្តច្រលំថា ជាបឹងទន្លសាបទាំងមូល នៃការប្រើប្រាស់ឧបករណ៍នេសាទ ស្របច្បាប់ នៅតំបន់កន្លុកបាយក្អែក នៅឃុំផាត់សណ្តាយកាលពីពេលថ្មីៗនេះ ជាដើម» ។
លោក ឃឹម ហ្វីណង់ បានបញ្ជាក់អោយដឹងទៀតថា «មិនបានបដិសេធថា វិស័យកសិកម្មគ្មានបញ្ហានោះទេ ហើយក៏ទទួលស្គាល់ថា នៅមានរឿងជាច្រើននៅក្នុងវិស័យមួយនេះ ដែលទាមទារឱ្យមានការចូលរួមឱ្យបានទូលំទូលាយ ឈឺឆ្អាល និងជួយដោះស្រាយទាំងអស់គ្នាដែរ តែទង្វើបែបនេះមិនមែនជាការចូលរួមឡើយ។ វាពិតជាគួរឱ្យសោកស្តាយ ក្នុងខណៈពេល ដែលរាជរដ្ឋាភិបាលកំពុងតែព្យាយាមដោះស្រាយបញ្ហាប្រឈម ក្នុងជីវភាពប្រចាំថ្ងៃរបស់ប្រជាកសិករ យ៉ាងសស្រាក់ស្រាំ ស្ទើរគ្មានលោះពេលសូម្បីតែមួយថ្ងៃ តែបែរជាមានមនុស្សមួយក្រុមតូច ព្យាយាមធ្វើរឿងបែបនេះ បង្កភាពចលាចល មិនចាំបាច់នៅក្នុងសង្គម ដើម្បីកេងយកផលចំណេញផ្ទាល់ខ្លួន យ៉ាងអាត្មានិយមទៅវិញ» ។
គួរបញ្ជាក់ថា លោក ឃឹម ហ្វីណង់ អភិបាលរងខេត្តសៀមរាប និងជាអតីតអភិបាលស្រុកបន្ទាយស្រី ដ៏ល្បីល្បាញ ត្រូវបានតែងតាំងជាអនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ក្នុងអាណត្តិទី៧ នេះបើតាមព្រះរាជក្រឹត្យរបស់ព្រះមហាក្សត្រ ៕
ចែករំលែកព័តមាននេះ