រាជធានីភ្នំពេញ ៖ ផ្ទះតៀមមួយកន្លែងត្រូវបានអគ្គិភ័យឆាបឆេះបណ្តាលអោយខូចខាតសម្ភារៈទាំងស្រុង ព្រមទាំងប្រាក់មួយចំនួន ខណៈពេលដែលម្ចាស់បិទទ្វារផ្ទះទៅដាំបាយហូបនៅខ្យូសខាងក្រោយផ្ទះ ។
ហេតុការណ៍នេះបង្កអោយមានការភ្ញាក់ផ្អើល កាលពីវេលាម៉ោងប្រមាណម៉ោង១២និង៥៥នាទីរសៀល ថ្ងៃទី០៥ ខែមិនា ឆ្នាំ២០២៤ នៅតាមផ្លូវបេតុង ក្នុងភូមិជំរៅ សង្កាត់គោករកា ខណ្ឌព្រែកព្នៅ រាជធានីភ្នំពេញ ។
តាមនគរបាលអោយដឹងថា ផ្ទះដែលត្រូវភ្លើងឆេះជាផ្ទះតៀមធ្វើពីដែក ប្រក់ស័ង្កសី មានទំហំប្រមាណ៨ម៉ែត្រគុណ១៥ម៉ែត្រ មានម្ចាស់ឈ្មោះឈឿន បុត្រា ភេទប្រុស អាយុ៤០ឆ្នាំ មុខរបរជាជាងដែក ។
តាមម្ចាស់ បានអោយដឹងថា នៅមុនពេលកើតហេតុ គាត់ និងក្រុមគ្រួសារបានបិទទ្វារផ្ទះខាងមុខ ហើយក៏បាននាំគ្នាហូបបាយនៅខ្យូសក្បែរស្រះទឹកខាងក្រោយផ្ទះ ស្រាប់តែភ្លើងបានឆាបឆេះផ្ទះហុយទ្រលោម ។
ភ្លាមៗអ្នកភូមិនាំគ្នាជួយពន្លត់ តែពុំអាចទប់ស្កាត់បាន ហើយនគរបាលក៏បានទាក់ទង់ហៅរថយន្តពន្លត់អគ្គិភ័យទៅអន្តរាគមន៍បាញ់ពន្លត់ហើយរលត់ទៅវិញ ។តាមម្ចាស់ផ្ទះបានអោយដឹងថា សម្ភារៈរួមមានគ្រែ តុ ទូរ ខោអាវ ជាដើម នៅក្នុងផ្ទះត្រូវភ្លើងឆេះអស់គ្មានសល់ រួមជាមួយប្រាក់ចំនួន៣៥០០ដុល្លារទៀត ។
តាមម្ចាស់ផ្ទះ បានអោយដឹងទៀតថា អគ្គិភ័យនេះបណ្តាលមកពីទុស្សេខ្សែភ្លើង ដែលបំពាក់នៅជាប់ជញ្ជាំងហើយឆេះរាលដាលយ៉ាងឆាបរហ័ស ។ នៅក្នុងហេតុការណ៍នេះ រថយន្តពន្លត់អគ្គិភ័យចំនួន២គ្រឿងបានទៅអន្តរាគមន៍បាញ់ពន្លត់ពុំបណ្តាលអោយឆេះរាលដាលឡើយ ៕
ចែករំលែកព័តមាននេះ