រាជធានីភ្នំពេញ ៖ អង្គភាពប្រឆាំងអំពើពុករលួយ (ACU) បានបញ្ជាក់ថា ក្នុងខែកុម្ភៈ ឆ្នាំ២០២៤ ពេញមួយខែនេះ បានដំណើរការ និងសម្រេចលើពាក្យបណ្តឹង…
រាជធានីភ្នំពេញ ៖ អង្គភាពប្រឆាំងអំពើពុករលួយ (ACU) បានបញ្ជាក់ថា ក្នុងខែកុម្ភៈ ឆ្នាំ២០២៤ ពេញមួយខែនេះ បានដំណើរការ និងសម្រេចលើពាក្យបណ្តឹង ចំនួន៤៩ និងក្នុងនេះ ក៏មានមន្ត្រីចំនួន២៨៨នាក់ បានប្រកាសទ្រព្យសម្បត្តិផងដែរ ។
លោក សយ ច័ន្ទវិចិត្រ ឧបការី និងជាមន្ត្រីនាំពាក្យអង្គភាពប្រឆាំងអំពើពុករលួយ បានថ្លែងប្រាប់បណ្តាញសារព័ត៌មានក្នុងកិច្ចប្រជុំលើកទី៣២ នៃអាណត្តិទី៣ នៃក្រុមប្រឹក្សាជាតិប្រឆាំងអំពើពុករលួយ នារសៀលថ្ងៃទី២៩ ខែកុម្ភៈ ឆ្នាំ២០២៤នេះឱ្យដឹងថា មន្ត្រីចំនួន ២៨៨នាក់ បានមកប្រកាសទ្រព្យសម្បត្តិ និងបំណុល ក្នុងនោះ មន្ត្រីទើបទទួលបានការតែងតាំងថ្មី ចំនួន១៥១នាក់ និងមន្ត្រី ១៣៧នាក់ទៀត បានមកប្រកាសទ្រព្យសម្បត្តិ និងបំណុល ។
ទាក់ទិនទៅនឹងពាក្យប្តឹងវិញ ត្រូវបានមន្ត្រីអ្នកនាំពាក្យអង្គភាពប្រឆាំងអំពើពុករលួយរូបនេះ ឲ្យដឹងដែរថា ក្នុងខែកុម្ភៈនេះ អង្គភាពរបស់លោក បានដំណើរការពិនិត្យ វិភាគ និងធ្វើការសម្រេចលើពាក្យប្ដឹង ដែលមានក្នុងខែនេះ ចំនួន ៤៩ពាក្យប្ដឹង ។
ចំពោះកិច្ចការងារផ្សេងៗទៀត ត្រូវបានមន្ត្រីអ្នកនាំពាក្យរូបនេះ បានលើកឡើងឱ្យដឹងផងថា ក្នុងនេះដូចជាការងារបង្ការ ទប់ស្កាត់អំពើពុករលួយ អង្គភាពប្រឆាំងអំពើពុករលួយ បានចូលរួមសង្កេតការណ៍ការប្រឡង ចំនួន ២លើក រួមមាន ៖ ការប្រឡងជ្រើស រើសគ្រូបង្រៀនអប់រំកាយ និងកីឡាជំនាន់ទី៣១ ឱ្យចូលបំរើការងារក្នុងក្របខណ្ឌក្រសួងអប់រំ យុវជន និងកីឡា ចំនួន១០០នាក់ និងការប្រឡង ថ្នាក់ជាតិជ្រើសរើសសិស្ស-និស្សិតចូលរៀនថ្នាក់បរិញ្ញាបត្រនៅតាមគ្រឹះស្ថានបណ្តុះបណ្តាលក្នុងវិស័យសុខាភិបាល ចំនួន ៣.៨៩៥នាក់ ក្នុងចំណោមបេក្ខជនដាក់ពាក្យប្រឡង ចំនួន៩ ៧៧៤នាក់ៗ អង្គភាពប្រឆាំងអំពើពុករលួយ សង្កេតឃើញថា ដំណើរការប្រឡងទាំងពីរលើកនេះ ចាប់តាំងពីការរៀបចំនីតិវិធីប្រឡង ដំណើរការប្រឡង ដំណើរការកំណែ ការស្រង់-បូកពិន្ទុ និងការប្រកាសលទ្ធផលស្ថាពរប្រព្រឹត្តទៅ ដោយរលូន នៅគ្រប់ដំណាក់កាលទាំងអស់ នៃដំណើរការប្រឡង ។
ជាមួយគ្នានេះ លោកក៏បានលើកឡើងដោយបញ្ជាក់បន្ថែមថា ក្រៅពីនេះអង្គភាពប្រឆាំងអំពើពុករលួយក៏ បានចុះសង្កេតការណ៍លទ្ធកម្មសាធារណៈ ចំនួន ៤៥គម្រោង របស់អង្គភាពលទ្ធកម្ម ចំនួន ១៣អង្គភាព និងបានចុះប្រតិបត្តិការនៅតាមមូលដ្ឋានជាក់ស្តែងមួយចំនួនទៀត តាមសំណើ របស់ក្រសួងសេដ្ឋកិច្ច និងហិរញ្ញវត្ថុ និងក្រសួងផ្សេងៗទៀត ៕
ចែករំលែកព័តមាននេះ