មិនទាន់ប្រយុទ្ធផង! Apple លុបចោលគម្រោងឡានអគ្គិសនីបើកបរដោយខ្លួនឯង
សហរដ្ឋអាម៉រិក ៖ ក្រុមហ៊ុន Apple ត្រូវបានរាយការណ៍ថា បានលុបចោលគម្រោងរបស់ខ្លួនក្នុងការ
សហរដ្ឋអាម៉រិក ៖ ក្រុមហ៊ុន Apple ត្រូវបានរាយការណ៍ថា បានលុបចោលគម្រោងរបស់ខ្លួនក្នុងការផលិតរថយន្តអគ្គិសនីបើកបរដោយខ្លួនឯង ឬ Autonomous Electric Vehicles (A-VE) ពោលគឺមួយទសវត្ស បន្ទាប់ពីក្រុមហ៊ុនខ្នាតយក្សផលិតទូរសព្ទ iPhone លេចចេញពាក្យចចាមអារ៉ាមថា កំពុងធ្វើការលើគម្រោងដ៏ធំមួយនេះ។ នេះបើយោងតាមប្រភពពីកាសែត The New York Times និង BBC ចេញផ្សាយកាលពីថ្ងៃទី២៧ ខែកុម្ភៈ ឆ្នាំ២០២៤ កន្លងទៅ។
ក្រុមហ៊ុនបច្ចេកវិទ្យាខ្នាតយក្សពហុជាតិរបស់សហរដ្ឋអាម៉េរិក Apple មិនដែលបានទទួលស្គាល់ជាសាធារណៈចំពោះគម្រោងដែលពាក់ព័ន្ធនឹងមនុស្សប្រហែល២ពាន់នាក់មួយនេះឡើយ។ យោងតាមសារព័ត៌មាន Bloomberg រាយការណ៍ថា បុគ្គលិកជាច្រើននាក់ពីគម្រោងនេះ នឹងត្រូវផ្លាស់ទៅផ្នែក AI របស់ក្រុមហ៊ុនផលិត iPhone។ ក្រុមហ៊ុន Apple មិនបានឆ្លើយតបភ្លាមៗ ចំពោះសំណើរបស់សារព័ត៌មាន BBC សម្រាប់ការអត្ថាធិប្បាយលើបញ្ហានេះទេ។
ក្រុមការងាររថយន្តក្រុមហ៊ុន Apple ត្រូវបានរាយការណ៍ថា គឺជាក្រុមគម្រោងពិសេសដែលជាផ្នែកមួយរបស់នាយកប្រតិបត្តិក្រុមហ៊ុន លោក Tim Cook ដែលឈ្មោះថា «Project Titan» ដោយត្រូវបានចំណាយប្រាក់រាប់ពាន់លានដុល្លារលើការស្រាវជ្រាវ និងអភិវឌ្ឍន៍។ ដំបូងឡើយ ក្រុមហ៊ុន Apple ត្រូវបានគេរាយការណ៍ថា កំពុងធ្វើការលើរថយន្តស្វ័យប្រវត្តិពេញលេញដោយគ្មានចង្កូត និងឈ្នាន់ហ្វ្រាំង ហើយនិងឈ្នាន់ហ្គែរ ខណៈដែលក្រុមនេះត្រូវបានគេយល់ថា ត្រូវការពេលច្រើនឆ្នាំទៀតក្នុងការផលិតរថយន្ត។ ក្រុមហ៊ុន Apple បាននិងកំពុងស្វែងរកឱកាសនៃការផលិតផ្សេងទៀតក្រៅពី iPhone និងកុំព្យូទ័រ ដែលរួមទាំងកាសស្តាប់និម្មិត Vision Pro ដែលទើបចេញកាលពីពេលថ្មីៗនេះ។
តម្រូវការរថយន្តអគ្គិសនី បានធ្លាក់ចុះក្នុងខែថ្មីៗនេះ ដោយសារការចំណាយលើការខ្ចីប្រាក់នៅតែមានកម្រិតខ្ពស់ ដែលធ្វើឱ្យទីផ្សារប្រកួតប្រជែងកាន់តែខ្លាំង ខណៈដែលក្រុមហ៊ុនធំៗព្យាយាមយកឈ្នះលើតម្រូវការអតិថិជន។ ជាក់ស្តែង កាលពីខែមុន ក្រុមហ៊ុនផលិតរថយន្តអគ្គិសនី Tesla បានព្រមានថា កំណើនការលក់របស់ខ្លួននឹងធ្លាក់ចុះនៅឆ្នាំនេះ ជាងកាលពីឆ្នាំ ២០២៣។
ក្រុមហ៊ុនដែលដឹកនាំដោយមហាសេដ្ឋីអាម៉េរិក លោក Elon Musk បាននឹងកំពុងកាត់បន្ថយតម្លៃនៅក្នុងទីផ្សារសំខាន់ៗ ជុំវិញពិភពលោក ដោយរួមទាំងអឺរ៉ុប និងចិនផងដែរ ដោយសារតែក្រុមហ៊ុនប្រឈមមុខនឹងការប្រកួតប្រជែងដ៏ស្វិតស្វាញពីគូប្រជែងរបស់ចិនដូចជា BYD ជាដើម៕
ចែករំលែកព័តមាននេះ