ខេត្តបាត់ដំបង ៖ រដ្ឋបាលខេត្តបាត់ដំបង នៅថ្ងៃទី២៦ ខែកុម្ភៈ ឆ្នាំ២០២៤នេះ បានចេញសេចក្តីបំភ្លឺព័ត៌មានពាក់ព័ន្ធនឹងកាលពីថ្មីៗនេះ មានបណ្តាញសង្គម បានបង្ហោះពីច្រាំងស្ទឹងសង្កែ ដែលបានបាក់ស្រុត…
ខេត្តបាត់ដំបង ៖ រដ្ឋបាលខេត្តបាត់ដំបង នៅថ្ងៃទី២៦ ខែកុម្ភៈ ឆ្នាំ២០២៤នេះ បានចេញសេចក្តីបំភ្លឺព័ត៌មានពាក់ព័ន្ធនឹងកាលពីថ្មីៗនេះ មានបណ្តាញសង្គម បានបង្ហោះពីច្រាំងស្ទឹងសង្កែ ដែលបានបាក់ស្រុត ។
ចំពោះករណីនេះ រដ្ឋបាលខេត្តបាត់ដំបង បានអោយដឹងថា កាលពីថ្ងៃទី១៥ ខែកុម្ភៈ ឆ្នាំ២០២៤ រដ្ឋបាលខេត្ត បានទម្លាក់កម្ពស់ទឹកស្ទឹងសង្កែ ដើម្បីសាងសង់ស្ថានីយបូមទឹកឆៅ សម្រាប់ផ្គត់ផ្គង់រោងចក្រផលិតកម្មទឹកស្អាត ដែលជាជំនួយហិរញ្ញប្បទានរបស់ធនាគារអភិវឌ្ឍន៍អាស៊ី (ADB) ទីភ្នាក់ងារបារាំងសម្រាប់ការអភិវឌ្ឍ (AFD) និងថវិកាបដិភាគរបស់រាជរដ្ឋាភិបាលកម្ពុជា មានសមត្ថភាពផលិតទឹកស្អាតបាន ៥០.០០០ម៉ែត្រគូប ក្នុងមួយថ្ងៃ ដែលមានទីតាំងស្ថិតនៅភូមិកំពង់សីមា សង្កាត់វត្តគរ ក្រុងបាត់ដំបង ខេត្តបាត់ដំបង ។
រដ្ឋបាលខេត្តបាត់ដំបង បានបញ្ជាក់ថា ប៉ុន្តែគួរឱ្យសោកស្តាយ ដោយសារបន្ទាប់ពីការទម្លាក់កម្ពស់ទឹករួច យើងពិនិត្យឃើញថា ច្រាំង
ស្ទឹងដែលទើបនឹងកសាងរួច មានកន្លែងខ្លះ ត្រូវបាក់ស្រុត ដែលកន្លងមកក្រុមហ៊ុន បានខិតខំធ្វើការកសាងយ៉ាងយកចិត្តទុកដាក់ចំពោះទីតាំងច្រាំងស្ទឹង ដែលធ្លាប់តែបាក់ស្រុតនេះ ដោយកាយយកដីស្អុយចេញ និងចាក់បំពេញដីឥដ្ឋ និងក្រាលដុំថ្ម ដោយកិនបង្ហាប់តាមស្រទាប់នីមួយៗ។ ច្រាំងស្ទឹងដែលបាក់ស្រុតនេះ ស្ថិតក្នុងអំឡុងពេលសុពលភាពជួសជុលថែទាំរបស់ក្រុមហ៊ុននៅឡើយ ដូចនេះ ក្រុមហ៊ុន នឹងបន្តសិក្សាលក្ខណៈបច្ចេកទេសបន្ថែមទៀត ដើម្បីរៀបចំជួសជុលច្រាំងស្ទឹងឡើងវិញ ហើយរដ្ឋបាលខេត្ត នឹងពិនិត្យតាមដានយ៉ាងយកចិត្តទុកដាក់ ចំពោះលក្ខណៈបច្ចេកទេស ដែលក្រុមហ៊ុន នឹងបន្តធ្វើការជួសជុលឡើងវិញ នៅពេលខាងមុខនេះ ។
សូមជម្រាបថា រដ្ឋបាលខេត្តបាត់ដំបង បានចេញសេចក្តីបំភ្លឺព័ត៌មានដូចខាងលើនេះ បន្ទាប់ពីមានបណ្តាញសង្គមបានផ្សាយថា
ច្រាំងដងស្ទឹងសង្កែ ត្រើយខាងលិច ក្បែរវិមានឯករាជ្យ ដែលទើបសាងសង់មិនទាន់បាន១ឆ្នាំផង ស្រាប់តែពេលនេះ បានបាក់ស្រុត ជាហេតុធ្វើអោយប្រជាពលរដ្ឋមានការព្រួយបារម្ភយ៉ាងខ្លាំង ខណៈពួកគាត់ដើរហាត់ប្រាណ នាពេលព្រឹក និងល្ងាច ។
រយៈពេល៣ថ្ងៃចុងក្រោយនេះមានប្រជាពលរដ្ឋជាច្រើននាក់ បានយកដៃគក់ទ្រូងហួសចិត្ត ដោយសារពួកគាត់បានឃើញការបាក់ស្រុតច្រាំងដងស្ទឹងសង្កែ ដែលទើបតែកសាងថ្មី ប៉ុន្តែគ្មានគុណភាព ហើយបាក់ស្រុតបណ្តើរទៅហើយ ។
បើតាមការសន្និដ្ឋានពីពលរដ្ឋថា ការបាក់ស្រុតអាចមកពីបច្ចេកទេស នៃការស្ថាបនាច្រាំងស្ទឹងមិនទាន់មានកម្រិតស្តង់ដារព្រោះទាំងនៅក្នុងក្រុង ក៏ដូចជានៅតាមស្រុកមួយចំនួន បានប្រេះស្រុតយ៉ាងខ្លាំង ដែលអាចបង្កជាហានិភ័យដល់អ្នកបើកបរយានយន្ត ព្រោះចំណុចខ្លះ មិនត្រឹមតែស្រុតច្រាំងស្ទឹងប៉ុណ្ណោះទេ ថែមទាំងប្រេះទាញដល់ផ្លូវថ្នល់មួយចំហៀងថែមទៀត ។
ទាក់ទងច្រាំងស្ទឹង ដែលទើបស្ថាបនារួច មិនបានមួយឆ្នាំផង ស្រាប់តែបាក់ស្រុត ប្រជាពលរដ្ឋបានស្នើដល់អាជ្ញាធរខេត្ត ឬក្រសួងពាក់ព័ន្ធឲ្យពិនិត្យឡើងវិញ ទៅលើក្រុមហ៊ុន ដែលម៉ៅការសាងសង់ ព្រោះបញ្ហាទាំងនេះ ក៏ស្ថិតនៅក្រោមក្រសែភ្នែករបស់ភ្ញៀវទេសចរជាតិនិងអន្តរជាតិផងដែរ ៕
ចែករំលែកព័តមាននេះ