រាជធានីភ្នំពេញ ៖ នារសៀលថ្ងៃទី២៤ កុម្ភៈ គឺនៅមុនកាបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ខិតមកជិតទៅហើយនោះ លោក ឃួង ស្រេង…
រាជធានីភ្នំពេញ ៖ នារសៀលថ្ងៃទី២៤ កុម្ភៈ គឺនៅមុនកាបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ខិតមកជិតទៅហើយនោះ លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញ អាជ្ញាធរដែនដី រួមជាមួយមន្ត្រីរៀបចំការបោះឆ្នោតរាជធានីភ្នំពេញ បានអញ្ជើញទៅពិនិត្យមើលដំណើរការរៀចំការិយាល័យបោះឆ្នោតនៅ វិទ្យាល័យព្រះស៊ីសុវត្ថិ ស្ថិតក្នុងខណ្ឌដូនពេញ ចំនួន២ការិយាល័យ (ភូមិភាគ១) ។
លោកអភិបាល បានណែនាំឲ្យមន្ត្រីពាក់ពន្ធ័ ក៏ដូចអាជ្ញាធរដែនដី ត្រូវបន្តពង្រឹងសន្តិសុខ សណ្តាប់ធ្នាប់ របៀបរៀបរយសាធារណៈ ឲ្យបានកាន់តែលំប្រសើរថែមទៀត ខណៈការបោះឆ្នោតជ្រើសតាំងសមាជិកព្រឹទ្ធសភា និតិកាលទី៥ នឹងដំណើរការនៅថ្ងៃអាទិត្យ ទី២៥ កុម្ភៈ ស្អែកនេះហើយ។ យើងត្រូវសម្រេចឲ្យបាន នូវការបោះឆ្នោតមួយ ដែលសេរី ត្រឹមត្រូវ យុត្តិធម៏ គ្មានការបំភិតបំភ័យ ឬគំរាមកំហែងក្នុងបរិបទប្រជាធិបតេយ្យសេរីពហុបក្ស។ តាមការសង្កេតជាទូទៅ ក្នុងដំណាក់កាល នៃយុទ្ធនាការឃោសនារកសំឡេងឆ្នោតរបស់គណបក្សនយោបាយ ក្នុងរយៈពេល១៤ថ្ងៃកន្លងទៅ គឺមានបរិយាកាសល្អ ពុំមានអំពើហិង្សា គំរាមកំហែង បំភិតបំភ័យកើតឡើងគួរអោយកត់សម្គាល់នោះទេ ក្រៅពីការពង្រឹងសន្តិសុខ សណ្តាប់ធ្នាប់ក្នុងរាជធានីភ្នំពេញ ។
លោក ឃួង ស្រេង ក៏បានណែនាំ ឲ្យបាញ់ទឹកលាងសម្អាតបរិវេណ ជុំវិញការិយាល័យបោះឆ្នោត ឲ្យបានស្អាត នឹងដាក់កម្លាំង យាមកាមឲ្យបានត្រឹមត្រូវ ។
សូមបញ្ជាក់ថា អង្គបោះឆ្នោត ដែលជាសមាជិកក្រុមប្រឹក្សាសង្កាត់ ក្នុងតំណែងដែលត្រូវបោះឆ្នោតសម្រាប់រាជធានីភ្នំពេញ មានចំនួន ៩១១នាក់ ក្នុងនោះ ក៏មានអ្នកតំណាងរាស្ត្រ ចំនួន១២រូបផងដែរ ៕
ចែករំលែកព័តមាននេះ