តើមានបងប្អូនប៉ុន្មាននាក់ហើយដែលបានផ្លាស់ប្ដូរទម្លាប់របស់ខ្លួនឯង នៅពេលចេញទៅកម្មវិធីជប់លៀង ឬកម្មវិធីជួបជុំមិត្តភក្តិផឹកស៊ីម្ដងៗនៅខាងក្រៅពេលយប់ ។ គេសង្កេតឃើញមនុស្សជាច្រើន លែងកាន់យានយន្ត ឬជិះម៉ូតូបើកដោយខ្លួនឯងហើយ គឺហៅម៉ូតូកង់បីតាមអេបជិះវិញ ដើម្បីជាមធ្យោបាយធ្វើដំណើរវិញ ។…
តើមានបងប្អូនប៉ុន្មាននាក់ហើយដែលបានផ្លាស់ប្ដូរទម្លាប់របស់ខ្លួនឯង នៅពេលចេញទៅកម្មវិធីជប់លៀង ឬកម្មវិធីជួបជុំមិត្តភក្តិផឹកស៊ីម្ដងៗនៅខាងក្រៅពេលយប់ ។ គេសង្កេតឃើញមនុស្សជាច្រើន លែងកាន់យានយន្ត ឬជិះម៉ូតូបើកដោយខ្លួនឯងហើយ គឺហៅម៉ូតូកង់បីតាមអេបជិះវិញ ដើម្បីជាមធ្យោបាយធ្វើដំណើរវិញ ។
ក្រោយពីមានករណីគ្រោះថ្នាក់ចរាចរណ៍កើតឡើងជារឿយៗដែលបង្កឡើងដោយអ្នកបើកបរមួយចំនួនមានជាតិស្រវឹងលើសកម្រិត រហូតបាត់បង់ស្មារតីម្ចាស់ការខ្លួនឯង បង្កឱ្យកើតមានគ្រោះថ្នាក់ ចរាចរណ៍រហូតធ្វើឱ្យបាត់បង់ជីវិតអ្នកដទៃអស់ជាច្រើននាក់នៅលើដងផ្លូវ ។
ទន្ទឹមនឹងការកើតមានគ្រោះថ្នាក់ចរាចរណ៍ច្រើនខ្លាំងពេក នាយករដ្ឋមន្ត្រី សម្តេចធិបតី ហ៊ុន ម៉ាណែត កាលពីល្ងាចថ្ងៃទី២៣ ខែមករា ឆ្នាំ២០២៤ ក៏បានប្រកាសណែនាំឱ្យមេប៉ូលិសចាត់ចែងកម្លាំងប៉ូលិសដាក់ប៉ុស្តិ៍ត្រួតពិនិត្យអ្នកបើកបរដែលមានជាតិស្រវឹងទាំងអស់ ដែលសព្វថ្ងៃកម្លាំងបានចេញឆែកទៅតាមគោលដៅដែលបានកំណត់ ប្រសិនបើរកឃើញអ្នកបើកបរណាមានគ្រឿងស្រវឹងលើសកំណត់នោះ នឹងចាប់ផាកពិន័យតាមផ្លូវច្បាប់ ។
ជាការកត់សម្គាល់ ក៏ឃើញបងប្អូនយើងបានចូលរួមគោរពតាមបទបញ្ជាក្នុងការគោរពច្បាប់ចរាចរណ៍ ពិសេស កុំឱ្យមានជាតិស្រវឹងនៅពេលបើកបរទេ ដោយឃើញគាត់កែប្រែមកកក់ហៅម៉ូតូកង់បី ឬរថយន្តតាក់ស៊ីជិះ ក្រោយពីពួកគាត់ចេញពីកម្មវិធីជប់លៀងណាមួយ ឬជួបជុំមិត្តភក្តិរបស់គាត់នៅហាងពេលរាត្រី ។
ជួបជាមួយបុរសម្នាក់ ដែលសុំមិនបញ្ចេញឈ្មោះបានប្រាប់កោះសន្តិភាពថា ក្រោយពីឃើញកើតមានគ្រោះថ្នាក់ចរាចរណ៍ច្រើនពេកក៏ធ្វើឱ្យគាត់ខ្លាចរអារ និងខ្លាចមានវិប្បដិសារី ខណៈគាត់ក៏ជាមនុស្សម្នាក់ដែលសំបូរកម្មវិធីជួបជុំផឹកពេលយប់ផងនោះ ។ ដូច្នេះ ដើម្បីឱ្យមានសុវត្ថិភាព ទាំងការធ្វើដំណើរ និងការពារកុំឱ្យសមត្ថកិច្ចហៅផ្លុំនោះ គឺគាត់ប្តូរមកជិះម៉ូតូកង់បី ហៅតាមអេបវិញ ។ គាត់បន្តថា ការធ្វើបែបនេះ គឺល្អខ្លាំងណាស់សម្រាប់គាត់ ព្រោះមិនខ្វល់ពីការគ្រោះថ្នាក់ចរាចរណ៍ ហើយក៏មិនខ្វល់ពីត្រូវប៉ូលិសហៅផ្លុំមាត់ដែរ ។
ចុះចំណែកបងប្អូនវិញ តើគិតយ៉ាងណាចំពោះវិធីសាស្ដ្រនេះ? ហើយបងប្អូនធ្លាប់ហៅម៉ូតូកង់បីជិះដែរទេ នៅពេលដែលចេញទៅកម្មវិធីខាងក្រៅនាពេលរាត្រីនោះ?
ប្រសិនបើបងប្អូនចង់ដឹងថា តើផឹកស្រាប៉ុន្មានកំប៉ុង កុំឱ្យប៉ូលិសចាប់? កោះសន្តិភាពសុំលើកយកតាមលោកវេជ្ជបណ្ឌិត និត ប៊ុនតុងយី បានបកស្រាយនៅក្នុងទំព័រហ្វេសប៊ុករបស់លោកគ្រូថា ៖ «តើយើងផឹកប៊ីយេរ (ស្រាបៀរ) ប៉ុន្មានកំប៉ុងទៅ ដើម្បីកុំឱ្យភ័យរឿងប៉ូលិសចាប់?
លោកគ្រូបានបញ្ជាក់ទៀតថា ការផឹកចាប់ពី២កំប៉ុងឡើង គឺវាលើសហើយ ហើយអ្នកដែលផឹកហ្នឹងគីឡូ៧០ បើផឹកក្រោយ១៥នាទី គឺដឹងតែលើសហើយ ។ ហើយប្រសិនបើយើងផឹក១កំប៉ុង អត់លើសកម្រិតតែម្ដង ។ ដោយ ៖ ថោង ច័ន្ទវណ្ណា
ចែករំលែកព័តមាននេះ