រាជធានីភ្នំពេញ ៖ សម្ដេចតេជោ ហ៊ុន សែន ជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ បានប្រកាសគាំទ្រអ្នកឧកញ៉ា ឡេង ណាវ៉ាត្រា បន្ទាប់ពីបានឃើញអ្នកឧកញ៉ា…
រាជធានីភ្នំពេញ ៖ សម្ដេចតេជោ ហ៊ុន សែន ជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ បានប្រកាសគាំទ្រអ្នកឧកញ៉ា ឡេង ណាវ៉ាត្រា បន្ទាប់ពីបានឃើញអ្នកឧកញ៉ា ឡេង ណាវ៉ាត្រា ចង់ចូលរួមឈរឈ្មោះបោះឆ្នោតធ្វើជាប្រធាន «សមាគមសិល្បករខ្មែរ» ។
សម្តេចតេជោ ហ៊ុន សែន បានបង្ហោះសារនៅលើបណ្តាញសង្គម ថា «បន្ទាប់ពីបានឃើញអ្នកឧកញ៉ា ឡេង ណាវ៉ាត្រា បង្ហាញពីបំណងចង់ឈរឈ្មោះជាប្រធានសមាគមសិល្បៈ រួចមក ខ្ញុំមានអារម្មណ៍កក់ក្តៅសម្រាប់ អនាគតសមាគមមួយនេះ»។
សម្តេចតេជោ ហ៊ុន សែន បន្តថា កន្លងមកក៏ដូចជាបច្ចុប្បន្ន ខ្ញុំក៏បានរួមចំណែកជួយដល់សិល្បករ សិល្បការីនី ដែលជួបការលំបាកតាមរយៈសមាគមផង និងតាមបុគ្គលផង ខ្ញុំគិតថា បញ្ហាថវិកាទ្រទ្រង់សមាគម ដើម្បីជួយដោះស្រាយការលំបាករបស់សមាគម នៅតែជាបញ្ហាប្រឈមដ៏ធំ ។
សម្តេចតេជោ ហ៊ុន សែន បានបន្ថែមទៀតថា ដូច្នេះប្រសិនបានអ្នកឧកញ៉ា ឡេង ណាវ៉ាត្រា ជាប្រធានសមាគម យើងពិតជាដោះស្រាយបានមួយផ្នែកធំ រាប់ទាំងស្នាក់ការធ្វើការរបស់សមាគមផង ។
យ៉ាងណា សម្តេចតេជោ បានបញ្ជាក់ថា សម្តេចមិនជ្រៀតជ្រែតលើការបោះឆ្នោត រើសប្រធានសមាគមទេ តែដោយសារយើងត្រូវការសិល្បៈ ដែលមានការសាមគ្គីភាព និងរីកចម្រើនទៅមុខ ទើបសម្តេចផ្តល់ការគាំទ្រ បែបនេះ ។
សម្តេចតេជោ ប្រកាសគាំទ្របែបនេះ បន្ទាប់ពីអ្នកឧកញ៉ា ឡេង ណាវ៉ាត្រា បានប្រកាសនៅលើផេកហ្វេសប៊ុកផ្លូវការនៅថ្ងៃទី២០ កុម្ភៈនេះថា ៖ «ប្រសិនបើមានការគាំទ្រ ខ្ញុំបាទសូមចូលរួមឈរឈ្មោះជាបេក្ខភាពប្រធានសមាគមសិល្បករខ្មែរ មួយរូបដែរ ដើម្បីចូលរួមចំណែកតាមលទ្ធភាព និងសមត្ថភាព» ។
សូមជម្រាបថា អ្នកនាង ចន ច័ន្ទលក្ខិណា បានប្រកាសនៅលើបណ្តាញសង្គមកាលពីថ្ងៃទី១៣ ខែកុម្ភៈ ថា ក្នុងនាមសមាគមសិល្បករខ្មែរ នាងខ្ញុំមានកិត្តិយសសូមគោរពជម្រាបជូនលោកជំទាវម៉ែ ហ៊ុន ស៊ីណាត និងបងប្អូនសិល្បករ-សិល្បការិនី ក៏ដូចជាសាធារណជនទាំងអស់ មេត្តាជ្រាបថា យោងតាមលក្ខន្តិកៈរបស់សមាគមសិល្បករខ្មែរ ដែលទទួលស្គាល់ដោយក្រសួងមហាផ្ទៃ ការបោះឆ្នោតជ្រើសរើសប្រធានសមាគមមានអាណត្តិ៥ឆ្នាំម្ដង ។
ដោយឡែក សម្រាប់អាណត្តិនាងខ្ញុំចាប់ផ្ដើមពីថ្ងៃទី០៧ ខែកក្កដា ឆ្នាំ២០១៧ រហូតមកដល់ពេលនេះ មានរយៈពេលជាង៦ឆ្នាំហើយ ។ នោះក៏ព្រោះតែឆ្នាំទី៥ ដែលត្រូវបោះឆ្នោត គឺជាពេលវេលាកំពុងមានវិបត្តិធ្ងន់ធ្ងរនៃជំងឺកូវីដ-១៩ រាជរដ្ឋាភិបាលមិនអនុញ្ញាតឱ្យមានការជួបជុំឡើយ ទើបថ្នាក់ដឹកនាំរបស់សមាគមសម្រេចពន្យារពេលបោះឆ្នោតអាណត្តិថ្មី រហូតមកដល់បច្ចុប្បន្ន ។
ទោះបីជាយ៉ាងណា សមាគមកំពុងធ្វើការជាមួយស្ថាប័នដែលពាក់ព័ន្ធ ដើម្បីរៀបចំការបោះឆ្នោតអាណត្តិថ្មីនៅក្នុងឆ្នាំនេះ ហើយសមាគមសូមស្វាគមន៍យ៉ាងកក់ក្ដៅចំពោះរៀមច្បងសិល្បករ និងបងប្អូនសិល្បករ សិល្បការិនីទូទៅ ដែលមានបំណងចង់ឈរឈ្មោះបោះឆ្នោត ដើម្បីបន្តដឹកនាំសមាគមសិល្បករខ្មែរក្នុងអាណត្តិថ្មីឱ្យកាន់តែរីកចម្រើនសំដៅគាំពារដល់សិល្បករគ្រប់ទម្រង់ជាពិសេសសិល្បករចាស់ជរា មានពិការភាព និងមានជីវភាពខ្វះខាតជាដើម។ សូមគោរពអរគុណដល់ថ្នាក់ដឹកនាំ និងបងប្អូនសិល្បករទាំងអស់ ដែលបានគាំទ្ររូបនាងខ្ញុំកន្លងមក ៕
ចែករំលែកព័តមាននេះ