រាជធានីភ្នំពេញ ៖ បន្ទាប់ពីអ្នកនាង ចន ច័ន្ទលក្ខិណា ប្រកាសបញ្ចប់អាណត្តិរបស់ខ្លួនពីប្រធាន «សមាគមសិល្បករខ្មែរ» នៅក្នុងឆ្នាំ២០២៤នេះ រួចមក មិនត្រឹមតែមានអ្នកនាង…
រាជធានីភ្នំពេញ ៖ បន្ទាប់ពីអ្នកនាង ចន ច័ន្ទលក្ខិណា ប្រកាសបញ្ចប់អាណត្តិរបស់ខ្លួនពីប្រធាន «សមាគមសិល្បករខ្មែរ» នៅក្នុងឆ្នាំ២០២៤នេះ រួចមក មិនត្រឹមតែមានអ្នកនាង ខាត់ សុឃីម ព្រមឈរឈ្មោះបោះឆ្នោតប៉ុណ្ណោះទេ លោក គួច ខេវិន ផលិតករកម្មវិធីកម្សាន្តល្បីឈ្មោះមួយរូប ក៏អាច ឈរឈ្មោះបោះឆ្នោតធ្វើជាប្រធានសមាគមសិល្បករខ្មែរ អាណត្តិថ្មី ផងដែរ ។
សំណេររបស់លោក គួច ខេវិន នៅថ្ងៃទី១៧ ខែកុម្ភៈ ឆ្នាំ២០២៤នេះ និងដោយមានសំណួរពីអ្នកសារព័ត៌មានកោះសន្តិភាព និងផ្សេងៗទៀត មកកាន់លោក គួច ខេវិន ហើយលោកកំពុងស្ថិតនៅប្រទេសថៃនោះ លោកសុំផ្តល់ចម្លើយថា ចំពោះការជ្រើសរើសអ្នកដឹកនាំ សមាគមសិល្បករខ្មែរ លោកគិតថា អ្នកមានទេពកោសល្យ មានស្នាដៃល្អៗជាច្រើន ដែលធ្លាប់បានចូលរួម លើកតម្កើងវិស័យសិល្បៈ ឲ្យរីកចម្រើនកន្លងទៅ ហើយចំពោះរូបលោកផ្ទាល់ បើឯកឧត្តម លោកជំទាវ លោកឧកញ៉ា បងប្អូនមិត្តសិល្បៈ បងប្អូន ពូមីង ជាសិល្បករ សិល្បការនី ក្មេងចាស់ យល់ឃើញថារូបលោកមានលទ្ធភាព មានសមត្ថភាព ទេពកោសល្យ អាចធ្វើទៅបាន លោកអាចឈរឈ្មោះឲ្យពួកគាត់ជ្រើសរើស សម្រាប់អាណត្តិថ្មីនេះ ។
ជាមួយគ្នានេះលោក គួច ខេវិន ក៏សូមអរគុណចំពោះសំណួរ នឹងការចាប់អារម្មណ៍របស់ឯកឧត្តម លោកជំទាវ លោកឧកញ៉ា បងប្អូនមិត្តសិល្បៈ បងប្អូន ទស្សនិកជន បណ្តាសារព័ត៌មាន ទាំងអស់ ចំពោះរូបលោក ដោយប៉ុន្មានឆ្នាំមកនេះ លោកហាក់បានឃ្លាតឆ្ងាយពីការងារសិល្បៈ ដោយងាកទៅប្រកបកិច្ចការ រកស៊ីដីធ្លី ស្រែចំការបន្តិចបន្តួច ហើយឃើញថា កាក់កបគ្រាន់បើ ប៉ុន្តែលោក នៅតែស្ថិតនៅក្បែរ នឹងឃ្លាំមើលវិស័យសិល្បៈ របស់ខ្មែរជានិច្ចដែរ ទោះជាពេលខ្លះ លោកត្រូវទៅប្រទេសអាមេរិកក្តី។ ការដកឃ្លាតឆ្ងាយបន្តិចពីសង្គមសិល្បៈ ក៏ដោយសារតែបរិយាកាសក្នុងពិភពសិល្បៈ ហាក់ច្របូកច្របល់ ហើយមានស្ថានភាពទីផ្សារការងារ មិនសូវល្អប្រសើរ ស្របពេល ដែលមិត្តភក្តិមួយចំនួន ក៏ដកឃ្លាដែរ ។
ចំពោះសំណួរថា តើគួរពង្រឹងអ្នកដឹកនាំសមាគមថ្មី យ៉ាងណានោះ ? លោក គួច ខេវិន ក៏បានលើកឡើងថា គឺវាមានលក្ខណៈដោយឡែកៗ ព្រោះថាសមាគម មិនមែនទើបតែបង្កើតម្សិលមិញនោះទេ គឺពីរ បី អាណត្តិមកហើយ ហើយក៏មិនមែនគ្រប់សកម្មភាពកន្លងទៅ សុទ្ធតែទន់ជ្រាយនោះឡើយ យើងនឹងពិនិត្យឡើងវិញ អំពីលទ្ធផលការងារវិជ្ជមាន និងអវិជ្ជមាន ដែលទទួលបាន ហើយត្រូវកែលម្អ បំពេញបន្ថែម ទៅតាមស្ថានភាពជាក់ស្តែង មិនថា តែគណនេយ្យភាព តម្លាភាព ទាក់ទងនឹងថវិការនោះទេ គឺលើគ្រប់សកម្មភាពការងាររបស់សមាគម តែម្តង ។
លោក គួច ខេវិន ឆ្លើយចំពោះសំណួរថា តើអ្នកដឹកនាំល្អ ត្រូវរៀបចំផែនការយ៉ាងណា ដើម្បីជួយដោះស្រាយបញ្ហាទំនាស់របស់អ្នកសិល្បៈនោះ ? គឺវាអាស្រ័យទៅលើទិដ្ឋភាពទំនាស់ បើវាជារឿងបុគ្គល ហើយជះឥទ្ធិពល មកលើសង្គមសិល្បៈទាំងមូល ដែលធ្វើឲ្យប៉ះពាល់កិត្តិយស សេចក្តីថ្លៃថ្នូរ នៃវប្បធម៌ ប្រពៃណីជាតិនោះ គឺអាស្រ័យលើច្បាប់ តែបើជារឿងបុគ្គល និងបុគ្គល គឺអាស្រ័យលើការសម្របសម្រួល តាមហេតុ បច្ច័យ និងផល ។ លោកយល់ថា វិបត្តិទំនាស់ផ្សេងគ្នា វិធីដោះស្រាយក៏ផ្សេងគ្នាដែរ ប៉ុន្តែអ្វីដែលត្រូវយកមកគិតគូរ ធ្វើឲ្យល្អប្រសើរជាមុន គឺសីលធម៌ គុណធម៌ និងសេចក្តីថ្លៃថ្នូររបស់សិល្បករ សិល្បការិនី នៅក្នុងសង្គមសិល្បៈខ្មែរយើងទាំងមូល សូមអរគុណ ។
ពាក់ព័ន្ធនឹងការឈរឈ្មោះបោះឆ្នោតធ្វើជាប្រធានសមាគមសិល្បករខ្មែរ អាណត្តិថ្មីនេះ កាលពីយប់ថ្ងៃទី១៦ កុម្ភៈនេះ អ្នកនាង ខាត់ សុឃីម ក៏ព្រមឈរឈ្មោះបោះឆ្នោតធ្វើជាប្រធានផងដែរ ដោយរឿងឈរឈ្មោះជានេះ អ្នកនាងមិនបានដឹង រឺត្រៀមទុកមុន ធ្វើនោះទេ ប៉ុន្តែបើមានការគាំទ្រ នឹងទុកចិត្តពីបងប្អូនសិល្បករ ទស្សនិកជន អ្នកនាងនឹងគិតគូរស្វែងយល់បន្ថែមចំពោះរឿងនេះ ។
សូមជម្រាបថា អ្នកនាង ចន ច័ន្ទលក្ខិណា បានប្រកាសនៅលើបណ្តាញសង្គមកាលពីថ្ងៃទី១៣ ខែកុម្ភៈ កន្លងមកថា ក្នុងនាមសមាគមសិល្បករខ្មែរ នាងខ្ញុំមានកិត្តិយសសូមគោរពជម្រាបជូនលោកជំទាវម៉ែ ហ៊ុន ស៊ីណាត និងបងប្អូនសិល្បករ-សិល្បការិនី ក៏ដូចជាសាធារណជនទាំងអស់ មេត្តាជ្រាបថា យោងតាមលក្ខន្តិកៈរបស់សមាគមសិល្បករខ្មែរ ដែលទទួលស្គាល់ដោយក្រសួងមហាផ្ទៃ ការបោះឆ្នោតជ្រើសរើសប្រធានសមាគមមានអាណត្តិ៥ឆ្នាំម្ដង ។
ដោយឡែក សម្រាប់អាណត្តិនាងខ្ញុំ ចាប់ផ្ដើមពីថ្ងៃទី០៧ ខែកក្កដា ឆ្នាំ២០១៧ រហូតមកដល់ពេលនេះ មានរយៈពេលជាង៦ឆ្នាំហើយ។ នោះក៏ព្រោះតែឆ្នាំទី៥ ដែលត្រូវបោះឆ្នោត គឺជាពេលវេលាកំពុងមានវិបត្តិធ្ងន់ធ្ងរ នៃជំងឺកូវីដ-១៩ រាជរដ្ឋាភិបាលមិនអនុញ្ញាតឱ្យមានការជួបជុំឡើយ ទើបថ្នាក់ដឹកនាំរបស់សមាគមសម្រេចពន្យារពេលបោះឆ្នោតអាណត្តិថ្មី រហូតមកដល់បច្ចុប្បន្ន ។
ទោះបីជាយ៉ាងណា សមាគមកំពុងធ្វើការជាមួយស្ថាប័ន ដែលពាក់ព័ន្ធ ដើម្បីរៀបចំការបោះឆ្នោតអាណត្តិថ្មី នៅក្នុងឆ្នាំនេះ ហើយសមាគមសូមស្វាគមន៍យ៉ាងកក់ក្ដៅ ចំពោះរៀមច្បងសិល្បករ និងបងប្អូនសិល្បករ សិល្បការិនីទូទៅ ដែលមានបំណងចង់ឈរឈ្មោះបោះឆ្នោត ដើម្បីបន្តដឹកនាំសមាគមសិល្បករខ្មែរក្នុងអាណត្តិថ្មីឱ្យកាន់តែរីកចម្រើនសំដៅគាំពារដល់សិល្បករគ្រប់ទម្រង់ជាពិសេសសិល្បករចាស់ជរា មានពិការភាព និងមានជីវភាពខ្វះខាតជាដើម។ សូមគោរពអរគុណដល់ថ្នាក់ដឹកនាំ និងបងប្អូនសិល្បករទាំងអស់ ដែលបានគាំទ្ររូបនាងខ្ញុំ កន្លងមក ៕
ចែករំលែកព័តមាននេះ