ប្រទេសអាល្លឺម៉ង់កាលពីថ្ងៃទី៣០ ឧសភា កន្លងមក បានបើកការពិភាក្សាស្តីអំពីវិបត្តិក្នុងប្រទេសចំពេលមានរបាយការណ៍នានាថា មនុស្សយ៉ាងហោចណាស់១៤នាក់បានស្លាប់បាត់បង់ជីវិត និងច្រើនរយនាក់ទៀតធ្លាក់ខ្លួនឈឺដោយសារការផ្ទុះឡើងនូវបាក់តេរីឈ្មោះ ECEH ដែលមានគ្រោះថ្នាក់មួយរកឃើញក្នុងផ្លែត្រសក់នាំចូលមួយប្រភេទ។
ប្រទេសបែលហ្ស៊ិក និងប្រទេសរុស្ស៊ីបានចេញការហាមប្រាមនាំចូលបន្លែពីប្រទេសអេស្ប៉ាញ ដែលគេជឿថា ជាប្រទេសមួយមានផ្លែត្រសក់ឆ្លងបាក់តេរីនោះ ។ ការលើកឡើងនេះធ្វើឱ្យក្រុងម៉ាឌ្រីដមានប្រតិកម្មតបវិញ ដោយនិយាយថា ខ្លួននឹងស្វះស្វែងរកការបង់សងពីប្រទេសនៅសហគមន៍អឺរ៉ុប សម្រាប់ការលក់ផ្លែត្រសក់ដែលធ្លាក់ចុះយ៉ាងខ្លាំងរបស់ខ្លួន។
បច្ចុប្បន្នត្រសក់មានបាក់តេរីគ្រោះថ្នាក់ដល់ជីវិតនេះក្លាយជាវិបត្តិធ្ងន់ធ្ងរមួយនៅប្រទេសអាល្លឺម៉ង់ ។ រយៈពេលជាង២សប្តាហ៍ក្រោយពីការផ្ទុះរឿងផ្លែត្រសក់មានបាក់តេរី E នេះត្រូវរាយការណ៍នៅភាគខាងជើងប្រទេសអាល្លឺម៉ង់ មនុស្សសង្ស័យឆ្លងបាក់តេរីនេះកើនឡើងដល់១.២០០នាក់។
វិទ្យាស្ថានទប់ស្កាត់ជំងឺឆ្លងអាល្លឺម៉ង់និយាយថា ការស្លាប់មនុស្ស៣នាក់ មានការជាប់ពាក់ព័ន្ធដោយផ្ទាល់ជាមួយបាក់តេរីនេះ ប៉ុន្តែអ្នកស្លាប់ដោយសារបាក់តេរីនេះកើនឡើងដល់ជាង១០នាក់ហើយ។
អាជ្ញាធរអាល្លឺម៉ង់ព្រមានពលរដ្ឋមិនឱ្យហូបបន្លែឆៅក្រោយពីបាក់តេរីប្រកបដោយគ្រោះថ្នាក់ត្រូវបានគេរកឃើញនៅក្នុងផ្លែត្រសក់សរីរាង្គដែលនាំចូលពីប្រទេសអេស្ប៉ាញកាលពីសប្តាហ៍មុន ។ ប៉ុន្តែទោះបីជាបែបណា មន្ត្រីអាល្លឺម៉ង់នានាមិនទាន់ដឹងច្បាស់ថា អ្វីដែលបង្កការផ្ទុះឡើងបាក់តេរីប្រភេទ E-Coli Entero-hémorragique (ECEH) ដែលនាំឱ្យកើតជំងឺរាករូសលាយឈាម និងប៉ះពាល់ដល់ថ្លើមធ្ងន់ធ្ងរ បណ្តាលឱ្យស្លាប់ជាយថាហេតុ ។
ការផ្ទុះឡើងនូវបាក់តេរីនេះប៉ះពាល់ប្រទេសមួយចំនួនដូចជាប្រទេសអង់គ្លេស បែលហ្ស៊ិក ស៊ុយអ៊ែត និងប្រទេសហូឡង់ជាដើម ៕
ចែករំលែកព័តមាននេះ