អូស្ត្រាលី ៖ ភ្លើងឆេះព្រៃ និងព្យុះបោកបក់ខ្លាំង បណ្ដាលឱ្យប្រជាពលរដ្ឋអូស្ត្រាលីរាប់ម៉ឺននាក់នៅទូទាំងរដ្ឋVictoria គ្មានថាមពលអគ្គិសនីប្រើប្រាស់នៅក្នុងថ្ងៃនៃក្ដីស្រឡាញ់ បន្ទាប់ពីភ្លើង និងខ្យល់បានបំផ្លិចបំផ្លាញបង្គោល និងខ្សែបណ្តាញអគ្គិសនីបង្ខំឱ្យរោងចក្រថាមពលដ៏ធំមួយនៅក្នុងរដ្ឋនេះ ត្រូវបានផ្អាកដំណើរការ…
អូស្ត្រាលី ៖ ភ្លើងឆេះព្រៃ និងព្យុះបោកបក់ខ្លាំង បណ្ដាលឱ្យប្រជាពលរដ្ឋអូស្ត្រាលីរាប់ម៉ឺននាក់នៅទូទាំងរដ្ឋVictoria គ្មានថាមពលអគ្គិសនីប្រើប្រាស់នៅក្នុងថ្ងៃនៃក្ដីស្រឡាញ់ បន្ទាប់ពីភ្លើង និងខ្យល់បានបំផ្លិចបំផ្លាញបង្គោល និងខ្សែបណ្តាញអគ្គិសនីបង្ខំឱ្យរោងចក្រថាមពលដ៏ធំមួយនៅក្នុងរដ្ឋនេះ ត្រូវបានផ្អាកដំណើរការ ។ នេះបើយោងតាមការផ្សាយរបស់សារព័ត៌មាន CNA ទី១៤ ខែកុម្ភៈ ឆ្នាំ
២០២៤ ។
ស្ថានីយថាមពល Loy Yang A របស់ក្រុមហ៊ុនថាមពល AGL ដែលទទួលខុសត្រូវប្រហែលមួយភាគបី ឬ៣០% នៃប្រភពថាមពលនៅក្នុងរដ្ឋ Victoria ត្រូវបិទកាលពីរសៀលថ្ងៃអង្គារ ដែលធ្វើឱ្យប៉ះពាល់ដល់ការផ្គត់ផ្គង់ថាមពលប្រមាណ៥០ម៉ឺនទីតាំង ។ រដ្ឋមន្ត្រីថាមពលរបស់រដ្ឋនេះ បាននិយាយថា ការដាច់ចរន្តអគ្គិសនីអាចអូសបន្លាយរយៈពេលជាច្រើនសប្តាហ៍ ហើយដែលត្រូវចាត់ទុកថា ជាការផ្តាច់ចរន្តអគ្គិសនីក្នុងទ្រង់ទ្រាយដ៏ធំបំផុតមួយ នៅក្នុងប្រវត្តិសាស្ត្ររបស់រដ្ឋ Victoria ។
អាជ្ញាធរបាននិយាយថា ផ្ទះ ឬអាជីវកម្មប្រមាណកន្លះលានគ្មានថាមពល ហើយយ៉ាងហោចណាស់សាលារៀន១០ និងមជ្ឈមណ្ឌលថែទាំកុមាររាប់សិបកន្លែងត្រូវបានបិទ ។ បន្ថែមលើនេះ បណ្តាញទូរស័ព្ទចល័ត និងសេវាទូរគមនាគមន៍ត្រូវបានកាត់ផ្តាច់នៅតំបន់មួយចំនួន ។ ប្រព័ន្ធដឹកជញ្ជូនសាធារណៈ ក៏ដូចជាផ្លូវជាច្រើនខ្សែនៅក្នុងរដ្ឋនេះត្រូវបានបង្ខំឱ្យបិទបន្ទាប់រងការខូចខាតដោយព្យុះ ។
វីដេអូដែលបានបង្ហោះតាមអុីនធើរណេតបានបង្ហាញពីភ្លៀងធ្លាក់យ៉ាងខ្លាំង និងខ្យល់បក់បោកបក់រំលំដើមឈើ បណ្តាលឱ្យមនុស្សម្នាក់បានស្លាប់ ។ ព្យុះភ្លៀង ដែលមានទាំងភ្លៀងទឹកកក រួមទាំងរន្ទះបាញ់ផងនោះ បានរារាំងដល់កិច្ចខិតខំប្រឹងប្រែងដើម្បីប្រយុទ្ធប្រឆាំងនឹងភ្លើងឆេះព្រៃដ៏ធំនៅភាគខាងលិចរបស់រដ្ឋ Victoria ។
ការព្រមានអំពីគ្រោះមហន្តរាយភ្លើងព្រៃត្រូវបានអាជ្ញាធរដាក់ចេញនៅក្នុងតំបន់Wimmera ភាគខាងលិចនៃរដ្ឋ Victoria ក្នុងកម្រិតខ្ពស់បំផុតនៃការប្រកាសអាសន្នពីភ្លើងឆេះព្រៃនៅក្នុងប្រទេសអូស្ត្រាលី ដូចទៅនឹងគ្រោះមហន្តរាយភ្លើងឆេះព្រៃកាលពី៤ឆ្នាំមុន ។ អ្នកពន្លត់អគ្គិភ័យចំនួន៥នាក់ បានរងរបួសដោយរលាកភ្លើង នៅពេលដែលរថយន្តដែលពួកគេជិះត្រូវបានឆ្លងដោយអណ្តាតភ្លើងយ៉ាងលឿននៅក្នុងទីក្រុង Pomonal ។
លោក Chris Hardiman ប្រធានផ្នែកពន្លត់អគ្គិភ័យនៃការគ្រប់គ្រងភ្លើងឆេះព្រៃប្រចាំរដ្ឋVictoria បានប្រាប់ទូរទស្សន៍ ABC News ថា «ជាក់ស្តែងជាបទពិសោធន៍ដ៏គួរឱ្យភ័យខ្លាចសម្រាប់មនុស្សគ្រប់គ្នាដែលពាក់ព័ន្ធ» ។ ផ្នែកខ្លះនៃទីក្រុងMelbourne ក៏រងការវាយប្រហារយ៉ាងធ្ងន់ធ្ងរផងដែរ វាក៏មានការរំខានយ៉ាងទូលំទូលាយដល់ការដឹកជញ្ជូននៅទីក្រុងមែលប៊ន ដោយខ្សែថភ្លើងពាក់កណ្តាលត្រូវបានផ្អាកដំណើរការ។
គួរកត់សម្គាល់ថា ស្របពេលប្រទេសអូស្ត្រាលីកំពុងរងឥទ្ធិពលអាកាសធាតុដែលកើតឡើងពីបាតុភូត El Nino បានធ្វើឱ្យតំបន់ភាគច្រើនក្នុងប្រទេសដែនកោះដ៏ធំមួយនេះ ត្រូវបានគ្របដណ្ដប់ដោយរលកកំដៅ ហើយកាលពីសប្តាហ៍ទី៣នៃខែមករា រលកកំដៅដ៏ខ្លាំងក្លាបានវាយប្រហារសារជាថ្មី ជំរុញឱ្យសេវាព្យាករណ៍អាកាសធាតុជាតិ ព្រមានពីហានិភ័យនៃភ្លើងឆេះព្រៃ និងព្យុះស៊ីក្លូន។
គេនៅចាំបានថា គ្រោះមហន្តរាយអគ្គិភ័យដ៏ធំសម្បើមកាលពីឆ្នាំ២០២០ បណ្តាលឱ្យមនុស្ស៤៨០នាក់ស្លាប់ បំផ្លាញផ្ទះចំនួន ២៥០០ ខ្នង សម្លាប់សត្វព្រៃជាច្រើនពាន់លានក្បាល និងបានដុតបំផ្លាញផ្ទៃដីប្រមាណ ២៤លានហិចតា ដែលមានទំហំប៉ុនផ្ទៃដីនៃចក្រភពអង់គ្លេស។
សីតុណ្ហភាពក្ដៅបំផុតរបស់ប្រទេសអូស្ត្រាលីបានឡើង ៥០.៧អង្សាសេ កាលពីខែមករា ឆ្នាំ២០២២។ ឈានមកដល់រដូវរងាឆ្នាំ២០២៣ ការិយាល័យឧតុនិយមរបស់ប្រទេសនេះ បានកត់ត្រាពីសីតុណ្ហភាពក្ដៅបំផុតរបស់ប្រទេសដែលមិនធ្លាប់កើតមានអស់ពេល១០០ឆ្នាំហើយ។
ក្រុមអ្នកវិទ្យាសាស្ត្រឈានមុខផ្នែកអាកាសធាតុបានព្រមានថា អនាគតរបស់ភពផែនដីនឹងពោរពេញទៅដោយគ្រោះមហន្តរាយធម្មជាតិ ហើយព្យុះ និងភ្លើងឆេះ គឺនឹងកាន់តែអាក្រក់ទៅៗ បើសិនជាមិនមានវិធានការបន្ទាន់ដើម្បីដោះស្រាយបញ្ហានៃការប្រែប្រួលអាកាសធាតុ និងការឡើងកម្ដៅផែនដីទេនោះ៕ អត្ថបទ៖អោម ចែតច័ន្ទណារ៉ា
ចែករំលែកព័តមាននេះ