រាជធានីភ្នំពេញ ៖ បុគ្គលដែលនិពន្ធរឿងស្រីឈ្មោះ ម៉ូលីកា ត្រូវប៉ូលិសចរាចរណ៍ (ស្តុបក្តាន់២) ផាកពិន័យនោះ នៅរសៀលថ្ងៃទី១៤ ខែកុម្ភៈ ឆ្នាំ២០២៤នេះ…
រាជធានីភ្នំពេញ ៖ បុគ្គលដែលនិពន្ធរឿងស្រីឈ្មោះ ម៉ូលីកា ត្រូវប៉ូលិសចរាចរណ៍ (ស្តុបក្តាន់២) ផាកពិន័យនោះ នៅរសៀលថ្ងៃទី១៤ ខែកុម្ភៈ ឆ្នាំ២០២៤នេះ សមត្ថកិច្ចបានបញ្ចូនខ្លួនទៅកាន់សាលាដំបូងរាជធានីភ្នំពេញហើយ ដើម្បីចាត់ការតាមច្បាប់ នេះបើតាមការបញ្ជាក់ពីលោកវរសេនីយ៍ឯក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ ។
លោកវរសេនីយ៍ឯក សំ វិច្ឆិកា បានអោយដឹងថា ជនសង្ស័យមានឈ្មោះ យឹម សុផាន់ណា ភេទប្រុស អាយុជាង ៣០ឆ្នាំ បានចូលរួមរៀបចំផែនការប្រឌិតរឿងក្លែងក្លាយចោទប្រកាន់មកលើមន្ត្រីនគរបាលចរាចរណ៍ នៅគោលដៅស្តុបក្ដាន់២ ខណៈមានអ្នកពាក់ព័ន្ធមួយចំនួនទៀត ដែលបានចូលរួមក្នុងផែនការនេះ បាននិងកំពុងរត់គេខ្លួន ។
លោកវរសេនីយ៍ឯក សំ វិច្ឆិកា បន្តថា ជនសង្ស័យរូបនេះ ស្ថិតក្នុងចំណោមបក្ខពួកច្រើននាក់ទៀត (កំពុងរត់គេច) ដែលបានរៀបចំបង្កើតព្រឹត្តិការណ៍ក្លែងក្លាយ បង្ហោះរឿងក្នុងគ្រុបតេឡេក្រាម ដោយបង្កើតគណនីក្លែងក្លាយដាក់ឈ្មោះ គង់ ម៉ូលីកា ដើម្បីផ្សព្វផ្សាយព័ត៌មានចោទប្រកាន់បង្កាច់បង្ខូចកិត្តិយស សេចក្តីថ្លៃថ្នូររបស់មន្ត្រីនគរបាលចរាចរណ៍ផ្លូវគោក ប្រចាំការនៅស្តុបក្តាន់២ ។
អ្នកនាំពាក្យ បានបន្ថែមថា ជនសង្ស័យ យឹម សុផាន់ណា បានរៀបចំផែនការដោយយកប្រាក់ទៅដាក់នៅកន្លែងវេរប្រាក់មួយកន្លែង នៅក្នុងមូលដ្ឋានខណ្ឌជ្រោយចង្វារ ដោយវេរចូលគណនី ABA របស់ជនស៊ីវិលម្នាក់ ដែលអង្គុយលេង ក្រោយពីជនស៊ីវិលនោះ ទិញទឹកជូននគរបាលចរាចរណ៍ នៅប្រចាំការនៅស្តុបក្តាន់២នោះ ហើយទម្លាយសារឆ្លើយឆ្លងរវាងនាង និងមន្ត្រីនគរបាលម្នាក់ ដែលអះអាងថា ខ្លួនមានតួនាទីជាមេ រហ័សនាម «ព្រួញ៧៧» ដែលបានសុំលេខទូរសព្ទនាង ឆាតមកឆ្លើយឆ្លងសុំស្នេហ៍ទៀតផង ។
ទោះជាយ៉ាងណា អ្នកនាំពាក្យ មិនទាន់អាចកំណត់ជាក់លាក់ទេថា ក្រុមជនសង្ស័យបានបង្កើតព្រឹត្តិការណ៍ក្លែងក្លាយនេះឡើង ក្នុងគោលដៅអ្វីឱ្យពិតប្រាកដនៅឡើយ ប៉ុន្តែអាចមានការពាក់ព័ន្ធ ឫធ្លាប់មានទំនាស់អ្វីមួយជាមួយនឹងកម្លាំងនគរបាលចរាចរណ៍ ដែលប្រចាំការ នៅគោលដៅនោះ ។
ជាមួយគ្នានេះដែរ ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅយប់ថ្ងៃទី១៣ ខែកុម្ភៈ ឆ្នាំ២០២៤នេះ បានបង្ហាញមុខមាត់ពិត បុគ្គលជាតួស្ត្រីឈ្មោះគង់ ម៉ូលីកា គឺជាការប្រឌិតរឿងដោយគណនីហ្វេសប៊ុកក្លែងក្លាយ ទាំងនុស្ស ទាំងប្រព័ន្ធតេឡេក្រាម ឆ្លងឆ្លើយគ្នា គឺជាបុគ្គលផ្សេងរៀបចំ មិនមែនជារឿងពិតទេ។ លោក ជួន ណារិន្ទ សូមឲ្យអ្នកនិយមលេងបណ្ដាញសង្គមមួយចំនួនតូច ពិចារណាគ្រប់ជ្រុងជ្រោយ មុនធ្វើការវាយប្រហារ ព្រោះប៉ះពាល់ដល់កិត្តិយសសេចក្ដីថ្លៃថ្នូររបស់បុគ្គល និងស្ថាប័នដែលស្អាតស្អំ ៕
អត្ថបទពាក់ព័ន្ធ ទី១៖ «លោក ជួន ណារិន្ទ ស្នើឲ្យស្ត្រីម្នាក់ចូលបំភ្លឺ ដើម្បីរកយុត្តិធម៌ជូន ករណីប៉ូលិសចរាចរណ៍(ស្តុបក្តាន់២) ផាកពិន័យ និងបា.ញ់លុយឲ្យជនស៊ីវិល» ។
អត្ថបទពាក់ព័ន្ធ ទី២៖ «លោកស្នងការ ជួន ណារិន្ទ ថាស្ត្រីឈ្មោះម៉ូលីកា មិនមែនជាតួអង្គក្នុងរឿងនេះទេ ស្នើឲ្យអ្នកនិពន្ធចេញមកសារភាពជាបន្ទាន់!» ។
អត្ថបទពាក់ព័ន្ធ ទី៣៖ «លោកស្នងការ ជួន ណារិន្ទ បញ្ជាក់ច្បាស់ថា ករណីស្ត្រីឈ្មោះម៉ូលីកាអះអាងខ្លួនថាជាជនរងគ្រោះនោះ ជារឿងមិនពិតទេ» ។
អត្ថបទពាក់ព័ន្ធ ទី៤៖ «លោក ជួន ណារិន្ទ បង្ហាញមុខមាត់ពិត បុគ្គលដែលនិពន្ធរឿងនារីឈ្មោះ ម៉ូលីកា ត្រូវប៉ូលិសចរាចរណ៍ (ស្តុបក្តាន់២) ផាកពិន័យ»។
ចែករំលែកព័តមាននេះ