ខេត្តប៉ៃលិន ៖ នៅព្រលប់ថ្ងៃទី០៨ ខែកុម្ភៈ ឆ្នាំ២០២៤នេះ គេសង្កេតឃើញប្រជាពលរដ្ឋដែលកាត់សែស្រឡាយចិន បាននាំគ្នាសម្រុកទិញនំចំណី យកទៅត្រៀមសម្រាប់សែនព្រេន នាថ្ងៃស្អែក ទី០៩…
ខេត្តប៉ៃលិន ៖ នៅព្រលប់ថ្ងៃទី០៨ ខែកុម្ភៈ ឆ្នាំ២០២៤នេះ គេសង្កេតឃើញប្រជាពលរដ្ឋដែលកាត់សែស្រឡាយចិន បាននាំគ្នាសម្រុកទិញនំចំណី យកទៅត្រៀមសម្រាប់សែនព្រេន នាថ្ងៃស្អែក ទី០៩ ខែកុម្ភ: ដែលជាថ្ងៃចូលឆ្នាំចិនដំបូង ដោយអ្នកខ្លះ ទិញក្រដាសសែនជាលុយ នំចិន ផ្លែឈើ ក្រដាសសែនផ្សេងៗជាច្រើន។ លើសពីនេះ ពួកគាត់ក៏បានទិញផ្លែឈើ សាច់ជ្រូក ក្បាលជ្រូក សាច់មាន់ និងសម្ភារៈ ធូបទៀន ផងដែរ ។
បើតាមការរៀបរាប់ពីស្ត្រីម្នាក់ឈ្មោះ សៀវម៉ី រស់នៅក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ខេត្តប៉ៃលិន បានរៀបរាប់ឱ្យដឹងថា ៖ ដោយសារតែព្រឹកនេះ ជាថ្ងៃសែនចិន-វៀតណាមដំបូង ពួកគាត់បាននាំគ្នា សម្រុកទិញគ្រឿងសែនព្រេន និងសម្ភារៈ សម្រាប់សែនចិន ដូចជា នំចំណី ផ្លែឈើ ព្រមទាំងរបស់របរផ្សេងៗ ដើម្បីឧទ្ទិសជូនដល់ជីដូនជីតាកុងម៉ា ដែលបានចែកឋានទៅឱ្យហើយ មកទទួលសេពសោយគ្រឿងសែនទាំងនោះ។
គាត់បន្តទៀតថា ការធ្វើបែបនេះ គឺដើម្បីបួងសួងបន់ស្រន់ ដល់ញាតិការទាំង៧សណ្តាន ឱ្យបែរក្រោយជូនពរដល់ពួកគាត់ជាកូនចៅ ទទួលបានពរជ័យ សេរីសួស្តី សម្រាប់ឆ្នាំថ្មី ដោយធ្វើការរកស៊ីឱ្យជួបតែជោគជ័យ និងកាក់កប កុំឱ្យមានឧបទ្រពចង្រៃណាមកយាយី ឬបៀតបៀនដល់ខ្លួន និងក្រុមគ្រួសារនោះឡើយ ។
លើសពីនេះ ការសែនព្រេននេះ គឺជាទំនៀមទម្លាប់របស់ពួកគាត់ ដែលកាត់សែស្រឡាយចិន-វៀតណាម ហើយនៅថ្ងៃបន្តបន្ទាប់ ពួកគាត់ក៏នាំគ្នាដើរលេងកម្សាន្ត នៅតាមរមណីយដ្ឋាននីមួយៗ នៅក្នុងខេត្តប៉ៃលិន ដើម្បីបំបាត់នូវទុក្ខកង្វល់ ក៏ដូចជាវេចខ្ចប់ម្ហូបអាហារយកទៅទទួលទាននៅក្បែរៗ មាត់ស្ទឹង រួចនាំគ្នាចុះងូតទឹកលេង រហូតដល់ពេលល្ងាច ទើបនាំគ្នាត្រឡប់មកផ្ទះវិញ ។
មិនត្រឹមតែខ្មែរកាត់សែស្រឡាយចិនប៉ុណ្ណោះទេ សូម្បីតែប្រជាពលរដ្ឋខ្មែរមួយចំនួន ក៏នាំគ្នាសែនព្រេន និងនាំគ្នាត្រៀមជប់លៀងជួបជុំមិត្តភក្តិ នាឱកាសនេះ ផងដែរ ៕
ចែករំលែកព័តមាននេះ