ខេត្តស្ទឹងត្រែង ៖ ទោះបីជាខេត្តស្ទឹងត្រែង ហាក់នៅឆ្ងាយបន្តិចក៏ពិតមែន ប៉ុន្តែបច្ចុប្បន្ននេះ ការធ្វើដំណើរទៅកាន់ខេត្តជាប់ព្រំដែនមួយនេះ គ្មានអ្វីជាការលំបាកទៀតទេ ខណៈដែលភ្ញៀវទេសចរ មកពីគ្រប់ទិសទី ក្នុងប្រទេសកម្ពុជា…
ខេត្តស្ទឹងត្រែង ៖ ទោះបីជាខេត្តស្ទឹងត្រែង ហាក់នៅឆ្ងាយបន្តិចក៏ពិតមែន ប៉ុន្តែបច្ចុប្បន្ននេះ ការធ្វើដំណើរទៅកាន់ខេត្តជាប់ព្រំដែនមួយនេះ គ្មានអ្វីជាការលំបាកទៀតទេ ខណៈដែលភ្ញៀវទេសចរ មកពីគ្រប់ទិសទី ក្នុងប្រទេសកម្ពុជា អាចអញ្ជើញទៅទស្សនាកម្សាន្ត នៅតាមរមណីយដ្ឋាននានា ក្នុងខេត្តនេះ ដោយរលូន និងឆាប់រហ័ស ។
លោក អ៊ន ប៉ោសឿន ប្រធានមន្ទីរទេសចរណ៍ខេត្តស្ទឹងត្រែង បានឲ្យដឹងថា សក្តានុពលទេសចរធម្មជាតិ និងកន្លែងកែច្នៃ ចំនួន៧ ក្នុងខេត្ត ជាជម្រើសល្អបំផុត ក្នុងដំណើរកម្សាន្តរបស់ភ្ញៀវមកកាន់ទឹកដីភាគឦសាន្ត ជាប់ព្រំដែនឡាវ ហើយដែលគេទទួលស្គាល់ថា ជាខេត្តពោរពេញដោយសក្តានុពលធម្មជាតិ ។
លោកប្រធានមន្ទីរ បានប្រាប់ឱ្យដឹងបន្តថា នៅក្នុងឱកាសចូលឆ្នាំថ្មី ប្រពៃណីចិន-វៀតណាម ដែលនឹងចូលមកដល់ក្នុងពេលឆាប់ៗនេះ គ្រប់រមណីយដ្ឋានធម្មជាតិ ក៏ដូចជារមណីយដ្ឋានកែច្នៃទាំងអស់ គឺបានត្រៀមរួចរាល់ ទាំងការលម្អទីតាំង និងការផ្តល់សេវាគ្រប់ផ្នែកប្រកបដោយដោយភាពរួសរាយរាក់ទាក់ និងសមរម្យ ត្រៀមស្វាគមន៍ភ្ញៀវទេសចរជាតិ និងអន្តរជាតិ ។
បើតាមលោក អ៊ន ប៉ោសឿន គឺមន្ត្រីជំនាញបានចុះណែនាំដល់ម្ចាស់រមណីដ្ឋាន ទាំងរមណីយដ្ឋានធម្មជាតិ និងរមណីយដ្ឋានកែច្នៃ ឲ្យរៀបចំកែលម្អ ឲ្យមានសោភណភាព និងមានភាពទាក់ទាញ ឬក៏មានការតាំងបង្ហាញ នូវផលិតផលផ្សេងៗ ដែលខ្លួនមាន រួមទាំងការសម្អាតបរិស្ថាន អនាមយ័ សន្តិសុខ ហើយអ្វីដែលសំខាន់នោះ គឺការធ្វើបដិសណ្ឋារកិច្ច និងសេវាម្ហូបអាហារ ខណៈដែលបញ្ហានេះ ខាងមន្ត្រីជំនាញ បានចុះណែនាំឲ្យអនុវត្តឲ្យខានតែបាន ព្រោះវាជាតម្ពក់ស្រូបយកភ្ញៀវទេសចរ ។
លោកប្រធានមន្ទីរទេសចរណ៍ខេត្ត ក៏បានណែនាំថា ក្នុងឱកាសចូលឆ្នាំប្រពៃណីចិន-វៀតណាម នេះ ខេត្តស្ទឹងត្រែង មានកន្លែងបោះតង់តាមឆ្នេរខ្សាច់ ដងទន្លេមេគង្គលើ ផងដែរ ខណៈមានសណ្ឋាគារចំនួន៤ ផ្ទះសំណាក់ចំនួន២៧ មានបន្ទប់សរុបចំនួន ៨០០បន្ទប់ ។
ចំណែកឯ រមណីយដ្ឋាន គឺមាន៧កន្លែង រីហ្សត ចំនួន២កន្លែង ដើម្បីត្រៀមលក្ខណៈទទួលភ្ញៀវទេសចរក្នុងដំណើរកម្សាន្តដ៏ឆាប់ខាងមុខ។
លោកបញ្ជាក់ថា រមណីយដ្ឋានសំខាន់ៗទាំង៧ ដែលភ្ញៀវអាចទៅបានមាន ៖
១. រមណីយដ្ឋានអូរឬស្សីកណ្តាល ស្ថិតនៅក្នុងស្រុកសៀមបូក។
២. អន្លង់ផ្សោតព្រះរំកិល។
៣. អូរស្វាយសែនជ័យ ស្ថិតក្នុងស្រុកបុរីអូរស្វាយសែនជ័យ។
៤. ភ្នំជម្រកសត្វ នៅស្រុកថាឡាបរិវ៉ាត់។
៥. សម្រស់កោះហាន ស្រុកបុរីអូរស្វាយសែនជ័យ។
៦. កោះព្រះ ស្រុកសៀមបូក។
និង៧. ឆ្នេរខ្សាច់សេកុង។
ក្រៅពីនោះក៏មានរីហ្សត ចំនួន២ គឺ ១. រីហ្សតបក្សីមេគង្គ និង២.ស្ទឹងត្រែង រីហ្សតផងដែរ ។
លោក អ៊ន ប៉ោសឿន បានអំពាវនាវជាជ្មីម្តងទៀត ដល់ភ្ញៀវទេសចរជាតិ និងអន្តរជាតិ សូមអញ្ជើញមកទស្សនា សម្រាកកម្សាន្តនៅតាមរមណីយដ្ឋាននានា ក្នុងខេត្តសនទឹងត្រែង នាឱកាសចូលឆ្នាំប្រពៃណីចិន-វៀតណាម ឲ្យបានច្រើនកុះករ ខណៈដែលគ្រប់សេវាកម្មទេសចរណ៍ទាំងអស់ យើងខ្ញុំបានត្រៀមរៀបចំរួចរាល់ សម្រាប់ទទួលភ្ញៀវទេសចរ មិនឲ្យខកបំណងនោះទ្បើយ ៕
ចែករំលែកព័តមាននេះ