រាជធានីភ្នំពេញ ៖ រដ្ឋមន្ត្រីក្រសួងមហាផ្ទៃ បានចេញបញ្ជាឲ្យផាកពិន័យ និងត្រួតពិនិត្យរថយន្ដគ្រប់ប្រភេទ បំពាក់ភ្លើងខុសបច្ចេកទេស ជាពិសេសភ្លើងស៊ីរ៉ែន និងភ្លើងហ្វា នាំឲ្យមានហានិភ័យដល់អ្នកដទៃ ។…
រាជធានីភ្នំពេញ ៖ រដ្ឋមន្ត្រីក្រសួងមហាផ្ទៃ បានចេញបញ្ជាឲ្យផាកពិន័យ និងត្រួតពិនិត្យរថយន្ដគ្រប់ប្រភេទ បំពាក់ភ្លើងខុសបច្ចេកទេស ជាពិសេសភ្លើងស៊ីរ៉ែន និងភ្លើងហ្វា នាំឲ្យមានហានិភ័យដល់អ្នកដទៃ ។
ថ្លែងក្នុងកិច្ចប្រជុំ បូកសរុបលទ្ធផលការងារសុវត្ថិភាពចរាចរណ៍ផ្លូវគោក ប្រចាំឆ្នាំ២០២៣ និងលើកទិសដៅការងារឆ្នាំ២០២៤ នាថ្ងៃទី៧ ខែកុម្ភៈ ឆ្នាំ២០២៤ នាទីស្តីការក្រសួង ឯកឧត្តម ឧបនាយករដ្ឋមន្ដ្រី ស សុខា រដ្ឋមន្ដ្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានលើកឡើងថា ការបំពាក់ភ្លើងខុសលក្ខណៈបច្ចេកទេស នាំចាំងភ្នែកដល់អ្នកដទៃ និងមានហានិភ័យ នៅពេលបើកបរផងដែរ ។
ឯកឧត្តម ឧបនាយករដ្ឋមន្ដ្រី បានសង្កេតឃើញថា ការបំពាក់ភ្លើងខុសលក្ខណៈបច្ចេកទេស ទាំងភ្លើងហ្វា និងភ្លើងស៊ីរ៉ែន តែងតែកើតមានឡើងនៅលើរថយន្ដដឹកទំនិញធុនធំ និងរថយន្ដឈ្នួលជាដើម ។
ជាមួយគ្នានោះដែរ ឯកឧត្តម ឧបនាយករដ្ឋមន្ដ្រី បានបញ្ជាក់ថា ៖ «រថយន្តធំមួយចំនួន ប្រើស៊ីផ្លេរកែ(ឮសំឡេងខ្លាំង) ក្នុងនោះការប្រើប្រាស់ភ្លើងហ្វាមួយចំនួន ដែលមិនអនុញ្ញាត។ ទាំងនេះ គឺខុសលក្ខណៈបច្ចេកទេស ដែលយើងទាំងអស់គ្នាចូលរួមត្រួតពិនិត្យ ហើយសម្អាតឱ្យបានយ៉ាងយូរត្រឹមខែ៦នេះ (ខែមិថុនា)» ។
ឯកឧត្តម ឧបនាយករដ្ឋមន្ដ្រី បន្ដថា ៖ «ក្នុងនោះដែរ ភ្លើងស៊ីរ៉ែន សូមឲ្យដោះចេញទាំងអស់ ឫត្រូវចាប់ផាកពិន័យ ព្រោះថា ប៉ុន្មានខែចុងក្រោយនេះ មានការកើនឡើង នូវការប្រើប្រាស់ភ្លើង និងមធ្យោបាយមួយចំនួន ដែលមិនអនុញ្ញាត» ។
នៅចំពោះមុខថ្នាក់ដឹកនាំស្ថាប័ន ក្រោមចំណុះក្រសួងមហាផ្ទៃ ឧបនាយករដ្ឋមន្ដ្រី ស សុខា បានណែនាំឲ្យពិនិត្យមើលរថយន្ដទាំងឡាយ ពិសេសរថយន្ដដឹកនាំទំនិញ ធុនធំ ដែលបិទស្ទឹកឃ័រអក្សរ ឬរូបភាពផ្សេងនៅលើកញ្ចក់ ឬដាក់រាំងនន ដែលធ្វើបាំងកំហើញ នៅពេលបើកបរ ហើយជាកត្តាងាយរងគ្រោះថ្នាក់ដល់អ្នកដទៃនៅតាមដងផ្លូវ។ ការអនុវត្តវិធានការទាំងអស់នេះ គឺសំដៅកាត់បន្ថយគ្រោះថ្នាក់ចរាចរណ៍ ៕
ចែករំលែកព័តមាននេះ