ខេត្តកំពង់ធំ ៖ នាងតូចម្នាក់យំឱបប្អូនស្រី បានធ្វើឱ្យមហាជនស្រក់ទឹកភ្នែកតាមហើយ ក្រោយពេលឮនាងពោលថា «ចង់បានម៉ែ ម៉ែប្រហែលមិនស្រលាញ់កូនទេ បានម៉ែទៅចោលកូន ដោយគ្មានអាល័យ»។ ប្រយោគមួយឃ្លាពោលថា «ម្តាយឯណាមិនស្រលាញ់កូន ស្រីឯណាមិនស្រលាញ់ប្ដី» តែអ្វីៗមិនអាចត្រឡប់ក្រោយបានឡើយ ក្រោយពេលស្ត្រីម្នាក់សម្រេចចិត្តបញ្ច.ប់ជីវិ.តខ្លួនឯង ចាកចេញទៅឆ្ងាយចោលកូនតូចៗឱ្យនៅរងា ហើយយំទ្រហឹងពេញផ្ទះ។
បើតាមគណនីហ្វេសប៊ុកមួយឈ្មោះ «ស្រេង សុជាតិ ( Sreang Socheat )» បានធ្វើការបង្ហោះនៅលើបណ្តាញសង្គមថា «ថ្ងៃនេះ សិស្សដ៏កម្សត់របស់ខ្ញុំជួបទុក្ខធំ ដែលបានបា.ត់ប.ង់ម្ដាយជាទីស្រលាញ់របស់គាត់ ដោយសារការធ្វើឃា.តខ្លួនឯង (ច.ង.ក) គ្រួសារគាត់ ដូចអ៊ំ ពូ មីង បានឃើញជាក់ស្ដែង។ ខ្ញុំពិតជាស្រណោះសម្ដីកូនណាស់ «ម៉ែប្រហែលមិនស្រលាញ់កូនទេ បានម៉ែទៅចោលកូន»។ សូម អ៊ំ មីង ជួយមើលថែខ្ញុំផង ខ្ញុំសូមបងប្អូនជិតឆ្ងាយមេត្តាជួយកាន់ទុក្ខ និងចូលរួមពិធីបុណ្យដោយជ្រះថ្លា តាមសុទ្ធាផងចុះ ដោយអនុគ្រោះ ។ ទីតាំងស្ថិតនៅក្នុងភូមិចំបក់ជ្រុំ ឃុំប្រាសាទ ស្រុកសន្ទុក ខេត្តកំពង់ធំ។ ២៩/០១/២០២៤»។
គួរបញ្ជាក់ផងដែរថា ចំពោះករណីខាងលើនេះ ពិតជាគួរឱ្យអាណិតដល់ក្មេងៗតូចៗណាស់ ព្រោះថា គ្នាមិនទាន់នឹងដឹងក្តីបានតបស្នងសងគុណផង ស្រាប់តែស្ត្រីម្នាក់ដែលមានឈ្មោះថា «ម៉ែ» បែរជាឃ្លាតឆ្ងាយ គ្មានថ្ងៃវិលវិញដូច្នេះ ពោលគឺពិតជាគួរឱ្យអាណិតពេកក្រៃ។ ហើយគ្រួសារមួយនេះ ក៏មានការជីវភាពខ្វះខាត ដូចដែលបងប្អូនបានទស្សនា គឺ ជញ្ចាំងរហែក យកចង្អេរមកបាំង ស្ទើរតែមិនជិតផង។
តាមរយៈបទសម្ភាសន៍ជាមួយសារព័ត៌មានកោះសន្តិភាព អ្នកគ្រូ ស្រេង សុជាតិ បានឱ្យដឹងថា «អ្នកគ្រូពិតជាអាណិតដល់ក្មេងៗណាស់ ដោយកូនសិស្សរបស់អ្នកគ្រូរូបនេះមានឈ្មោះថា លីម ស្រីឡាត់។ ក្រោយពីម្តាយប្អូនបានលាចាកលោកនោះ ប្អូនបានយំនឹកម្តាយ និងរៀបរាប់ទាំងក្តុកក្តួលថា «ចង់បានម៉ែ ម៉ែប្រហែលមិនស្រលាញ់កូនទេ បានម៉ែទៅចោលកូន។ អត់ម៉ែហើយក្រទៀត តើមានមិត្តភក្តិឯណារាប់រកខ្ញុំ? បងប្អូន អ៊ំ ពូ មីងអើយ… ខ្ញុំអស់ម្តាយហើយ ជួយមើលខ្ញុំផង»។
អ្នកគ្រូ ស្រេង សុជាតិ ដែលជាគ្រូបង្រៀនភាសាអង់គ្លេសរូបនោះ បានបន្តថា «ប្អូនស្រីរូបនេះ អាចនឹងពិបាកខ្លាំងក្រោយគ្មានម្តាយនោះ ដោយសារនាងគឺជាកូនទី៣ ក្នុងចំណោមបងប្អូនចំនួន៤នាក់ ក្នុងនោះស្រី២នាក់ និងប្រុស២នាក់។ ចំពោះការសិក្សាវិញ ប្អូនស្រី លីម ស្រីឡាត់ គឺមធ្យម ដោយសារនាងមករៀនបានទៀងទាត់ ហើយសព្វថ្ងៃ នាងរៀនថ្នាក់ទី៤។ អ្វីៗដែលអ្នកគ្រូអាណិតនាង ដោយសារតែនាងជាមនុស្សស្លូតបូត ឧស្សាហ៍ រួសរាយរាក់ទាក់ តែជាអកុសលបែរជាម្តាយបានទៅចោលនាងទាំងក្មេងវ័យដូច្នេះ»។
បើងាកមកមើលផ្ទះរបស់នាងវិញ អ្នកគ្រូ បានជម្រាបទៀតថា «គ្រួសាររបស់នាងក៏មានការខ្វះខាត ជញ្ចាំងអីរហែកអស់ហើយ ហើយគ្រួសារនាងប្រកបការងារជាកសិករ ធ្វើការមួយថ្ងៃរំពឹងមួយថ្ងៃ ចុះទម្រាំអត់ម្តាយ តើជីវិ.តបងប្អូននាងទាំង៤នាក់នឹងទៅជាបែបណា?»។
គួរបញ្ជាក់ទៀតថា នាងនៅសល់ឪពុក និងជីតាខាងម្តាយ ដូច្នេះសង្ឃឹមថា ជីវិ.តនាងថ្ងៃមុនរបស់នាងនឹងល្អប្រសើរ ខណៈពេលបច្ចុប្បន្ន នាងខ្វះខាតផង បែរជាមកជួបរឿងបែបនេះទៀត ពិតជាគួរឱ្យអាណិតខ្លាំងណាស់ ៕
អត្ថបទដោយ ៖ លីហួ គីមឆាយ
ចែករំលែកព័តមាននេះ