តើប្រទេសណាខ្លះ ដែលអ្នកកាន់លិខិតឆ្លងដែនចិនអាចទៅ ដោយមិនចាំបាច់មានទិដ្ឋាការ?
ចិន ៖ ប្រទេសចិនចាប់តាំងពីបើកព្រំដែនខ្លួនឡើងវិញនៅក្នុងឆ្នាំ ២០២៣ បន្ទាប់ពីបិទអស់រយៈ
ចិន ៖ ប្រទេសចិនចាប់តាំងពីបើកព្រំដែនខ្លួនឡើងវិញនៅក្នុងឆ្នាំ ២០២៣ បន្ទាប់ពីបិទអស់រយៈពេល៣ឆ្នាំ ដោយសារតែការរីករាលដាលនៃជំងឺកូវីដ-១៩នោះ បានចុះហត្ថលេខាលើកិច្ចព្រមព្រៀងលើកលែងទិដ្ឋាការជាមួយប្រទេសមួយចំនួន ដើម្បីលើកទឹកចិត្តដល់ការធ្វើដំណើរពលរដ្ឋខ្លួន ដែលជាផលប្រយោជន៍ដល់គោលដៅបរទេស ដែលទាក់ទាញភ្ញៀវទេសចរចិន។ នេះបើយោងតាមប្រភពពីទីភ្នាក់ងារសារព័ត៌មាន Reuters ចេញផ្សាយកាលពីថ្ងៃទី២៩ ខែមករា ឆ្នាំ២០២៤។
ជាថ្នូរនឹងផលប្រយោជន៍ដូចគ្នា ប្រទេសចិនក៏បានលើកលែងលក្ខខណ្ឌតម្រូវទិដ្ឋាការសម្រាប់ពលរដ្ឋមកពីប្រទេសមួយចំនួនរួមទាំងថៃ, ម៉ាឡេស៊ី និងសិង្ហបុរី សម្រាប់រយៈពេល៣០ថ្ងៃ ទោះបីខ្លួនមិនទាន់បានស្ដារឡើងវិញនូវគោលនយោបាយគ្មានទិដ្ឋាការសម្រាប់អ្នកទេសចរជប៉ុនរយៈពេលខ្លី ចំពេលទំនាក់ទំនងទ្វេភាគីមានភាពតានតឹងយ៉ាងណាក៏ដោយ។
ប្រទេសចិនថែមទាំងបានអនុញ្ញាតឱ្យចូលទឹកដីខ្លួន ដោយគ្មានទិដ្ឋាការជាឯកតោភាគីសម្រាប់ពលរដ្ឋមកពីប្រទេសនានាដូចជា អាល្លឺម៉ង់, បារាំង, អេស្ប៉ាញ, ហូឡង់ និងអ៊ីតាលី សម្រាប់រយៈពេល១៥ថ្ងៃ ខណៈដែលប្រទេសអឺរ៉ុបទាំង៥នេះ មិនទាន់មានការតបស្នងជាមួយនឹងការរៀបចំស្រដៀងគ្នា សម្រាប់ពលរដ្ឋចិននៅឡើយទេ។
ខាងក្រោមនេះ គឺជាកិច្ចព្រមព្រៀងទិដ្ឋាការផ្សេងៗ ដែលប្រទេសចិនបានធ្វើមកទល់ពេលនេះ ៖
-ការលើកលែងទិដ្ឋាការទៅវិញទៅមក (Mutual visa exemption)
ប្រទេសចិន និងថៃបានព្រមព្រៀងគ្នាកាលពីថ្ងៃអាទិត្យសប្តាហ៍មុន ដើម្បីលើកលែងលក្ខខណ្ឌទិដ្ឋាការអចិន្ត្រៃយ៍សម្រាប់ពលរដ្ឋរវាងគ្នា ដែលកិច្ចព្រមព្រៀងបានសម្រេចអំឡុងពេលដំណើរទស្សនកិច្ចរបស់រដ្ឋមន្ត្រីការបរទេសចិន លោក Wang Yi នៅប្រទេសថៃ។ ផែនការទៅវិញទៅមកដែលចាប់ផ្តើមពីថ្ងៃទី១ ខែមីនា ខាងមុខនេះ បានកើតឡើងដោយសារកិច្ចព្រមព្រៀងស្រដៀងគ្នារវាងចិន និងសិង្ហបុរី ដែលនឹងចូលជាធរមាននៅថ្ងៃទី៩ ខែកុម្ភៈ ដោយនាំឱ្យចំនួនប្រទេសក្នុងការលើកលែងទៅវិញទៅឈានមកដល់២២ប្រទេស។ ប្រទេសភាគច្រើនដែលមានកិច្ចព្រមព្រៀងលើកលែងទិដ្ឋាការទៅវិញទៅមកជាមួយចិន គឺស្ថិតនៅក្នុងទ្វីបអាស៊ី ដែលរួមមាន កាហ្សាក់ស្ថាន, អេមីរ៉ាតអារ៉ាប់រួម, កាតា, ម៉ាល់ឌីវ និងអាមេនី។
ប្រទេសអឺរ៉ុបទាំង ៥ ដែលបានយល់ព្រមលើការលើកលែងទិដ្ឋាការទៅវិញទៅមកមាន អាល់បានី, បេឡារុស, បូស្នៀ និងហឺហ្សេហ្គោវីណា, ស៊ែប និងសាន់ម៉ារីណូ។ ប្រទេសនៅទ្វីបអាមេរិកចំនួន ៦ បានយល់ព្រមលើការរៀបចំបែបនេះ ដែលរួមមាន បាបាដុស (Barbados), បាហាម៉ា, អេក្វាឌ័រ, ដូមីនីក, ហ្គ្រេណាដា និង សូរីណាម (Suriname)។ កិច្ចព្រមព្រៀងគ្មានទិដ្ឋាការទៅវិញទៅមក ក៏អនុវត្តផងដែរចំពោះប្រទេសអាហ្វ្រិក២គឺ ម៉ូរីស (Mauritius) និងស៊ីសែល (Seychelles) និងប្រទេសដែនសមុទ្រចំនួន២គឺ ហ្វីជី (Fiji) និងតុងហ្គា (Tonga)។
ប្រទេសចិន កាលពីចុងខែវិច្ឆិកា ឆ្នាំ២០២៣ បានប្រកាសថា ខ្លួននឹងផ្តល់ជូនអ្នកកាន់លិខិតឆ្លងដែនម៉ាឡេស៊ីដោយមិនប្រើទិដ្ឋាការរហូតដល់ថ្ងៃទី៣០ ខែវិច្ឆិកា ឆ្នាំ២០២៤ ខណៈដែលប៉ុន្មានថ្ងៃក្រោយមក ម៉ាឡេស៊ីក៏ប្រកាសថា ខ្លួននឹងលើកលែងតម្រូវការទិដ្ឋាការសម្រាប់អ្នកកាន់លិខិតឆ្លងដែនចិនរហូតដល់ថ្ងៃទី៣១ ខែធ្នូ ឆ្នាំ២០២៤។
-ការលើកលែងទិដ្ឋាការដោយឯកតោភាគី (Unilateral visa exception)
ប្រទេស និងតំបន់ជាង ២០ ដែលផ្តល់សិទ្ធិជាឯកតោភាគីដោយគ្មានទិដ្ឋាការដល់អ្នកកាន់លិខិតឆ្លងដែនចិន។ ប្រទេសដែលគ្មានទិដ្ឋាការឯកតោភាគីនៅអាមេរិកគឺ អង់ទីហ្គា និង បាប៊ុយដា (Antigua and Barbuda), សង់ឃីត និងណេវីស (Saint Kitts and Nevis), ហៃទី, សង់លូសៀ (Saint Lucia) និង ចាម៉ៃកា ។
នៅទ្វីបអាស៊ី ពលរដ្ឋចិនអាចចូលប្រទេសអូម៉ង់ កោះជេជូរបស់កូរ៉េខាងត្បូង អ៊ូសបេគីស្ថាន អ៊ីរ៉ង់ កោះត្រល់ (Phu Quoc) ក្នុងប្រទេសវៀតណាម និងហ្សកហ្ស៊ី ដោយមានទិដ្ឋាការ។ រីឯប្រទេសដែនសមុទ្ររួមមាន មីក្រូណេស៊ី (Micronesia), នីយូ (Niue), សាម័រ (Samoa), ប៉ូលីណេស៊ីបារាំង (French Polynesia) និងគីរីបាទី (Kiribati)។ ចំណែកក្នុងចំណោមប្រទេសហត្ថលេខីនៃកិច្ចព្រមព្រៀងអាហ្វ្រិកមានប្រទេស ហ្គាបុង, ម៉ារ៉ុក, ម៉ូហ្សាំប៊ិក (Mozambique), ទុយនេស៊ី, ហ្សាំប៊ី, អង់ហ្គោឡា និងបេនីន។
-ទិដ្ឋាការនៅពេលមកដល់ (Visa on arrival)
អ្នកកាន់លិខិតឆ្លងដែនចិន អាចទទួលបានទិដ្ឋាការពេលមកដល់នៅក្នុងប្រទេស និងតំបន់ជាង ៤០ រួមទាំង កម្ពុជា, ឡាវ, វៀតណាម, ម៉ាដាហ្គាស្ការ (Madagascar), បូលីវី, កោះខូក (Cook Islands), ប៉ាលូ (Palau) និងអេហ្ស៊ីប។
-ការលើកលែងទិដ្ឋាការឆ្លងកាត់ (Transit visa exemption)
អ្នកដំណើរចិនត្រូវបានលើកលែងពីតម្រូវការទិដ្ឋាការឆ្លងកាត់នៅក្នុងប្រទេស និងតំបន់ចំនួន ៤០ រួមទាំង អូទ្រីស ប៉ូឡូញ ស្វីស ស៊ីប ស្លូវ៉ាគី ហុងគ្រី និងអ៊ីតាលី៕ (ប្រភព ៖ Reuters)
ចែករំលែកព័តមាននេះ