កាលពីពេលថ្មីៗកន្លងទៅនេះ នារីម្នាក់បានប្រកាសក្តែងៗថា «ជីវិ.តកម្សត់ពេកហើយ ខំធ្វើចម្ការ តែពេលប្រមូលផលអត់មានអ្នកទិញ»។ នារីរូបស្រស់នេះបាននិយាយទៀតថា «ឪឡឹកលក់មិនចេញ ទុំពេញដី គ្មានឈ្មួញមកទិញ តើឱ្យរំពឹងអ្វី»។ ជាមួយគ្នានោះ
ខេត្តកំពង់ឆ្នាំង ៖ កាលពីពេលថ្មីៗកន្លងទៅនេះ នារីម្នាក់បានប្រកាសក្តែងៗថា «ជីវិ.តកម្សត់ពេកហើយ ខំធ្វើចម្ការ តែពេលប្រមូលផលអត់មានអ្នកទិញ»។ នារីរូបស្រស់នេះបាននិយាយទៀតថា «ឪឡឹកលក់មិនចេញ ទុំពេញដី គ្មានឈ្មួញមកទិញ តើឱ្យរំពឹងអ្វី»។ ជាមួយគ្នានោះ នាងក៏បានទទូចសុំឱ្យមហាជនជួយទិញឪឡឹក ដែលទីតាំងចម្ការ ស្ថិតនៅក្នុងឃុំក្រាំងលាវ ស្រុករលាប្អៀរ ខេត្តកំពង់ឆ្នាំង។
ប្រាកដណាស់ ពាក់ព័ន្ធរឿងប្រជាកសិករធ្វើកសិកម្ម លុះពេលប្រមូលផល រកទីផ្សារមិនបាននេះ គឺតែងតែកើតមានច្រើនករណីដែរ ហើយក៏ជាដំណឹងគួរឱ្យសោកស្ដាយចំពោះកសិករខ្មែរ ដែលខិតខំដាំដុះបានផលហើយ បែរជាគ្មានអ្នកទិញទៅវិញ។
តាមរយៈការរៀបរាប់នៅក្នុងវីដេអូរបស់នារីខាងលើ ដែលជាកូនម្ចាស់លក់ឪឡឹក បាននិយាយរៀបរាប់ឱ្យដឹងថា «ឪពុកនាងខិតខំណាស់ ដោយខំធ្វើការក្រោមថ្ងៃក្ដៅ ខំភ្ជួររាស់ បា.ញ់ថ្នាំ ដាក់ជី និងកម្លាំងសព្វសារពើគ្រប់បែបយ៉ាង ដោយក្នុងមួយហាត់ដី ដែលជាចម្ការឪឡឹកនេះ គឺត្រូវចំណាយប្រមាណ២លានរៀល ហើយបានដាំដំណាំឪឡឹកប្រមាណជា៦ ឬ៧ហិកតា»។
យ៉ាងណាមិញ មនុស្សល្អ ទេវតាតាមជួយ ដូចពាក្យចាស់ពោលថា «នៅក្នុងគ្រោះ ក៏មានលាភ» ផងដែរ ក្រោយពីការមានផ្សព្វផ្សាយជាហូរហែអំពីប្អូនស្រី ដែលស្រែកអង្វរឱ្យបងប្អូនយើងជួយរឿងឪឡឹកទុំ តែគ្មានអ្នកទិញនោះ ពេលនេះឃើញមានបងប្អូនយើងជួយទិញបានច្រើន រហូតដល់អស់ជិតពីចម្ការទៅហើយ តែក៏មិនចំណេញនោះដែរ ពោលគឺបានប្រាក់ខ្លះៗគ្រាន់រួចថ្លៃគ្រាប់ពូជតែប៉ុណ្ណោះ។
បើតាមម្ចាស់ឪឡឹក បានប្រាប់ឱ្យដឹងថា «ខ្លួនបានលក់អស់ហើយ ដោយសល់តែនៅក្នុងចម្ការបន្តិចតែប៉ុណ្ណោះ ហើយខ្លួននៅតែបន្តការដាំដុះដំណាំឪឡឹកបន្តទៀត ទោះបីជាខ្លួនខាត ឬចំណេញក៏ដោយ»។
លើសពីនេះ ម្ចាស់ឪឡឹក ក៏បានត្អូញត្អែរដែរថា «កាលពីឆ្នាំមុន ឪឡឹកដាំបានផល តែលិចលង់ដោយសារទឹកភ្លៀង ធ្វើឱ្យដំណាំខូចខាតអស់ និងឆ្នាំនេះ ដាំបានផ្លែផ្កាល្អ តែបែរជាលក់មិនដាច់ពេញចម្ការ ហើយទម្រាំលក់ចេញអស់ ខាតទៀត»។
តាមរយៈបទសម្ភាសន៍ជាមួយសារព័ត៌មានកោះសន្តិភាព អ្នកស្រី អ៊ុ សារិន ត្រូវជាម្តាយរបស់នារីដែលផ្សព្វផ្សាយតាមបណ្តាញសង្គម បានប្រាប់ឱ្យដឹងថា «ពេលនេះ ឪឡឹករបស់អ្នកស្រីដែលមានទីតាំងនៅខេត្តកំពង់ឆ្នាំនោះ បានលក់ជិតអស់ហើយ»។
អ្នកស្រីបន្តថា «ក្រោយការផ្សព្វផ្សាយតាមបណ្ដាញសង្គមរួច ក៏មានឈ្មួញមកទិញជាបន្តបន្ទាប់ តែការលក់នេះ មិនបានកម្រៃរួចថ្លៃដើមនោះឡើយ ពោលគឺក្នុង១ហាត់ អ្នកស្រី អ៊ុ សារិន ដែលជាម្ចាស់ឪឡឹកប្រាប់ថា លក់បាន១លាន១០ម៉ឺនរៀល ដោយការលក់នេះ គឺអ្នកស្រីឡៃឡុង មិនបានរួចខ្លួននោះទេ»។
អ្នកស្រីបន្តទៀតថា «មូលហេតុ ដោយសារកន្លងទៅ ត្រូវចំណាយទៅលើថ្លៃថ្នាំ ជី ការភ្ជួររាល់ និងគ្រាប់ជាដើម។ ហើយគ្រាប់ក្នុង១គីឡូ ជិត១លានរៀលបាត់ទៅហើយ ដូច្នេះឆ្នាំនេះ អ្នកស្រីគឺខាត ហើយក៏មានការសោកស្ដាយផងដែរ នៅពេលដែលដំណាំរបស់អ្នកស្រីលក់មិនចេញដូច្នេះ»។
អ្នកស្រី អ៊ុ សារិន ដែលមានវ័យ៥៧ឆ្នាំ បានបន្តទៀតថា «ខ្លួននិងស្វាមី បានដាំដំណាំឪឡឹកនេះ រយៈពេល១០ឆ្នាំជាងមកហើយ តែក្រោយខាត២ឆ្នាំជាប់គ្នានេះ អ្នកស្រីក៏នៅតែបន្តដាំ ព្រោះសព្វថ្ងៃនេះ អ្នកស្រីពឹងផ្អែកទៅលើដំណាំនេះតែមួយមុខប៉ុណ្ណោះ ទោះបីជាខាត ឬចំណេញ ក៏អ្នកស្រីនៅតែបន្តដាំដុះដដែល ដើម្បីបានថវិកាក្នុងការផ្គត់ផ្គង់គ្រួសារ និងចិញ្ចឹមកូនចៅផងដែរ»។
ជាចុងក្រោយ អ្នកស្រីពិតជាអរគុណដែលបានជួយទិញឪឡឹកអ្នកស្រី ហើយបើទោះបីជាឆ្នាំនេះខាត ឆ្នាំក្រោយៗទៀត អ្នកស្រីក្នុងនាមជាប្រជាកសិករខ្មែរ ក៏តែបន្តដាំដុះដំណាំឪឡឹកនេះម្ដងទៀត៕
អត្ថបទដោយ ៖ លីហួ គីមឆាយ
ចែករំលែកព័តមាននេះ