អណ្ដាតភ្លើងបានឆាបឆេះផ្ទះប្រជាពលរដ្ឋ១ខ្នង រហូតឆេះរាលដាលអស់១៣ខ្នងទៀតយ៉ាងសន្ធោសន្ធៅ បង្កឱ្យមានការភ្ញាក់ផ្អើលដល់មន្ត្រីជំនាញចេញរថយន្តបង្ការពន្លត់អគ្គិភ័យ និងសង្គ្រោះជាច្រើនគ្រឿង
រាជធានីភ្នំពេញ ៖ អណ្ដាតភ្លើងបានឆាបឆេះផ្ទះប្រជាពលរដ្ឋ១ខ្នង រហូតឆេះរាលដាលអស់១៣ខ្នងទៀតយ៉ាងសន្ធោសន្ធៅ បង្កឱ្យមានការភ្ញាក់ផ្អើលដល់មន្ត្រីជំនាញចេញរថយន្តបង្ការពន្លត់អគ្គិភ័យ និងសង្គ្រោះជាច្រើនគ្រឿង ធ្វើការអន្តរាគមន៍បា.ញ់ទឹកពន្លត់ កាលពីវេលាម៉ោង៧និង៣៥នាទីយប់ ថ្ងៃទី២៩ ខែមករា ឆ្នាំ២០២៤ នៅលើកំណាត់វិថីសម្តេចសុធារស ក្បែរវត្តឧណ្ណាលោម ស្ថិតក្នុងសង្កាត់ជ័យជម្នះ ខណ្ឌដូនពេញ រាជធានីភ្នំពេញ។
យោងតាមប្រភពពីកន្លែងកើតហេតុ បានប្រាប់ឱ្យដឹងថា មុនពេលកើតហេតុ គេបានឃើញផ្សែងហ៊ុយចេញពីផ្ទះកើតហេតុ បន្ទាប់មកក៏មានអណ្តាតភ្លើងឆាបឆេះចេញមកក្រៅយ៉ាងសន្ធោសន្ធៅ។ ដោយសារតែឃើញថា មិនស្រួល អ្នកភូមិក៏បានរាយការណ៍ទៅសមត្ថកិច្ចភ្លាមៗ ដើម្បីសុំរថយន្តពន្លត់អគ្គិភ័យជួយអន្តរាគមន៍តែម្ដង។
ក្រោយទទួលពីដំណឹងខាងលើនេះភ្លាម ការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ បានចេញរថយន្តជាច្រើនគ្រឿងទៅកាន់ទីតាំងកើតហេតុ ដើម្បីធ្វើការអន្តរាគមន៍បា.ញ់ទឹកពន្លត់ភ្លាមៗផងដែរ។ ដោយការអន្តរាគមន៍នេះ មន្ត្រីជំនាញបានប្រើប្រាស់រថយន្តពន្លត់អគ្គិភ័យអស់ជាច្រើនគ្រឿង និងប្រើប្រាស់ទឹកអស់យ៉ាងច្រើន ដើម្បីទប់ស្កាត់អណ្តាតភ្លើងកុំឱ្យឆេះរាលដាលអ្នកជិតខាងជាបន្តទៀត។
សូមបញ្ជាក់ផងដែរថា ករណីអគ្គិភ័យនេះ ដំបូងឡើយ គឺអណ្ដាតភ្លើងបានឆាបឆេះចេញផ្ទះ១ខ្នង នៅជាន់ទី៣ ដែលមានទំហំ៨ម៉ែត្រ x ៨ម៉ែត្រ បន្ទាប់មកក៏ឆេះរាលដាលដល់ផ្ទះចំនួន១៣ខ្នងទៀតយ៉ាងសន្ធោសន្ធៅ ប៉ុន្តែមិនបានបង្កឱ្យនរណាម្នាក់រងរបួសនោះទេ គ្រាន់តែមានអ្នកភ័យពេក រហូតដល់សន្ល.ប់តែប៉ុណ្ណោះ ។
ពាក់ព័ន្ធនៅក្នុងហេតុការណ៍អគ្គិភ័យខាងលើនេះ មន្ត្រីជំនាញបានប្រើប្រាស់រថយន្តពន្លត់ជាច្រើនគ្រឿងរួមមាន ៖ រថយន្តរបស់ការិយាល័យនគរបាលបង្កពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ ចំនួន២២គ្រឿង ប្រើប្រាស់ទឹកអស់ចំនួន៦៦ឡាន ។ រថយន្តជំនួយអន្តរាគមន៍ មានរថយន្តអគ្គិភ័យក្រសួងមហាផ្ទៃចំនួន១គ្រឿង ពុំបានប្រើប្រាស់ទឹក, រថយន្តអគ្គិភ័យ៧១១ ចំនួន០៣គ្រឿង ប្រើប្រាស់ទឹកអស់ចំនួន២ឡាន និងរថយន្តអគ្គិភ័យកងរាជអាវុធហត្ថ ចំនួន៣គ្រឿង ប្រើប្រាស់ទឹកអស់ចំនួន៣ឡាន។
រថយន្តអគ្គិភ័យទីក្រុងអូឡាំព្យា ចំនួន១គ្រឿង ប្រើប្រាស់ទឹកអស់ចំនួន១ឡាន, រថយន្តអគ្គិភ័យបុរីប៉េងហួត ចំនួន២ឡាន ប្រើប្រាស់ទឹកអស់ចំនួន២ឡាន និងរថយន្តអគ្គិភ័យក្រុមហ៊ុនស្រាបៀរកម្ពុជា ចំនួន២គ្រឿង ប្រើប្រាស់ទឹកអស់ចំនួន២ឡាន។ រថយន្តអគ្គិភ័យទីក្រុងកោះពេជ្រ ចំនួន៣គ្រឿង ប្រើប្រាស់ទឹកអស់ចំនួន៦ឡាន, រថយន្តអគ្គិភ័យទីក្រុងជ្រោយចង្វា ចំនួន៥គ្រឿង ប្រើប្រាស់ទឹកអស់ចំនួន១០ឡាន ។ រថយន្តអគ្គិភ័យទីក្រុងនរា ចំនួន១គ្រឿង ពុំបានប្រើប្រាស់ទឹក ។
គួរបញ្ជាក់ផងដែរថា គ្រោះអគ្គិភ័យឆាបឆេះផ្ទះប្រជាពលរដ្ឋអស់១៤ខ្នងខាងលើនេះ ត្រូវបានរថយន្តពន្លត់អគ្គិភ័យអន្តរាគមន៍បា.ញ់ទឹករហូតដល់ម៉ោង២១និង៣០នាទីយប់ នាថ្ងៃខែឆ្នាំដដែល ទើបអណ្ដាតភ្លើងរលត់ទៅវិញទាំងស្រុង ។ ហើយចំពោះមូលហេតុដែលបង្កឱ្យមានភ្លើងឆាបឆេះនេះ មន្ត្រីជំនាញកំពុងតែបើកការស្រាវជ្រាវ និងអនុវត្តបន្តតាមនីតិវិធីហើយ៕
ចែករំលែកព័តមាននេះ