ខេត្តពោធិ៍សាត់ ៖ បើតាមសេចក្តីរាយការណ៍ បានឱ្យដឹងថា នៅពេលនេះ ឈ្មួញ២ក្រុមកំពុងតែដាក់គ្រឿងចក្រកាយដីក្រហមយកអាចម៌ដីលក់យ៉ាងគគ្រឹកគគ្រេង នៅក្នុងតំបន់សហគមន៍អូរសណ្តាន់ ស្ថិតក្នុងភូមិក្រាំងធំ ឃុំអូរសណ្ដាន់ ស្រុកក្រគរ ខេត្តពោធិ៍សាត់។ ពួកឈ្មួញទាំងនោះ ទំនងជាត្រូវរ៉ូវជាមួយអាជ្ញាធរស្រុក ទើបធ្វើសកម្មភាពដោយបើកចំហ ព្រមទាំងប្រើរថយន្តធំៗដឹកដីក្រួសក្រហម បំផ្លាញផ្លូវងងឹតមេឃងងឹតដីទៀតផង។
អភិបាលស្រុកក្រគរ លោក លីវ សេងហ៊ីម បានប្រកាសទទួលស្គាល់សកម្មភាពជីកកាយដីនៅតំបន់អូរសណ្ដាន់នោះដែរថា «ក្រោមបញ្ជារបស់ខ្លួន ដើម្បីយកអាចម៍ដីទៅធ្វើផ្លូវនៅក្នុងភូមិសាស្ត្រស្រុកក្រគរ និងស្រុកកណ្តៀង ខេត្តពោធិ៍សាត់»។
យ៉ាងណាក៏ដោយ បើតាមប្រភពពីប្រជាពលរដ្ឋរស់នៅក្នុងតំបន់អូរសណ្ដាន់ បានមើលឃើញថា «ជាវិធានការ កន្ទេលធំបន្លំដេក ដើម្បីផលប្រយោជន៍នៃពពួកឈ្មួញរកស៊ីលក់ដីក្រួសក្រហម និងអាជ្ញាធរស្រុកក្រគរ»។
ចំណែកចៅហ្វាយស្រុកក្រគរវិញ ក៏បានអះអាងឱ្យដឹងដែរថា «ប្រសិនបើដំណើរការជីកយកអាចម៍ដីក្រួសក្រហមនោះ ខុសបទដ្ឋានបច្ចេកទេស លោកនឹងស្នើឱ្យបញ្ឈប់សកម្មភាពនៃការជីកកកាយនោះជាបន្ទាន់»។
គួរបញ្ជាក់ថា ឈ្មួញ២ក្រុមដែលកំពុងធ្វើសកម្មភាពជីកយកអាចម៍ដីក្រួសក្រហមនោះ គឺភូមិក្រាំងធំ ឃុំអូសណ្តាន់ ស្រុកក្រគរ ដោយក្រុមទី១- ឈ្មោះ តាំង សារ៉េត និងក្រុមទី២- ឈ្មោះលោកម៉ិវ។ ពួកគេធ្វើសកម្មភាព ដោយប្រើរថយន្តកង់១០ធំៗច្រើនគ្រឿង ឡើងហុយងងឹតមេឃតែម្ដង។
អ្នកភូមិរស់នៅក្នុងតំបន់នោះ មិនដឹងថា តើអាចម៍ដីក្រួសក្រហមដឹកចេញពីតំបន់អូរសណ្ដាន់ ត្រូវបានគេដឹកយកទៅធ្វើផ្លូវនៅតំបន់ណានោះទេ? ពោលគឺមិនឃើញមានការធ្វើផ្លូវ នៅក្នុងស្រុកក្រគរ ឬស្រុកកណ្តៀង នោះឡើយ។ បើមានធ្វើផ្លូវមែន ក៏ផ្លូវនោះត្រូវចំណាយលុយទិញដីក្រួសក្រហមពេញថ្លៃសម្រាប់ធ្វើដែរ មិនមែនយកអាចម៍ដីមកចាក់ងាយៗបែបនេះទេ។ អ្នកភូមិសង្ស័យថា «វាជាអំពើពុ.ករលួ.យឃុ.បឃិ.តគ្នា រវាងអភិបាលស្រុកក្រគរ លោក លីវ សេងហ៊ីម និងឈ្មួញទាំង២ក្រុមខាងលើ ដើម្បីផលប្រយោជន៍ផ្ទាល់ខ្លួនតែប៉ុណ្ណោះ»។
លោក អឹម ទួច ប្រធានការិយាល័យរ៉ែ និងថាមពល នៃមន្ទីររ៉ែ និងថាមពលខេត្តពោធិ៍សាត់ បានប្រាប់ឱ្យដឹងដែរថា «ការដាក់គ្រឿងចក្រកាយដីព្រៃសហគមន៍អូសណ្តាន់ គឺមិនទាន់បានចេញច្បាប់ឱ្យនោះទេ ។ ដូច្នេះសកម្មភាពដែលពួកគេកំពុងធ្វើសព្វថ្ងៃនេះ គឺជាទង្វើខុសច្បាប់ទាំងស្រុង។ ទង្វើខុសច្បាប់នេះ គឺស្ថិតនៅក្រោមការទទួលខុសត្រូវរបស់លោក លីវ សេងហ៊ីម អភិបាលស្រុកក្រគរ ជាមួយពួកឈ្មួញពីរបីនាក់គ្នីគ្នាគេនោះ ដែលធ្វើឡើងក្នុងផលប្រយោជន៍»។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ