សម្តេចធិបតី ៖ ភារកិច្ចស្នូលរបស់កងទ័ព គឺត្រៀមប្រយុទ្ធ ដើម្បីជាតិមាតុភូមិ
រាជធានីភ្នំពេញ ៖ សម្តេចធិបតី នាយករដ្ឋមន្ត្រី ហ៊ុន ម៉ាណែត បានគូសបញ្ជាក់ថា ភារកិច្ចស្នូលរបស់កងទ័ពកម្ពុជា គឺត្រៀមប្រយុទ្ធ និងបំពេញភារកិច្ចជូនជាតិមាតុភូមិ…
រាជធានីភ្នំពេញ ៖ សម្តេចធិបតី នាយករដ្ឋមន្ត្រី ហ៊ុន ម៉ាណែត បានគូសបញ្ជាក់ថា ភារកិច្ចស្នូលរបស់កងទ័ពកម្ពុជា គឺត្រៀមប្រយុទ្ធ និងបំពេញភារកិច្ចជូនជាតិមាតុភូមិ ជានិច្ច ។
ថ្លែងក្នុងពិធីអបអរសាទរ “ខួបអនុស្សាវរីយ៍ លើកទី២៥ ថ្ងៃបង្កើតបញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ ២៤ មករា ១៩៩៩-២៤ មករា ២០២៤” នាព្រឹកថ្ងៃទី២៤ ខែមករា ឆ្នាំ២០២៤ សម្តេចធិបតី ហ៊ុន ម៉ាណែត បានគូសបញ្ជាក់យ៉ាងដូច្នេះថា ៖ «ខ្ញុំស្នើសុំឲ្យមានការកែសម្រួលកម្មវិធីហ្វឹកហ្វឺនរបស់កងទ័ព ដើម្បីឆ្លើយតបនឹងតម្រូវការ ហើយមុននឹងចប់តួនាទីជាមេបញ្ជាការកងទ័ពជើងគោក ខ្ញុំបានចុះនៅតាមទូទាំងប្រទេស និងអង្គភាពជួរមុខ ខ្ញុំចង់ដឹង ហើយក្នុងនោះការងារស្នូល គឺការងារហ្វឹកហ្វឺន» ។
សម្តេចធិបតី បានលើកឡើងថា នៅពេលចុះជួបផ្ទាល់ សម្តេចបានក្ដាប់បាន នូវតម្រូវចាំបាច់ ក៏ដូចជានូវកង្វះខាតមួយចំនួន ដែលត្រូវគិតគូរ ហើយភារកិច្ចស្នូលរបស់កងទ័ព គឺត្រៀម និងបំពេញភារកិច្ច ថែរក្សាជាតិ មាតុភូមិ សន្តិសុខ ការពារទឹកដី និងប្រជាជន ។
ជាមួយគ្នានោះដែរ សម្តេចធិបតី ក៏បានស្នើឲ្យកងទ័ពជើងគោក បន្តយកចិត្តទុកដាក់លើភារកិច្ច ដែលបានដាក់ចេញ ឲ្យបានម៉ឺងម៉ាត់ ។
សម្ដេចធិបតី នាយករដ្ឋមន្ត្រី សង្កត់ធ្ងន់ថា «កំណែទម្រង់កងទ័ព ត្រូវផ្អែកលើមូលដ្ឋាន នៃស្មារតីជាតិនិយម នេះជាកិច្ចការ ដែលយើងត្រូវធ្វើ តែយ៉ាងម៉េចក៏ដោយ កុំឲ្យបាត់អត្តសញ្ញាណ និងស្មារតីក្នុងការការពារជាតិ ការស្មោះត្រង់ ដាច់ខាតចំពោះជាតិ និងប្រជាជន នេះហើយជាមូលដ្ឋាន និងស្មារតី នៃការធ្វើកំណែទម្រង់កងទ័ពរបស់យើង នេះគឺត្រូវធ្វើឲ្យបាន ការពារជាតិ សាសនា និងព្រះមហាក្សត្រ និងថែរក្សាសុខសន្តិភាព ឲ្យបានជាដាច់ខាត ការកែទម្រង់ទំនើបកម្មយ៉ាងណា ក៏ដោយត្រូវផ្អែកលើមូលដ្ឋាននេះឯង ពង្រឹងកម្លាំងជាតិ ដើម្បីបម្រើប្រទេសជាតិ និងប្រជាជន ការពារឲ្យបានជាដាច់ខាត នូវសុខសន្តិភាព ស្ថេរភាព ជូនប្រទេសជាតិ និងប្រជាជនរបស់យើង» ។
សម្ដេចលើកឡើងថា សុខសន្តិភាព គឺត្រូវថែរក្សាឲ្យបានទោះក្នុងតម្លៃណាក៏ដោយ ហើយស្ថេរភាពសង្គម សន្តិសុខសម្រាប់បងប្អូនប្រជាពលរដ្ឋ ក៏ជារឿងចាំបាច់ ដែលយើងត្រូវ តែធ្វើ ដើម្បីធានានូវបរិស្ថាន ក្នុងការអភិវឌ្ឍន៍ប្រទេសជាតិ ប្រកបដោយចីរភាព និងបរិយាប័ន្ន ធ្វើឲ្យពលរដ្ឋមានភាពកក់កៅ្ត មានលទ្ធភាព ប្រកបរបរចិញ្ចឹមជីវិត និងចូលរួមជាកម្លាំងពលកម្ម របស់ជាតិយើង ។
សម្ដេចប្រមុខរាជរដ្ឋាភិបាល ថ្លែងថា ក្នុងតួនាទីរបស់កងទ័ពរបស់យើង និងនិយាយ ដោយឡែក កងទ័ពជើងគោក ក៏ត្រូវចូលរួមកិច្ចការងារនេះ ហើយក៏ត្រូវបន្តកំណែទម្រង់ និងបង្កើនសមត្ថ ភាពកងទ័ព ដើម្បីធានាប្រសិទ្ធភាព ប្រតិបត្តិការបានជោគជ័យ ក្នុងរយៈពេលវែង ។
សម្ដេចធិបតីក៏គូសបញ្ជាក់ថា ការងារស្នូលរបស់កងទ័ពជើងគោក ជាមួយកម្លាំងគ្រប់ ប្រភេទទាំងអស់របស់ជាតិ បានដើរតួនាទីយ៉ាងសំខាន់ ក្នុងការចូលរួមថែរក្សាសុខសន្តិភាព និងការអភិវឌ្ឍន៍ប្រទេសជាតិ ។ សម្ដេចថា «កងទ័ពគឺជាកម្លាំងមួយដែលអាចធ្វើឲ្យផ្ទុះសង្គ្រាម ឬមួយក៏រក្សាសន្តិភាព ជាកម្លាំងស្នូលធំណាស់» ។
សម្ដេចធិបតី លើកឡើងទៀតថា គ្រប់បណ្ដាប្រទេស ដែលអនុវត្តចលនាបះបោរផ្សេងៗ មិនផ្លាស់ប្ដូរតាមលទ្ធិប្រជាធិបតេយ្យ គឺភាគច្រើនប្រើប្រាស់កងទ័ព ហើយជាក់ស្ដែងកម្ពុជា ខ្លួន ឯងការផ្លាស់ប្ដូរតាមរយៈរដ្ឋប្រហារបានធ្វើឲ្យយើងវេទនា ៕
ចែករំលែកព័តមាននេះ