រាជធានីភ្នំពេញ ៖ ព្រឹកថ្ងៃទី២៥ ខែឧសភា ឆ្នាំ២០១១ នៅទីស្តីការបណ្តោះអាសន្នក្រសួងរៀបចំដែនដីនគរូបនីយកម្ម និងសំណង់ មានរៀបចំពិធីចុះហត្ថលេខាលើកិច្ចព្រមព្រៀងស្តីពីកម្មវិធីសិទ្ធិដីធ្លីជំហានទី១ (ខែមីនា ២០១១-ខែកុម្ភៈ ២០១៣) រវាងក្រសួងរៀបចំដែនដីនគរូបនីយកម្ម និងសំណង់ និងភ្នាក់ងារអភិវឌ្ឍន៍ GIZ នៃសាធារណរដ្ឋ
រាជធានីភ្នំពេញ ៖ ព្រឹកថ្ងៃទី២៥ ខែឧសភា ឆ្នាំ២០១១ នៅទីស្តីការបណ្តោះអាសន្នក្រសួងរៀបចំដែនដីនគរូបនីយកម្ម និងសំណង់ មានរៀបចំពិធីចុះហត្ថលេខាលើកិច្ចព្រមព្រៀងស្តីពីកម្មវិធីសិទ្ធិដីធ្លីជំហានទី១ (ខែមីនា ២០១១-ខែកុម្ភៈ ២០១៣) រវាងក្រសួងរៀបចំដែនដីនគរូបនីយកម្ម និងសំណង់ និងភ្នាក់ងារអភិវឌ្ឍន៍ GIZ នៃសាធារណរដ្ឋសហព័ន្ធអាល្លឺម៉ង់ ក្រោមអធិបតីភាពលោកទេសរដ្ឋមន្ត្រីអ៊ឹម ឈុនឈឹម រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ។
ថ្លែងក្នុងឱកាសនោះ លោកប្រាក់ ហម រដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់ បានគូសបញ្ជាក់ថា នេះជាកិច្ចព្រមព្រៀងអនុវត្តស្តីពីកម្មវិធីសិទ្ធិលើដីធ្លីជំហានទី១ មានទំហំទឹកប្រាក់៤,៥៥លានអឺរ៉ូ ជាថវិកាជំនួយ សហប្រតិបត្តិការសម្រាប់អនុវត្តកម្មវិធីវិស័យដីធ្លី ដែលរួមមាន៣អនុវិស័យ គឺអនុវិស័យរដ្ឋបាល ដីធ្លី អនុវិស័យរៀបចំដែនដី និងអនុវិស័យបែងចែកដីធ្លីរយៈពេល២ឆ្នាំ គឺចាប់ពីខែមីនា ឆ្នាំ២០១១ ដល់ខែកុម្ភៈ ឆ្នាំ២០១៣ ហើយដែលរាជរដ្ឋាភិបាលកម្ពុជាក៏បានរួមបដិភាគចំនួន២.៧១០.០០០អឺរ៉ូ ក្នុង១ឆ្នាំផងដែរ ជាការរួមចំណែកយ៉ាងធំដល់ការអនុវត្តកម្មវិធីវិស័យដីធ្លី នេះ ។
រាជរដ្ឋាភិបាលកម្ពុជា ជាពិសេសក្រសួងរៀបចំដែនដី នគរូបនីយកម្ម និងសំណង់ ដែលជាស្ថាប័នអនុវត្តផ្ទាល់ជឿជាក់យ៉ាងមុតមាំថា ជំនួយសហប្រតិបត្តិការនេះ ពិតជាជួយចូលរួមចំណែកដល់ការកាត់បន្ថយភាពក្រីក្រ និងលើកកម្ពស់សិទ្ធិដីធ្លីរបស់ប្រជាពលរដ្ឋ តាមរយៈការទទួលបាននូវប័ណ្ណកម្មសិទ្ធិដីធ្លីស្របច្បាប់ សុវត្ថិភាព កាន់កាប់ដី និងការទទួលបានដីតាមរយៈសម្បទានដីសង្គមកិច្ច និងសូមសន្យាថា នឹងប្រើប្រាស់ថវិកាជំនួយនេះឱ្យមានតម្លាភាព និងចំគោលដៅ ដើម្បីឈានទៅសម្រេចទិសដៅដូចដែលបានគ្រោង និងរំពឹងទុកតាមសូចនាករដែលបានកំណត់រួមគ្នារួចហើយនោះ ។
ក្នុងពិធីនោះដែរ លោក Heinrich Jurgen Schilling នាយក GIZ ប្រចាំប្រទេសកម្ពុជា បានសម្តែងនូវការត្រេកអរ និងសង្ឃឹមថា កម្មវិធីកំណែទម្រង់ដីធ្លីរបស់ប្រទេសកម្ពុជានឹងដំណើរការទៅមុខ ហើយនឹងមានភាពជឿនលឿន និងមានភាពរីកចម្រើនបន្ថែមទៀត ។ ការងារកំណែទម្រង់ដីធ្លី គឺជាការងារមួយដែលមានភាពទូលំទូលាយ ដែលទាមទារនូវកិច្ចសហការពីគ្រប់ភាគី និងការពិភាក្សាយ៉ាងស៊ីជម្រៅជាមួយស្ថាប័នរដ្ឋ ដែលពាក់ព័ន្ធដទៃទៀត ដើម្បីសម្រេចនូវកម្មវិធីកំណែទម្រង់នេះ។
លោកទេសរដ្ឋមន្ត្រីអ៊ឹម ឈុនលឹម រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ បានថ្លែងការអរគុណចំពោះភាគីអាល្លឺម៉ង់ដែលបានផ្តល់ជំនួយជាច្រើនដល់វិស័យអភិវឌ្ឍន៍ជនបទ សេដ្ឋកិច្ចតំបន់ សុខាភិបាល និងអភិបាលកិច្ចល្អ ។ ភាគីអាល្លឺម៉ង់បានផ្តល់ជំនួយដល់វិស័យកំណែទម្រង់ដីធ្លីនេះតាំងពីពាក់កណ្តាលទសវត្សឆ្នាំ៩០មកម៉្លេះ ហើយបានសហការយ៉ាងល្អប្រសើរជាមួយបណ្តាដៃគូអភិវឌ្ឍន៍អន្តរជាតិឯទៀត មានដូចជា ហ្វាំងឡង់ កាណាដា ធនាគារពិភពលោក និងសហគមន៍អឺរ៉ុប ដើម្បីជួយលើកកម្ពស់សិទ្ធិដីធ្លីប្រទេសកម្ពុជា ។ កាយវិការប្រកបដោយមនុស្សធម៌របស់ដៃគូអភិវឌ្ឍន៍ទាំងអស់ ធ្វើឱ្យរាជរដ្ឋាភិបាលកម្ពុជាមិនអាចបំភ្លេចបានទេ និងសូមអរគុណយ៉ាងជ្រាលជ្រៅចំពោះជំនួយគាំទ្រទាំងនេះ ។
យើងនៅចាំបានថា ក្នុងកាលៈទេសៈដ៏លំបាក ភាគីអាល្លឺម៉ង់តែងតែនៅជាប់ជាមួយយើងជានិច្ច ហើយបានប្រកៀកស្មាជាមួយដៃគូអភិវឌ្ឍន៍នានាជួយដល់វិស័យដីធ្លីនៅកម្ពុជា ។ ដើម្បីឱ្យសម្រេចទៅនឹងទំហំនៃជំនួយនេះ ក្រសួងបេ្តជ្ញាខិតខំប្រឹងប្រែងបន្ថែមទៀត ដោយសហការជាមួយដៃគូអភិវឌ្ឍន៍នានា ដើម្បីធ្វើឱ្យវិស័យកំណែទម្រង់ដីធ្លីរបស់ប្រទេសកម្ពុជាកាន់តែប្រសើរឡើង ស្របទៅតាមទិសដៅផែនការយុទ្ធសាស្ត្រអភិវឌ្ឍន៍ជាតិ និងយុទ្ធសាស្ត្រចតុកោណ ដំណាក់កាលទី២របស់រាជរដ្ឋាភិបាលឆ្ពោះទៅ រកការកាត់បន្ថយភាពក្រីក្ររបស់ប្រជាពលរដ្ឋកម្ពុជា ៕
ចែករំលែកព័តមាននេះ