រាជធានីភ្នំពេញ ៖ អ្នកនាំពាក្យទីស្តីការគណៈរដ្ឋមន្ត្រីលោកផៃ ស៊ីផាន បានច្រានចោលបណ្តាញព័ត៌មានពីប្រទេសថៃ ដែលលើកឡើងថា លោកស្រីអគ្គនាយកអង្គការយូណេស្កូ បានយល់ព្រមតាមសំណើរបស់ថៃសុំឱ្យបង្អាក់ផែនការអភិវឌ្ឍន៍ប្រាសាទព្រះវិហាររបស់កម្ពុជាដោយអ្នកនាំពាក្យរូបនេះបញ្ជាក់ថា
រាជធានីភ្នំពេញ ៖ អ្នកនាំពាក្យទីស្តីការគណៈរដ្ឋមន្ត្រីលោកផៃ ស៊ីផាន បានច្រានចោលបណ្តាញព័ត៌មានពីប្រទេសថៃ ដែលលើកឡើងថា លោកស្រីអគ្គនាយកអង្គការយូណេស្កូ បានយល់ព្រមតាមសំណើរបស់ថៃសុំឱ្យបង្អាក់ផែនការអភិវឌ្ឍន៍ប្រាសាទព្រះវិហាររបស់កម្ពុជាដោយអ្នកនាំពាក្យរូបនេះបញ្ជាក់ថា លោកស្រីអ៊ីរីណា បូកូវ៉ា អគ្គនាយកអង្គការយូណេស្កូមិនបានយល់ព្រមតាមសំណើរបស់ថៃនោះ ហើយការប្រជុំនៅអង្គការយូណេស្កូ នាទីក្រុងប៉ារីស ប្រទេសបារាំង រយៈពេល២ថ្ងៃគឺថ្ងៃទី២៦ និង២៧ ឧសភា ២០១១ នេះ មិនបានទទួលលទ្ធផលអ្វីទេ ។
លោកផៃស៊ីផាន អ្នកនាំពាក្យទីស្តីការគណៈរដ្ឋមន្ត្រីបានថ្លែងផ្តល់បទសម្ភាសន៍ដល់កោះសន្តិភាពកាលពីល្ងាចថ្ងៃទី២៧ ឧសភា ២០១១ ថា កិច្ចប្រជុំនៅអង្គការយូណេស្កូរវាងកម្ពុជា-ថៃ និងអង្គការយូណេស្កូ ស្តីពីផែនការអភិវឌ្ឍន៍ប្រាសាទព្រះវិហារនោះ គឺមិនមានការប្រកាសព័ត៌មានអ្វី និងមិនមានការចេញសេចក្តីថ្លែងការណ៍អ្វីទាំងអស់ ។ ផ្ទុយទៅវិញ លោកស្រីអគ្គនាយកបានសម្តែងការសោកស្តាយ និងមិនសប្បាយចិត្ត ចំពោះអត្តចរិត ច្រឡើសបើសរបស់ថៃ យ៉ាងខ្លាំងក្លាទៀតផង ហើយអ្វីដែលថា អង្គការយូណេស្កូយល់ព្រមតាមសំណើរបស់ថៃនោះគឺជាការប្រឌិតទាំងស្រុង ។ លោកផៃ ស៊ីផាន បានសង្កត់ធ្ងន់ថា កិច្ចប្រជុំចុងក្រោយដែលបញ្ចប់នៅវេលាម៉ោង៥ល្ងាចថ្ងៃទី២៧ ឧសភា នេះ គឺពិតជាអត់ទទួលបានលទ្ធផលអ្វីទាំងអស់ ហើយប្រសិនបើមានហេតុផលអ្វីជាដុំកំភួនវិញនោះ គឺអង្គការយូណេស្កូប្រាកដណាស់នឹងធ្វើសេចក្តីប្រកាស ឬសេចក្តីថ្លែងការណ៍ជាតឹកតាងហើយ ។
គួររំឭកថា បើយោងតាមបណ្តាញផ្សព្វផ្សាយរបស់ថៃចេញផ្សាយនៅរសៀលថ្ងៃសុក្រ ទី២៧ ឧសភា ២០១១ នេះថា អង្គការយូណេស្កូបានឯកភាពតាមសំណើរបស់ថៃក្នុងការសុំពន្យារពេលផែនការអភិរក្ស និងអភិវឌ្ឍន៍តំបន់ប្រាសាទព្រះវិហារ ។ ប៉ុន្តែបើការយល់ព្រមនេះចូលជាផ្លូវការមែននោះ គឺអង្គការខ្វះគតិយុត្តិពន់ពេកណាស់ និងបានរំលោភលើអធិបតេយ្យភាពរបស់កម្ពុជា ដែលជាម្ចាស់ប្រាសាទយ៉ាងខ្លាំង រំលោភលើផែនទីឧបសម្ព័ន្ធឆ្នាំ១៩០៧ និង១៩០៨ ដែលជាផែនទីកំណត់ព្រំដែនអន្តរជាតិ ហ៊ុមព័ទ្ធប្រាសាទព្រះវិហារ និងផ្ទៃដីជុំវិញប្រាសាទ ស្ថិតក្នុងប្រទេសកម្ពុជា និងរំលោភលើសាលក្រមតុលាការយុត្តិធម៌អន្តរជាតិដែលបានកំណត់ឱ្យប្រាសាទព្រះវិហារ និងផ្ទៃដីជុំវិញប្រាសាទជារបស់កម្ពុជា។
សេចក្តីរាយការណ៍បានបញ្ជាក់ថា អគ្គនាយកអង្គការយូណេស្កូ លោកស្រីអ៊ីរីណា បូកូវ៉ា បានជួបពិភាក្សាចរចាគ្នារវាងកម្ពុជា-ថៃ ដោយភាគីកម្ពុជាដឹកនាំ ដោយលោកឧបនាយករដ្ឋមន្ត្រីសុខ អាន លោកទេសរដ្ឋមន្ត្រីវ៉ា គឹមហុង ទទួលបន្ទុកកិច្ចការព្រំដែន ចំណែកភាគីថៃដឹកនាំដោយលោកសុវីត គុណគិទី រដ្ឋមន្ត្រីក្រសួងធនធានធម្មជាតិ និងបរិស្ថាន ។ នៅពេលនេះ មិនទាន់សរុបលទ្ធផលនៅឡើយទេ ដោយភាគីថៃបានសុំពន្យារពេលលើរបៀបវារៈនៃការពិចារណាលើផែនការអភិរក្ស និងអភិវឌ្ឍន៍តំបន់ប្រាសាទព្រះវិហារ ចេញពីកិច្ចប្រជុំគណៈកម្មាធិការបេតិកភណ្ឌពិភពលោកលើកទី៣៥ នៅព្រះរាជាណាចក្របារ៉ែន ពីថ្ងៃទី១៩ ដល់ថ្ងៃទី២៩ មិថុនា ២០១១ ខាងមុខ ដោយភាគីថៃអះអាងថា ផែនការនេះបានរំលោភលើអធិបតេយ្យភាពរបស់ប្រទេសថៃ ។ ប៉ុន្តែភាគីកម្ពុជានៅមិនទាន់ទទួលយកនៅឡើយទេ ព្រោះថា បើមានការយល់ព្រមដូច្នេះមែន គឺអង្គការយូណេស្កូ បានរំលោភទៅលើគតិយុត្តិ និងទឡ្ហីករណ៍ជាច្រើនរបស់កម្ពុជា។
សេចក្តីរាយការណ៍បានបញ្ជាក់បន្ថែមទៀតថា លោកស្រីអ៊ីរីណា បូកូវ៉ា បានសម្រេចក្នុងអង្គប្រជុំឱ្យពន្យាររបៀបវារៈខាងលើ ដោយទុកពេលឱ្យប្រទេសទាំងពីរព្រមព្រៀងគ្នាបោះបង្គោលព្រំដែនឱ្យរួចរាល់ជាមុនសិន ប៉ុន្តែខាងភាគីកម្ពុជាសុំនាំយកករណីខាងលើទៅពិភាក្សាសិន ហើយនឹងផ្តល់ចម្លើយនៅរសៀលថ្ងៃសុក្រ ទី២៧ ឧសភា ២០១១ នេះ ។ ទោះជាយ៉ាងណាក្តីនៅថ្ងៃសុក្រនេះ កម្ពុជា-ថៃនឹងធ្វើសេចក្តីថ្លែងការណ៍រួមគ្នានៅវេលាម៉ោង៩ព្រឹក ជាម៉ោងនៅទីក្រុងប៉ារីស ត្រូវនឹងម៉ោង៦ល្ងាចម៉ោងនៅក្នុងប្រទេសកម្ពុជា ។ ការយល់ព្រមរបស់លោកស្រីអ៊ីរីណា បូកូវ៉ា អគ្គនាយកអង្គការយូណេស្កូដែលថា «រង់ចាំឱ្យប្រទេសទាំង២ ព្រមព្រៀងគ្នាបោះបង្គោលព្រំដែនឱ្យរួចរាល់សិននោះ» គឺជាការជឿជាក់ទៅលើការសន្យាខ្យល់របស់សៀមតែប៉ុណ្ណោះ ព្រោះសៀមមិនដែលគោរពកិច្ចសន្យារបស់ខ្លួនទេ ហើយសៀមក៏មិនដែលចង់អនុវត្តការបោះបង្គោលព្រំដែនដែរ ព្រោះបើសៀមហ៊ានបោះបង្គោល គឺសៀមច្បាស់ជាមិនអាចរំលោភយកទឹកដីកម្ពុជាបានទេ…ជាក់ស្តែងផែនទីសន្ធិសញ្ញាអន្តរជាតិឆ្នាំ១៩០៧ និងឆ្នាំ១៩០៨ បារាំង-សៀម ក៏សៀមមិនគោរពដែរ ហើយសូម្បីតែដាក់អ្នកសង្កេតការណ៍ឥណ្ឌូណេស៊ីមកលើតំបន់ឈ្លានពាន ដើម្បីពិនិត្យវាយតម្លៃឈានទៅដោះស្រាយដោយសន្តិវិធីក៏សៀមមិនព្រមដែរ ។
ក្រៅពីនេះនៅមានទៀត ដូចជាកិច្ចព្រមព្រៀងលើអនុស្សរណៈស្តីពីកិច្ចការព្រំដែនចំនួន៣ ដែលសៀមធ្វើឡើងជាមួយកម្ពុជានេះ ក៏សៀមព្យាយាមបង្កកការអនុវត្តដែរ គឺកប់ទុកត្រឹមសភាសៀមតែម្តង ។ តួយ៉ាងកិច្ចព្រមព្រៀងជាកញ្ចប់លើវិធាន៦ចំណុចរវាងរដ្ឋមន្ត្រីការបរទេសកម្ពុជា និងរដ្ឋមន្ត្រីការបរទេសសៀម ក្រោមការសម្របសម្រួលពីរដ្ឋមន្ត្រីការបរទេសឥណ្ឌូណេស៊ី និងជាប្រធានអាស៊ានផងនោះ ក៏សៀមមិនទាន់ចុះហត្ថលេខាដែរ…ដូច្នេះតើលោកស្រីអគ្គនាយកអង្គការយូណេស្កូមានហេតុផលអ្វីទៅជឿលើការសន្យារខ្យល់របស់សៀមនោះ៕
ចែករំលែកព័តមាននេះ