ខេត្តកំពង់ឆ្នាំង ៖ មានការភ្ញាក់ផ្អើលមួយដែលធ្វើឱ្យប៉ូលិសប៉េអឹមគ្រប់អង្គភាពបើកកិច្ចប្រតិបត្តិការតាមចាប់ជនដៃដល់ ព្រោះតែទទួលព័ត៌មានថា មានជនល្មើសចាប់ជនរងគ្រោះជំរិតទារប្រាក់១ម៉ឺនដុល្លារ ។ ប៉ុន្តែក្រោយពីសមត្ថកិច្ចប្រដាប់អាវុធស្រាវជ្រាវពេញមួយថ្ងៃរកជនរងគ្រោះឃើញមកវិញ បានក្លាយជារឿងអស់សំណើច ព្រោះជនរងគ្រោះបាននិយាយហាក់បីដូចជាវង្វេង ។
ហេតុការណ៍ផ្អើលរឿងចាប់ជំរិតនេះកើតឡើងនៅវេលាម៉ោង៧ព្រឹកថ្ងៃទី២៧ ឧសភា នៅភូមិចំបក់ប្រាសាទ ឃុំគ្រាំងស្គា ស្រុកទឹកផុស ។ យុវជនដែលថាគេចាប់ជំរិតនោះឈ្មោះវ៉ាន់ សុខរើន អាយុ១៨ឆ្នាំ មុខរបរកាប់អុសដុតធ្វើធ្យូង លក់នៅភូមិ-ឃុំខាងលើ ។ ប្រភពព័ត៌មានជំហានដំបូងពីមន្ត្រីកងរាជអាវុធហត្ថខេត្តបាននិយាយថា ជនរងគ្រោះត្រូវបានជនល្មើសចាប់ជំរិត ហើយទារលុយពីឪពុកឈ្មោះម៉ក់ រី អាយុ៥៧ឆ្នាំ និងម្តាយឈ្មោះឡាយ សេង ចំនួន១មឺុនដុល្លារ ជាថ្នូរនឹងការដោះលែងកូនមកវិញ ។ ព័ត៌មានដ៏ក្តៅគគុកនេះធ្វើឱ្យសមត្ថកិច្ចប៉ូលិស និងប៉េអឹមនាំគ្នាសម្រុកចូលព្រៃជាចំណុចកើតហេតុនៃអំពើចាប់ជំរិតដ៏ព្រហើននេះ ។
លោកគីម សារ៉េត អធិការស្រុកទឹកផុស បានប្រាប់តាមទូរស័ព្ទថា លោកបានទទួលព័ត៌មាននេះហើយ ហើយលោកកំពុងដឹកនាំកូនចៅទៅពិនិត្យ ។ ប្រមាណជាម៉ោង១០និង៥០នាទីព្រឹកថ្ងៃដដែល លោកបានបញ្ជាក់ថា ដូចជាពុំមែនរឿងចាប់ជំរិតទារលុយ១ម៉ឺនដុល្លារទេ ព្រោះលោកបានជួបឪពុកមាដែលជាអ្នកទទួលទូរស័ព្ទពីក្មួយដែលថា មានមនុស្ស៤នាក់ចាប់រូបគេចងបិទមុខ។ ព័ត៌មានពីដំបូងគឺត្រឹមប៉ុណ្ណឹង មិនឮថា ជំរិតទារប្រាក់នោះទេ ម្យ៉ាងទៀតគ្រួសារនេះក្រីក្រណាស់រកស៊ីដុតធ្យូងលក់ ។ លោកបន្តថា ទោះបីជាយ៉ាងណាសមត្ថកិច្ចគ្រប់ផ្នែកបានតាមរកជនរងគ្រោះគ្រប់ច្រកល្ហក ចំណែកឯទូរស័ព្ទក្រោយពីនោះមកគឺទាក់ទងលែងបានទៅទៀត ដែលរឹតតែធ្វើឱ្យមានការសង្ស័យ ។
ក្រោយពីនាំជនរងគ្រោះមកផ្ទះ និងឱ្យហូបបាយរួចរាល់បាត់ហត់ហើយ ប៉ូលិសបានធ្វើការសួរនាំ ប៉ុន្តែជននោះឆ្លើយម្តងថា អ៊ីចេះម្តងថាអ៊ីចុះមិនច្បាស់លាស់ឡើយ ។ ពីដំបូងថា មានមនុស្ស៤នាក់មកគ្រហឹមដាក់ ក្រោយមកក៏ចាប់ គេចងរួចច្រកការុង ហើយរូបគេរើរួចដោយខ្លួនឯង ។ ប៉ូលិសបានពិនិត្យខ្លួនប្រាណជននេះ មិនមានស្នាមរបួសអ្វីទេ ៕
ចែករំលែកព័តមាននេះ