ក្រោយពេលវីដេអូឃ្លីបមួយ ត្រូវបានផ្សព្វផ្សាយយ៉ាងផុសផុលនៅលើបណ្តាញសង្គម ដោយត្រូវម្ចាស់ឡានជាស្ត្រីមួយរូប បានចោទប្រកាន់ថា «មន្ត្រីប៉ូលិសចរាចរណ៍ស្តុបចេនឡា ឃាត់រថយន្តធ្វើឱ្យឆ្កូតថ្នាំរថយន្តរបស់គាត់» នោះ… ទីបំផុត
រាជធានីភ្នំពេញ ៖ ក្រោយពេលវីដេអូឃ្លីបមួយ ត្រូវបានផ្សព្វផ្សាយយ៉ាងផុសផុលនៅលើបណ្តាញសង្គម ដោយត្រូវម្ចាស់ឡានជាស្ត្រីមួយរូប បានចោទប្រកាន់ថា «មន្ត្រីប៉ូលិសចរាចរណ៍ស្តុបចេនឡា ឃាត់រថយន្តធ្វើឱ្យឆ្កូតថ្នាំរថយន្តរបស់គាត់» នោះ… ទីបំផុត ត្រូវបានស្នងការដ្ឋាននគរបាលរាជធានីភ្នំពេញ ចេញមុខបកស្រាយហើយ។
នៅថ្ងៃទី២១ ខែមករា ឆ្នាំ២០២៤ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានបំភ្លឺថា ៖ «បន្ទាប់ពីបានឃើញការផ្សព្វផ្សាយព័ត៌មានផុសនៅលើបណ្តាញសង្គម និង TikTok ជុំវិញការបង្ហោះវីដេអូរបស់ស្ត្រីម្នាក់ ទាក់ទងមន្ត្រីនគរបាលចរាចរណ៍ឈរជើងនៅតាមគោលដៅស្តុបចេនឡា ឃាត់រថយន្តធ្វើឱ្យឆ្កូតថ្នាំរថយន្តនោះ លោកឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឱ្យលោកវរសេនីយ៍ឯក ដេ ម៉ៅ នាយការិយាល័យនគរបាលចរាចរណ៍ផ្លូវគោក ធ្វើការស្រាវជ្រាវ។ ហើយនៅរសៀលថ្ងៃទី២០ ខែមករា ឆ្នាំ២០២៤ ក៏បានកោះហៅមន្ត្រីនគរបាលចរាចរណ៍ចំនួន៣នាក់ និងម្ចាស់រថយន្តឱ្យចូលខ្លួនមកបំភ្លឺផងដែរ ជុំវិញបញ្ហាការបង្ហោះវីដេអូនោះ»។
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានអះអាងបែបនេះថា «កាលពីថ្ងៃទី១៩ ខែមករា ឆ្នាំ២០២៤ មានស្ត្រីម្នាក់បើកបររថយន្ត(អូឌី) ពណ៌ស តាមផ្លូវមហាវិថីម៉ៅសេទុង គោលបំណងមកម្តុំបឹងសាឡាង លុះដល់ស្តុបចេនឡា ផ្សារដើមគរ ខណ្ឌទួលគោក ក៏បើកបរល្មើសភ្លើងសញ្ញាចរាចរណ៍ (លោ.តសញ្ញាពណ៌លឿងហើយ រថយន្តនោះមិនទាន់ជាន់នៅលើគំនូសសញ្ញាសម្រាប់ថ្មើរជើងឆ្លងកាត់) ហើយគាត់បន្តដំណើរទៅមុខទៀត។ ទើបសមត្ថកិច្ចនៅគោលដៅនៅទីនោះ ធ្វើការឃាត់រថយន្តរបស់គាត់ ក្នុងគោលបំណងដើម្បីសួរនាំ ប៉ុន្តែម្ចាស់រថយន្តមិនព្រមឈប់ទៅតាមមន្ត្រីចរាចរណ៍បញ្ជាប្រាប់នោះទេ គឺម្ចាស់រថយន្តព្យាយាមបើកគេចចេញពីកន្លែងសមត្ថកិច្ចអនុវត្តច្បាប់ ទើបធ្វើឱ្យសមត្ថកិច្ចម្នាក់គេចចេញពីរថយន្ត ហើយប៉ះទៅនឹងវិទ្យុទាក់ទង(ID) កាន់នៅដៃរបស់មន្ត្រីម្នាក់នោះ បណ្តាលឱ្យឆ្កូតថ្នាំរថយន្តដោយអចេតនា»។
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បកស្រាយបន្ថែមថា «ក្រោយពីសួរនាំរួច ម្ចាស់រថយន្តក៏បានប្រាប់សមត្ថកិច្ចថា ដោយសារគាត់ខឹងពេក មានអារម្មណ៍ឆេវឆាវ ព្រោះតែឃើញរថយន្តឆ្កូតថ្នាំ ទើបនិយាយជ្រុលជ្រួសប៉ះពាល់ដល់សមត្ថកិច្ច និងធ្វើការបកស្រាយកែសម្រួលពាក្យសម្ដីគាត់ឡើងវិញ»។
ដោយឡែក មន្ត្រីនគរបាលចរាចរណ៍ទាំង៣នាក់ ដែលឃាត់រថយន្ត បណ្តាលឱ្យប៉ះពាល់រថយន្តប្រជាពលរដ្ឋនោះ បច្ចុប្បន្នកំពុងតែសុំគោលការណ៍របស់ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដើម្បីពិនិត្យសម្រេច។
យ៉ាងណាក៏ដោយ ក្រោយពីការបំភ្លឺរបស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញជុំវិញរឿងរ៉ាវខាងលើនេះ មហាជនជាច្រើនបញ្ចេញមតិថា «បកស្រាយលើកណាមន្ត្រីត្រូវរហូត រាល់ការបំភ្លឺមិនដែលចេះខុស»។ ហើយខ្លះលើកឡើងថា «បកស្រាយបានល្អ តែបើកាន់តែល្អ សូមបង្ហាញភស្តុតាងពីវីដេអូកាមេរ៉ាសុវត្ថិភាពកំឡុងពេលកើតរឿងផង»។
ដោយសង្កេតឃើញថា បញ្ហាដែលកើតចេញពីភ្លើងបៃតង ភ្លើងលឿង ភ្លើងក្រហម កើតឡើងដដែលជាដដែល គ្មានដំណោះស្រាយនោះ មហាជនទូទៅស្នើយោបល់ថា «ស្នើសុំឱ្យខាងក្រសួងពិនិត្យមើលស្ដុបឡើងវិញផង។ កន្លែងខ្លះ លោ.តលឿងមកភ្លាមៗ ចង់ឈប់ ក៏ឈប់មិនទាន់ដែរ ព្រោះអាចមានគេបុ.កពីក្រោយ។ ឆ្នាំ២០២៤ហើយ បើអាចសូមដាក់ស្ដុបដែលមានលេខលោ.តទាំងអស់ គឺងាយស្រួលមើល»។
ចំណែកម្ចាស់គណនីហ្វេសប៊ុកមួយ ក៏បានលើកឡើងដែរថា «បើដាក់ភ្លើងចរាចរណ៍លោ.តជាវិនាទីដូចមុន ខ្ញុំគិតថា ប្រហែលកាត់បន្ថយបទល្មើសភ្លើងស្តុបបានច្រើន ។ សម្រាប់ខ្ញុំជាអ្នកបើកបរម្នាក់ដែរ ជាបទពិសោធ ខ្ញុំខ្លាចបំផុតពេលឆ្លងទីតាំងភ្លើងស្តុប បើពេលទៅជាប់ក្រហមតែម្ដង មិនជាអ្វីនោះទេ តែបើជាភ្លើងខៀវ ពេលខ្លះលោ.តភ្លើងលឿងលឿនពេក ពេលដែលរថយន្តនៅក្នុងជំហរល្បឿនផង ហើយកៀកនឹងគំនូសថ្មើរជើងឆ្លងកាត់ផង តើគួរបន្ថយល្បឿន ឬឈប់ដោយរបៀបណា ដើម្បីរក្សាសុវត្ថិភាពសម្រាប់ខ្លួនឯង និងអ្នកបើកបរដទៃដែលបើកពីក្រោយ?»។
ហ្វេសប៊ុកខាងលើ ក៏បានលើកឡើងបន្តថា «ដូច្នេះ ខ្ញុំគិតថា អស់លោកជាមន្ត្រីចរាចរណ៍ដែលឈរជើងតាមគោលដៅនីមួយៗគួរយោគយល់ និងអនុគ្រោះខ្លះផង តែអស់លោកមួយចំនួនអត់ទេ គឺឆ្លៀតប្រឹងស្វែងរកកំហុស ដើម្បីផាកពិន័យសឹងតែក្លាយជាមុខរបរទៅហើយ។ បើចង់ឱ្យស្រួលទាំងអស់គ្នា និងចង់ឱ្យការគោរពច្បាប់ និងអនុវត្តន៍ច្បាប់មានសមភាព គួរដាក់ជាវិនាទីវិញមក ស្រួលអ្នកបើកបរគេស្មានល្បឿន ដើម្បីឈប់ស្រួល និងត្រឹមត្រូវ និងចៀសវាងការប្រកែកគ្នាបែបនេះ។ និយាយឱ្យត្រង់ បើភ្លើងស្តុបដាច់វិញ ខ្ញុំកម្រឃើញមានមន្ត្រីចរាចរណ៍ណាមកសម្រួលការកកស្ទះណាស់ លើកលែងតែមានក្បួនថ្នាក់ដឹកនាំ ឬគណៈប្រតិភូឆ្លងកាត់ ។ មន្ត្រីគួរធ្វើជាគំរូឱ្យពលរដ្ឋគោរព ។ តែកន្លងមក ខ្ញុំមើលឃើញថា មន្ត្រីចរាចរណ៍១០០នាក់ ពលរដ្ឋរិះគន់៩០នាក់ទៅហើយ»។
អត្ថបទដោយ ៖ អោម ចែតច័ន្ទណារ៉ា
ចែករំលែកព័តមាននេះ