រាជធានីភ្នំពេញ ៖ ក្រសួងបរិស្ថាន បានណែនាំឲ្យអាជ្ញាធរនៅតាមមូលដ្ឋាន និងប្រជាពលរដ្ឋ អនុវត្ត៤ចំនុច ដើម្បីធានាបាននូវការទប់ស្កាត់ការបំពុលខ្យល់ជាយថាហេតុ នៅក្នុងរដូវប្រាំង ។
តាមរយៈសេចក្តីប្រកាសព័ត៌មានរបស់ក្រសួងបរិស្ថាន នៅថ្ងៃទី១៨ ខែមករា ឆ្នាំ២០២៤នេះ គឺស្ថានភាពគុណភាពខ្យល់នៅកម្ពុជា មានភាពល្អប្រសើរ ដោយកម្រិតភាគល្អិតនិចល PM 2.5 ស្ថិតចន្លោះពី ១៨,០៣ µg/m3 ទៅ ២១,៤៣ µg/m3 ដែលទាបជាងកម្រិតស្តង់ដារកំណត់ គឺ ៥០ µg/m3 ជាមធ្យមក្នុងរយៈពេល២៤ម៉ោង នៅខណៈដែលរបបខ្យល់មូសុង កំពុងបក់ពីទិសខាងជើង មកទិសខាងត្បូង នារដូវនេះ ។
ក្រសួងបានបន្ថែមថា ដើម្បីធានាបាន នូវការទប់ស្កាត់ការបំពុលខ្យល់ជាយថាហេតុ នៅក្នុងរដូវប្រាំងនេះ ក្រសួងបរិស្ថាន បានណែនាំដល់អាជ្ញាធរមូលដ្នាន និងប្រជាពលរដ្ឋ ចាំបាច់ត្រូវចូលរួមទប់ស្កាត់ការបំពុលខ្យល់ តាមរយៈវិធានការ ៤ចំណុចដូចខាងក្រោម ៖
ទី១. អាជ្ញាធរត្រូវធ្វើការណែនាំ ប្រជាពលរដ្ឋមិនឱ្យដុតរានព្រៃ វាលស្មៅ សំណល់កសិកម្ម គល់ជញ្ជ្រាំង សំរាម-សំណល់រឹង និងការដុតសំណល់ផ្សេងៗទៀតនៅទីចំហឡើយ ។
ទី២. អាជ្ញាធរ ត្រូវចាត់វិធានការទប់ស្កាត់សកម្មភាពដុតរានព្រៃ ដុតវាលស្មៅ ដុត សំណល់ កសិកម្ម ដុតសំរាមសំណល់រឹងនៅទីចំហ និងការឆេះនៅទីលានចាក់សំរាម ។
ទី៣. អាជ្ញាធរ និងប្រជាពលរដ្ឋ ត្រូវចាត់វិធានការទប់ស្កាត់ការហុយធូលី នៅការដ្ឋានសំណង់ និងការដឹកជញ្ជូនសម្ភារសំណង់។
ទី៤. អាជ្ញាធរ ត្រូវធ្វើការសម្អាតធូលី និងធ្វើអនាម័យ នៅតាមដងផ្លូវ និងទីសាធារណៈឱ្យបានជាប់ជាប្រចាំ ។
គួររម្លឹកជូនថា ដើម្បីទប់ស្កាត់ការបំពុលខ្យល់ និងបង្ការហានិភ័យធនធានធម្មជាតិ ក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថាន ក៏បានចេញសេចក្តីជូនដំណឹងម្តងរួចទៅហើយ ស្តីពីវិធានការការពារនិងទប់ស្កាត់ភ្លើងឆេះព្រៃ ដល់គ្រប់ស្ថាប័នមានសមត្ថកិច្ច និងប្រជាពលរដ្ឋទាំងអស់ឱ្យបានយល់ច្បាស់ អំពី ករណីកិច្ចក្នុងការការពារ ទប់ស្កាត់ តាមរយៈការចូលរួមសហការយ៉ាងជិតស្និទ្ធ ជាមួយអង្គភាពជំនាញក្រោម ឱវាទរបស់ក្រសួងទាំងពីរ ៕
ចែករំលែកព័តមាននេះ