រថយន្តដឹកដុំដែកធុនធំមួយគ្រឿង ដែលកំពុងបើកបរនៅលើផ្លូវ Nguyen Van Linh ស្ថិតក្នុងខណ្ឌទី៧ នៃក្រុងហូជីមិញ ស្រាប់តែក្រឡាប់ធ្លាក់ចូលទៅក្នុងស្រះទឹកមួយកន្លែង ធ្វើឱ្យអ្នកកំពុងបើកបរនៅលើដងផ្លូវ ម្នាក់ៗព្រលឹងចុងសក់រត់ចេញស៊ីព្រលិតសឹងគ្រប់ៗគ្នា
ក្រុងហូជីមិញ ៖ រថយន្តដឹកដុំដែកធុនធំមួយគ្រឿង ដែលកំពុងបើកបរនៅលើផ្លូវ Nguyen Van Linh ស្ថិតក្នុងខណ្ឌទី៧ នៃក្រុងហូជីមិញ ស្រាប់តែក្រឡាប់ធ្លាក់ចូលទៅក្នុងស្រះទឹកមួយកន្លែង ធ្វើឱ្យអ្នកកំពុងបើកបរនៅលើដងផ្លូវ ម្នាក់ៗព្រលឹងចុងសក់រត់ចេញស៊ីព្រលិតសឹងគ្រប់ៗគ្នា។ ហើយគេនៅចាំបានថា កាលពីខែមីនាឆ្នាំមុន នៅលើផ្លូវ Nguyen Van Linh ដដែលនេះ ក៏មានបុរសម្នាក់រងរបួសយ៉ាងធ្ងន់ធ្ងរ ក្រោយពីត្រូវដុំដែកទម្ងន់២០តោនធ្លាក់ពីលើរថយន្តរបស់គាត់ផងដែរ។
បើតាមសារព័ត៌មាន VN Epress បានផ្សាយនៅថ្ងៃទី១៦ ខែមករា ឆ្នាំ២០២៤នេះថា នៅម៉ោងប្រហែល៩និង៣០នាទី បុរសអ្នកបើកបររថយន្តដឹកដែកពីផែស្ងួត នៃសួនឧស្សាហកម្ម Tan Thuan ទៅខណ្ឌ Binh Chanh ។ លុះធ្វើដំណើរបានប្រមាណជាង៥០០ម៉ែត្រ ចេញពីផ្លូវបំបែកស្ពាន Tan Thuan ២ ក៏ស្រាប់តែរថយន្តក្រឡាប់ផ្ងារជើង បណ្តាលខ្សែរឹតដុំដែកនៅលើរថយន្តនោះដាច់ ធ្វើឱ្យរបូតដុំដែកដែលមានទម្ងន់រហូតដល់២០តោន អង្កត់ផ្ចិតជិត២ម៉ែត្រ ធ្លាក់លើចិញ្ចើមផ្លូវតែម្ដង ចំណែកកាប៊ីនរថយន្តវិញធ្លាក់ចូលទៅស្រះទឹកដែលនៅជាប់ផ្លូវនោះ។
ប្រភពពីកន្លែងហេតុ បានឱ្យដឹងទៀតថា នេះជាសំណាងល្អ មុនពេលដែលក្បាលរថយន្តលិចចូលទៅក្នុងទឹក អ្នកបើកបរបានបើកទ្វាររត់គេចខ្លួនទាន់ពេលវេលា ចំណែកឯដុំដែករបូតធ្លាក់ទៅលើចិញ្ចើមផ្លូវនោះ មិនមានបង្កគ្រោះថ្នាក់ដល់អ្នកបើកបរណាម្នាក់នោះឡើយ ។ ហើយនៅកន្លែងកើតហេតុ គេឃើញតែផ្នែកខាងក្រោយនៃរថយន្ត ដែលត្រាក់ទ័រកំពុងទាញចេញពីក្នុងទឹកស្រះ ចំណែកឯដុំដែកវិញក៏បានលិចផុងចូលកប់ជ្រៅទៅក្នុងដី នៅលើផ្លូវថ្មើរជើងទៅហើយ។ លុះឈានដល់ម៉ោងជិត១១ព្រឹក ទើបអាជ្ញាធរបញ្ជូនរថយន្តស្ទូចមកទាញយកដុំដែក និងរថយន្តចេញពីទីតាំងកើតហេតុ។
តាមការសន្និដ្ឋានរបស់សមត្ថកិច្ច អ្នកបើកបររថយន្តប្រហែលជាមិនអាចគ្រប់គ្រងល្បឿនបាន ទើបជ្រុលរេចង្កូតធ្លាក់ផ្លូវ បណ្ដាលឱ្យក្រឡាប់ផ្ងារជើងទ្រមេឃ និងធ្វើឱ្យរថយន្តធ្លាក់ចូលស្រះបែបនេះ។
គួររំលឹកថា កាលពីខែសីហា ឆ្នាំ២០២៣ ក៏មានហេតុការណ៍ស្រដៀងគ្នានេះដែរ កើតឡើងដល់ទៅ២លើក ដោយលើកទី១- ដុំដែកទម្ងន់២០តោន មួយ បានរមៀលធ្លាក់ពីរថយន្តទៅលើចិញ្ចើមផ្លូវ ដែលកំពុងមមាញឹកដោយចរាចរណ៍ ស្ថិតក្នុងទីក្រុង Di An ខេត្តប៊ិញឌឿង។ ចំណែកហេតុការណ៍មួយទៀត ក្រោយពីរថយន្តដឹកដុំដែកមួយគ្រឿង វ៉ាក់អើ និងចាប់ហ្វ្រាំងភ្លាមៗ ធ្វើឱ្យដុំដែកទម្ងន់២០តោនដូចគ្នានេះ រមៀលទៅមុខមួយទំហឹង ធ្វើឱ្យបាក់កាប៊ីនរថយន្តជាប់គាំងនៅលើផ្លូវតែម្ដង។
គួរបញ្ជាក់ថា ឧប្បត្តិហេតុដែលបង្កឡើងដោយរថយន្តដឹកដុំដែកនេះ គឺតែងតែកើតឡើងជាញឹកញាប់នៅទីក្រុងហូជីមិញ ប៊ិញឌឿង និងដុងណៃ បង្កឱ្យមានគ្រោះថ្នាក់ ប៉ុន្តែរហូតមកដល់ពេលនេះ នៅមិនទាន់មានការកំណត់ស្តង់ដាសុវត្ថិភាពនៃការចងដុំដែក ឬការផាកពិន័យណាមួយទៅលើបញ្ហានេះនោះទេ។ ជាពិសេសកំណាត់ផ្លូវ Nguyen Van Linh ដែលត.ភ្ជាប់ពីសួនឧស្សាហកម្ម Tan Thuan ស្ថិតក្នុងខណ្ឌទី៧ ក្រុងហូជីមិញ គឺដុំដែករាប់រយដុំ ត្រូវបានស្តុកក្នុងកំពង់ផែនោះ ហើយដឹកចេញសឹងតែរៀងរាល់ថ្ងៃ។
ចំណែកក្រសួងដឹកជញ្ជូន ក៏កំពុងតែរៀបចំសេចក្តីព្រាងសារាចរណែនាំស្តីពីសុវត្ថិភាពក្នុងការដឹកជញ្ជូនទំនិញធុនធ្ងន់ទៅលើរថយន្ត នៅពេលធ្វើចរាចរណ៍លើដងផ្លូវ ដោយនឹងកំណត់ថា តើដុំដែកទាំងនោះនឹងត្រូវរឹតចំណងឱ្យជាប់យ៉ាងម៉េច? ដែលអាចធានាបានថា ដុំដែកទាំងនោះនឹងមិនផ្លាស់ទី ឬធ្លាក់លើចិញ្ចើមផ្លូវ ដែលបង្កគ្រោះថ្នាក់ដល់អ្នកដំណើរលើដងផ្លូវ៕
អត្ថបទដោយ ៖ អោម ចែតច័ន្ទណារ៉ា
ចែករំលែកព័តមាននេះ